ەلىمىزدە قامكوڭىل جاندارعا جاسالىپ جاتقان يگى شارالار جەتەرلىك. سونىڭ ءبىرى جۋىردا استاناداعى «بالالار ءۇيى» مەكەمەسىندە ءوتتى. قازاقستان تەمىر جولى ۇلتتىق كومپانياسىنىڭ ەنشىلەس كاسىپورنى «اسكەريلەندىرىلگەن تەمىر جول كۇزەتى» اق ۇجىمى اتالعان بالالار ءۇيىنىڭ تاربيەلەنۋشىسى اناستاسيا زۋبوۆانى قوعام قامقورلىعىنا الىپ, وعان 530 مىڭ تەڭگەلىك سەرتيفيكاتتى تابىس ەتتى. ءبۇلدىرشىننىڭ بانكتەگى ارنايى اشىلعان ەسەپ شوتىنا ول ون سەگىز جاسقا تولعانشا جىل سايىن وسىنداي قارجى اۋدارىلىپ تۇرماق. بۇل ونىڭ بولاشاقتا جوعارى وقۋ ورنىنا ءتۇسىپ, بىلىكتى مامان بولۋى ءۇشىن جاسالىپ جاتقان يگىلىكتى شارا بولماق.
«ەلباسى نۇرسۇلتان نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى ەل حالقىنا جولداۋى اياسىندا «اسكەريلەندىرىلگەن تەمىر جول كۇزەتى» اق باسشىلىعى مەن قىزمەتكەرلەرىنىڭ قاتىسۋىمەن وتكەن كەڭەستە الەۋمەتتىك احۋالى تومەن, ءومىردىڭ قادامىن بالالار ۇيىندە باستاپ, اتا-انا جىلۋىن كورمەي ءوسىپ كەلە جاتقان جاسوسپىرىمدەردى قوعام قاراماعىنا الۋ, سونىمەن قاتار, ولاردى جوعارى ءبىلىم بەرۋ مەكەمەلەرىندە وقىتۋ ءۇشىن قاراجات جيناستىرىپ, بولاشاقتا جۇمىسقا ورنالاسۋعا بارىنشا اتسالىسۋدى جۇزەگە اسىرۋ ماقساتىندا ۇجىمدىق شەشىم قابىلدانعان-دى. بۇگىنگى تاڭدا وسى ۇجىمدىق شەشىمىمىزدى ىسكە اسىرۋدا وسكەمەن قالاسىنداعى بالار ءۇيىنىڭ ەكى ءجاسوسپىرىمى مەن قاراعاندى قالاسىنداعى بالالار ءۇيىنىڭ ءبىر بالاسى قوعام ۇجىمىنىڭ پاتروناتتىق قاراماعىنا الىندى. بۇيىرتسا جاقىن ارادا وزگە دە قالالاردا ورنالاسقان بالالار ءۇيىندەگى حالقىمىزدىڭ جاسوسپىرىمدەرىنە قولداۋ كورسەتۋدى نيەت ەتۋدەمىز», – دەيدى شارادا ءسوز العان «اسكەريلەندىرىلگەن تەمىر جول كۇزەتى» اق-تىڭ ەكونوميكا جانە قارجى جونىندەگى ۆيتسە-پرەزيدەنتى نۇرجان داۋلەتباەۆ. سونداي-اق, بۇگىنگى سەرتيفيكات يەسى ا.زۋبوۆا ءوزىنە جاسالعان قامقورلىققا شەكسىز ريزا ەكەندىگىن ايتىپ, بولاشاقتا ەلىمىزدىڭ ءبىلىمدى ازاماتى بولۋ ءۇشىن بارىن سالاتىندىعىن جەتكىزدى.
سالتاناتتى شارا ارنايى كونتسەرتتىك باعدارلامامەن ءوز جالعاسىن تاۋىپ, جيىلعان جۇرتقا ەرەكشە كوڭىل-كۇي سىيلادى.
ءابدىراحمان قىدىربەك,
«ەگەمەن قازاقستان».