وسكەمەندە حالىقارالىق زاماناۋي تالاپتارعا ساي جابىق باسسەين كەشەنى جەكسەنبى كۇنى ەسىگىن ايقارا اشتى. سالتاناتتى اشىلۋ راسىمىنە پرەمەر-مينيستردىڭ ورىنباسارى گۇلشارا ءابدىقالىقوۆا باستاعان ۇكىمەتتىك دەلەگاتسيا مەن پارلامەنت دەپۋتاتتارى قاتىستى.
سۋعا ءجۇزۋ باسسەينى بەس بلوكتان تۇرادى. ەڭ نەگىزگىسىندە اۋماعى 1050 شارشى مەتردى قۇرايتىن الىپ باسسەين بار. كوكپەڭبەك ايدىنى كىشىگىرىم كولدەي بولىپ كوز تارتىپ تۇرعان مۇنداي باسسەين وبلىس ورتالىعىندا تۇڭعىش رەت پايدالانۋعا بەرىلىپ وتىر. حاۋىز سۋىنىڭ ەڭ تاياز تۇسى 1,8 مەتر بولسا, تەرەڭ جەرى 4 مەتردەن اسادى.
ءزاۋلىم دە زاماناۋي سپورت نىسانى سۋعا ءجۇزۋ, سۋعا سەكىرۋ, سۋ دوبى, سينحروندى ءجۇزۋ سىندى سۋ سپورتىنىڭ بارلىق تۇرلەرىمەن اينالىسۋعا مۇمكىندىك بەرەدى. سونداي-اق, نىساندا كورەرمەن مەن جاتتىعۋ زالدارى, كيىم اۋىستىرۋ بولمەلەرى, گاردەروب, اكىمشىلىك قىزمەتكەرلەرى مەن جاتتىقتىرۋشىلارعا ارنالعان بولمەلەر, گاردەروب پەن اسحانا بار.
– ەلباسىمىز حالىق اراسىندا بۇقارالىق سپورتتى دامىتۋعا, دەنەشىنىقتىرۋعا دەن قويۋشىلار قاتارىن 30 پايىزدان ارتتىرۋعا ەرەكشە كوڭىل ءبولىپ وتىر. سپورت – دەنساۋلىق كەپىلى, كوڭىل-كۇيدى شاتتىققا بولەيتىن ونەر. وسكەمەندە سوڭعى جىلدارى اۋقىمدى سپورت كلاستەرى قالىپتاسقانىنا كۋا بولىپ وتىرمىز. جاڭا باسسەيننىڭ جانىندا جەكپە-جەك سارايى, جەڭىل اتلەتيكا مانەجى ورنالاسقان. بۇل – وبلىس ورتالىعىندا سپورتپەن شۇعىلدانۋعا, سالاماتتى ءومىر سالتىن قالىپتاستىرۋعا ايتارلىقتاي جاعداي جاسالعانىنىڭ كورىنىسى. بۇگىن تۇساۋىن كەسىپ وتىرعان كەشەننەن كەلەشەكتە ۇزدىك سپورت سايىپقىراندارى شىعاتىنىنا سەنەمىن, – دەدى ۆيتسە-پرەمەر گ.ابدىحالىقوۆا.
ءوڭىر باسشىسى ب.ساپارباەۆ پرەزيدەنت تاپسىرماسىنا سايكەس, جابىق باسسەين كەشەنى جاستاردىڭ, ايماق تۇرعىندارىنىڭ سالاماتتى ءومىر سالتىن قالىپتاستىرۋعا سۇبەلى ۇلەس قوساتىنىن جەتكىزىپ, بۇقارالىق سپورتپەن اينالىسۋشىلار قاتارىمەن بىرگە كاسىپقوي سپورتشىلار سانىن ارتتىرۋ باعىتىندا دا جۇمىس جۇرگىزىلەتىنىن اتاپ ءوتتى. ماسەلەن, ءوتكەن جىلى وڭىردە 100-دەن استام فۋتبول الاڭى سالىندى. بيىل 200 ورىندىق سپورت ينتەرناتى پايدالانۋعا بەرىلمەك. وبلىس اكىمى اتالعان شارالارعا دەمەۋشىلىك تانىتىپ كەلە جاتقان «قازتسينك», «قازاقمىس», «قازاتومونەركاسىپ» سىندى كومپانيالارعا ريزاشىلىعىن ءبىلدىردى. ايماق باسشىسىنىڭ ايتۋىنشا, «تۋعان جەرگە – تاعزىم» اكتسياسى وبلىستىڭ الەۋمەتتىك ماسەلەلەرىن شەشۋگە كوپ كومەگىن تيگىزىپ وتىر. اكتسيا قولعا الىنعان التى جىل ىشىندە دەمەۋشىلەر قارجىسى ەسەبىنەن الەۋمەتتىك نىساندار سالۋعا 23 ميلليارد تەڭگە بولىنگەن.
كەشەننىڭ اشىلۋ سالتاناتىندا بىرقاتار سپورت ارداگەرلەرىنە باسسەيندە جىل بويى جاتتىعۋعا مۇمكىندىك بەرەتىن ابونەمەنتتىك كارتوچكالار تابىس ەتىلىپ, سۋدا ءجۇزۋشىلەردىڭ سايىسى ءوتتى.
دۋمان اناش,
«ەگەمەن قازاقستان».
وسكەمەن.
سۋرەتتەردى تۇسىرگەن
ەسىمحان ورىنباەۆ.