قوستاناي قالاسىنداعى كوركەمسۋرەت گالەرەياسىندا ەرەكشە كورمە ءوتتى. وسىدان وتىز جىل بۇرىن ارقالىق پەداگوگيكا ينستيتۋتىنىڭ كوركەمسۋرەت فاكۋلتەتىن ءبىتىرىپ, كەيىن رەسەيدە قىزمەت ىستەگەن ءبىر توپ سۋرەتشىلەر ءوز شىعارمالارىن قوستانايلىقتار نازارىنا ۇسىندى. كورمەنى ۇيىمداستىرۋعا ينستيتۋت تۇلەكتەرى مەن سول كەزدەگى ولارعا ساباق بەرگەن ۇستازداردىڭ باستاماسى سەبەپ بولدى. كوپ جىلدار كەزدەسپەگەن تۇلەكتەر كورمەگە ءوز شىعارمالارىن قويىپ, دوستارمەن كەزدەسۋ ءۇشىن رەسەيدىڭ نيجنەۆارتوۆسك قالاسىنان, باشقۇرتستاننان, قازاقستاننىڭ ءار شالعايىنان قوستانايعا كەلدى. گالەرەيانىڭ ەكى زالىنا بىردەي ىلىنگەن ءار جانردا جازىلعان شىعارمالاردان, گوبەلەندەردەن, مۇسىندەردەن تاريحي كورشى ەكى ەلدىڭ, ورىس ورمانى مەن قازاق دالاسىنىڭ سيپاتىن كورگەندەي بولاسىڭ. ينستيتۋت تۇلەكتەرى اراسىندا نيجنەۆارتوۆسكىدەن كەلگەن رامازان شايقۇلوۆتىڭ, راگيزا شايقۇلوۆانىڭ, يۋري بىچكوۆتىڭ, ەرىك حۇسايىنوۆتىڭ جانە باشقۇرتستاندىق ۆيتالي شاپوۆالوۆتىڭ شىعارمالارى رەسەيگە تانىمال بولىپ قالعان.
– كورمەگە قاتىسۋشى سۋرەتشىلەر نەگىزىنەن رەسەيدىڭ نيجنەۆارتوۆسك قالاسىنان كەلدى. ولار سونداعى ۋنيۆەرسيتەتتە قىزمەت ىستەيدى جانە شىعارماشىلىقپەن اينالىسادى. ونەر باردا ەكى ەل, ەكى حالىق اراسىنداعى بايلانىس ۇزىلمەك ەمەس. ءبىزدىڭ تۇلەكتەر وسى كورمە ارقىلى كورشى ەلدەر اراسىنداعى ۇزىلمەيتىن التىن ءتىن سەكىلدى رۋحاني بايلانىستىڭ ماڭگى جاسايتىنىن دالەلدەپ وتىر. ولاردىڭ سۋرەتتەرىنەن ءسىبىردىڭ, حاكاس حالقىنىڭ رۋحاني دۇنيەسىن, تابيعاتىن كورەمىز. ءبىزدىڭ تۇلەكتەر رەسەيدە تۇرسا دا, ولاردىڭ شىعارماشىلىعىنان دالانىڭ, تۋعان جەردىڭ بەينەسىن ۇمىتپاعانىن بايقاپ قالاسىز. مىسالى, ۋفادا تۇراتىن ۆيتالي شاپوۆالوۆ شىعارماسىندا نەگىزىنەن قوشقار مۇيىزگە كوبىرەك سۇيەنەدى. بۇل سۋرەتشىنىڭ تۋعان جەرگە دەگەن ساعىنىشىن قىلقالام ارقىلى جەتكىزۋى جانە تاريح تەرەڭىندەگى ءتۇبىمىزدىڭ ءبىر ەكەنىن مەڭزەيدى, – دەيدى وسى تۇلەكتەردى تاربيەلەگەن بەلگىلى ونەرتانۋشى ماريا جۇماعۇلوۆا.
كورمەنى قوستانايلىقتار بىرنەشە كۇن تاماشالادى. ال ارقالىق پەداگوگيكا ينستيتۋتىنان قاناتتانىپ ۇشقان رەسەيلىك سۋرەتشىلەر مەن جەرگىلىكتى قىلقالام شەبەرلەرى شىعارماشىلىق كەزدەسۋ وتكىزىپ, ءوزارا وي ءبولىستى.
ءنازيرا جارىمبەتوۆا,
«ەگەمەن قازاقستان».
قوستاناي.