ۋكرايناداعى ەڭ سوڭعى باستى جاڭالىق – دونەتسك مەن لۋگانسك وبلىستارىنداعى رەفەرەندۋم بويىنشا دا ەكى جاقتان بارىنشا قاراما-قايشى اقپاراتتار ءتۇسىپ جاتىر.
ەستەرىڭىزگە سالا كەتەيىك, ۋكراينانىڭ وڭتۇستىك-شىعىسىندا ورنالاسقان وسى ەكى وبلىس ەلدىڭ ورتالىق بيلىگىن مويىنداماي, دونەتسك حالىق رەسپۋبليكاسىن جاريالاعان ەدى. ەندى وزدەرىنىڭ سول شەشىمدەرىن رەفەرەندۋم ارقىلى حالىقتىڭ قولداۋىمەن بەكىتتى. جەكسەنبى كۇنى وسى رەفەرەندۋمنىڭ داۋىس بەرۋ پروتسەسى بولدى.
«ەۋرونيۋس» اقپارات اگەنتتىگىنىڭ حابارىنا قاراعاندا, رەسمي كيەۆ بۇل اكتسيانى سەپاراتيزمنىڭ كورىنىسى دەپ قابىلداپ, رەفەرەندۋمنىڭ قورىتىندىسىن مويىنداۋدان ءۇزىلدى-كەسىلدى باس تارتاتىنىن مالىمدەدى. ۋكراينا پرەزيدەنتى اكىمشىلىگى باسشىسىنىڭ مىندەتىن اتقارۋشى سەرگەي پاشينسكي داۋىس بەرۋ قورىتىندىسىن الەمنىڭ بىردە-ءبىر مەملەكەتى مويىندامايدى دەگەن سەنىم بىلدىرە وتىرىپ, وعان قاتىسقان لاۋازىمدى تۇلعالار جاۋاپقا تارتىلادى دەپ تە مالىمدەگەن. «بۇل – رەفەرەندۋم دەگەنگە ەشقانداي قاتىسى جوق دۇنيە. مۇنى تەرروريستەر, بانديتتەر جانە كىسى ءولتىرۋشى جاۋىزدار ءوز قىلمىستارىن لۋگانسك جانە دونەتسك وبلىستارى تۇرعىندارىنىڭ اتىن جامىلىپ, جاسىرۋعا جاساعان ءساتسىز قادامدارى دەپ ۇعۋ كەرەك», دەي كەلىپ, پاشينسكي ميلليونداعان حالىق تۇراتىن تەرريتوريادا ناعىز رەفەرەندۋم بولۋ ءۇشىن وعان بىرنەشە مىڭ سايلاۋ ۋچاسكەلەرى مەن سايلاۋ كوميسسيالارى ۇيىمداستىرىلۋى كەرەك دەپ سانايتىنىن ايتقان.
ەندى رەسەيلىك اقپارات قۇرالدارىنا ءسوز بەرەيىك.
مۇنداعى كەيبىر باق-تاردىڭ اراسىندا ازداعان سايكەسسىزدىكتەر بولعانىمەن, رەسەيلىك نەگىزگى اقپارات كوزدەرى دونەتسك مەن لۋگانسكىدەگى رەفەرەندۋمنىڭ وتە ءساتتى وتكەنىن جازادى. ماسەلەن, رەسەيلىك «گازەتا رۋ» ينتەرنەت گازەتىنىڭ حابارىنا قاراعاندا, «دونەتسك حالىقتىق رەسپۋبليكاسى» دەپ اتالاتىن ەشكىم تانىماعان قۇرىلىمنىڭ ورتالىق سايلاۋ كوميسسياسىنىڭ مالىمەتىنشە, «دونەتسكىنىڭ مەملەكەتتىك دەربەستىگىن قولداپ سايلاۋشىلاردىڭ 89,7 پايىزى داۋىس بەرگەن» سلاۆيانسك قالاسىنداعى «ءوزىن ءوزى قورعاۋ وكىلىنىڭ ايتۋىنشا, الدىن الا ەسەپتەۋلەرگە قاراعاندا, تەك 10 پايىز سايلاۋشىلار عانا تاۋەلسىزدىككە قارسى, ال 90 پايىزى جاقتاپ داۋىس بەرگەن», دەيدى «گازەتا رۋ». سونىمەن قاتار, ورتالىق سايلاۋ كوميسسياسىنىڭ اتى كورسەتىلمەگەن وكىلىنىڭ ايتۋىنا قاراعاندا, الدىن الا بولجام بويىنشا رەفەرەندۋمعا دونەتسك وبلىسى تۇرعىندارىنىڭ 90 پايىزى قاتىسىپتى.
وسى باق ەۋرووداق ديپلوماتيالىق قىزمەتىنىڭ باسشىسى كەترون ەشتوننىڭ ءباسپاسوز حاتشىسى مايا كوچيانچيچتىڭ مالىمدەۋىنە قاراعاندا, ەۋرووداق بۇل رەفەرەندۋمدى مويىندامايتىنىن جازعان.
رەسەيلىك كەيبىر اقپارات قۇرالدارى, سونىڭ ىشىندە «موسكوۆسكي كومسومولەتس» دونەتسكىدەگى داۋىس بەرۋدىڭ بەلسەندىلىگىن «وچەرەد, كاك نا ماۆزولەي!» دەپ جازعان. وسى باسىلىم ەقىۇ-نىڭ پارلامەنتتىك اسسامبلەياسىنىڭ پرەزيدەنتى رانكو كريۆوكاپيچتىڭ «مۇنداي رەفەرەندۋمسىماقتاردا حالىقتىڭ ەركىن جانە ادىلەتتى داۋىس بەرۋى تۋرالى ويلاۋدىڭ ءوزى ابسۋرد» دەگەن ءسوزىن, اقش مەملەكەتتىك دەپارتامەنتىنىڭ ءباسپاسوز حاتشىسى دجەن پساكيدىڭ ونىڭ قورىتىندىسى ەشقاشان مويىندالمايتىندىعى تۋرالى مالىمدەمەسىن, ءتىپتى, رەسەي پرەزيدەنتى ۆ.ءپۋتيننىڭ رەفەرەندۋمدى كەيىنگە قالدىرا تۇرۋ كەرەكتىگى تۋرالى ايتقانىن كەلتىرە وتىرىپ, سايلاۋشىلاردىڭ بەلسەندىلىگى اۋىز تولتىرىپ ايتارلىقتاي ەكەنىنە تانتىلىگىن بىلدىرەدى. تۇسكە دەيىن-اق وسك توراعاسى ر.لياگيننىڭ مالىمەتى بويىنشا, دونەتسك وبلىسىندا سايلاۋشىلاردىڭ – 30, لۋگانسك وبلىسىندا وسك توراعاسى ا.ءمالىحيننىڭ ايتۋىنا قاراعاندا, سايلاۋشىلاردىڭ 65 پايىزى داۋىس بەرىپ ۇلگەردى, دەپ جازادى باسىلىم.
جاقسىباي سامرات,
«ەگەمەن قازاقستان».