ءماجىلىس توراعاسى قابيبوللا جاقىپوۆتىڭ توراعالىعىمەن ءماجىلىس بيۋروسى ءوتتى. وندا پالاتانىڭ الداعى جالپى وتىرىسىندا قارالاتىن كۇن ءتارتىبىنىڭ جوباسى ناقتىلاندى, دەپ حابارلادى ءماجىلىستىڭ ءباسپاسوز قىزمەتى.
دەپۋتاتتاردىڭ تالقىلاۋىنا ەلەكتر ەنەرگەتيكاسى وبەكتىلەرىنىڭ جۇمىسىن باقىلاۋدى جانە قاداعالاۋدى ۇيىمداستىرۋ ماسەلەلەرى تۋرالى زاڭ جوباسى ءبىرىنشى وقىلىمعا شىعارىلادى.
كۇن ءتارتىبىنىڭ جوباسىنا ماجىلىسكە تۇسكەن جاڭا زاڭ جوبالارىنا قورىتىندى ازىرلەۋ مەزگىلىن ناقتىلاۋ دا ۇسىنىلىپ وتىر. ولاردىڭ قاتارىندا ۇكىمەت پەن رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ 2013 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەبى بار. سونىمەن قاتار, قۇرىلىس وبەكتىلەرىن جوبالاۋ سالاسىنداعى ساراپشىلىق قىزمەتتى رەفورمالاۋ بويىنشا وزگەرىستەر مەن تولىقتىرۋلار ەنگىزۋ ماسەلەسى دە قوسىلعان.
پالاتا, سولارمەن بىرگە, راتيفيكاتسيالاناتىن زاڭ جوبالارىنا دا قورىتىندى ازىرلەۋ مەزگىلىن ناقتىلايتىن بولادى. ولار: قازاقستان-ەستونيا ۇكىمەتارالىق ينۆەستيتسيالاردى كوتەرمەلەۋ جانە ءوزارا قورعاۋ تۋرالى كەلىسىمى مەن قازاقستان مەن سينگاپۋر ۇكىمەتتەرى اراسىنداعى تابىسقا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى كەلىسىم.
بيۋرو وتىرىسىندا ءماجىلىستىڭ ەكونوميكالىق رەفورما جانە ايماقتىق دامۋ كوميتەتى قىزىلوردا وبلىسىندا (28-30 مامىر 2014 ج.) كوشپەلى وتىرىس وتكىزەتىنى تۋرالى شەشىم قابىلداندى.