اتىراۋ وبلىسىنا قاراستى جىلىوي اۋدانىنا ۇلى وتان سوعىسىنىڭ ارداگەرى, بەلگىلى مۇنايشى حاسان الداقوۆ ەسىمى كەڭىنەن تانىمال. ول قان مايداننان امان ورالىپ, تالاي قازىنالى كەن ورىندارىن اشۋعا بەلسەنە قاتىسقان ازامات, بار سانالى عۇمىرىن حالقىنا قىزمەت ەتۋگە ارناعان مۇنايشى ەدى.
19 جاسىندا اسكەرگە الىنعان جاس ەلگە ۇلى وتان سوعىسى اياقتالعان سوڭ, ياعني, 1945 جىلدىڭ قاراشاسىندا جەتتى. ارداگەردىڭ مايدان جولىنا كوز جۇگىرتسەك, قاتارداعى جاۋىنگەردەن لەنينگراد پەن كارەل مايداندارىندا بولىمشە كومانديرىنە دەيىن كوتەرىلگەن. ال 1945 جىلى ومبى قالاسىندا وفيتسەرلەر كۋرسىن تامامداعان.
زۇلمات جىلداردان سوڭ ەل ەكونوميكاسى تۇرالاپ قالسا دا, بەيبىت ومىرمەن قاۋىشقان ەلدىڭ قۋانىشىندا شەك بولمادى. الايدا, ەتىگىمەن قان كەشىپ كەلگەن ساربازداردى, ەلدە دە جەڭىل تۇرمىس كۇتىپ تۇرمادى. جاۋىر ارقالار تاعى دا اۋىر ەڭبەكتەن قايىسا ءتۇستى. مايداننىڭ لوكوموتيۆى بولعان دوسسور مەن جىلىويدىڭ مۇنايى سوعىستان كەيىن دە بارشا وداقتاس ەلدىڭ ەكونوميكاسىن كوتەردى. حاسان جاۋىلباي ۇلى ەلگە كەلگەن سوڭ, اتاكاسىبىمەن قايتا تابىستى. ءسويتىپ, باستاپقىدا ەكى جىلداي «ەمبىمۇنايگاز» بىرلەستىگى قۇلسارى مۇناي كاسىپشىلىگىندە تەحنيك قىزمەتىن اتقاردى. 1948 جىلى ماسكەۋدەگى گۋبكين اتىنداعى مۇناي ينستيتۋتىنا ءتۇسىپ, ونى 1953 جىلى ويداعىداي ءبىتىرىپ شىقتى.
ءسويتىپ, قولىنا ديپلومىن العان جاس مامان تەوريالىق ءبىلىمىن كەن ورىندارىندا تاجىريبەمەن ۇشتاستىرۋعا كىرىستى. جىلىوي مەن ماقات اۋداندارىنداعى كەنىشتەردە الدىمەن بۇرعىشىنىڭ كومەكشىسى, بۇرعىشى شەبەر, كەيىن ينجەنەر جانە ءبولىم باستىعى بولادى. «قازاقستانمۇنايبارلاۋ» بۇرعىلاۋ شەبەرى قىزمەتىن اتقاردى. «ماڭعىستاۋمۇنايگازبارلاۋ» ترەسىندە تۇبەجەك, جەتىباي كەنىشتەرىن يگەرىپ, تەر توكتى. ال, 1965-1975 جىلدارى وزەن بۇرعىلاۋ باسقارماسىندا ۋچاسكە باستىعى, ينجەنەرلىك-تەحنولوگيالىق ورتالىقتا اۋىسىم جەتەكشىسى مىندەتتەرىن دە اتقاردى.
ۇلى وتان سوعىسى مەن بەيبىت تىرلىكتە العان ماراپاتتارى ازاماتتىڭ ايشىقتى تۇلعاسىن ودان ءارى ايقىنداي ءتۇستى. حاسان الداقوۆ قازاق كسر جوعارعى كەڭەسىنىڭ قۇرمەت گراموتاسىن العان. ونىڭ ومىراۋىندا «قىزىل جۇلدىز» وردەنى, «ەرلىگى ءۇشىن» مەدالدارى جارقىرادى. بايىرعى مايدانگەر, بىلىكتى مۇنايشى 1981 جىلدىڭ قاراشاسىندا ومىردەن ءوتتى. ەسىمى «قازاقستان مۇناي ەنتسيكلوپەدياسى» كىتابىنا ەندى. ۇرپاقتارىنىڭ ەندىگى ارمانى – ەلىم, جەرىم دەپ وتكەن اكەلەرىنىڭ ەسىمىن اسقاقتاتۋ.
وسى ورايدا, حاسان الداقوۆتىڭ اتىنا ءوزىنىڭ تۋعان جەرى جىلىوي وڭىرىنەن كوشە بەرىلۋىنە جەرگىلىكتى ءماسليحات ىقپال ەتسە, دەيدى ولار.
الماس ماناپ,
«ەگەمەن قازاقستان».