نۇر-سۇلتاندا ۇستەل تەننيسىنەن اشىق رەسپۋبليكالىق تۋرنير ءوتتى. كونستيتۋتسيا كۇنىنە وراي ۇيىمداستىرىلعان جارىستا ەلىمىزدىڭ ەڭ بەلدى ويىنشىلارىنىڭ ءبىرازى قاتىستى.
ەرلەر باسەكەسىندە 22 جاستاعى داستان كەنجەعۇلوۆتىڭ اسقان شەبەرلىگىنە ءتانتى بولدىق. ەلىمىزدىڭ ەڭ ۇزدىك ۇستەل تەننيسشىلەرىنىڭ رەيتينگىندە ءتورتىنشى ورىندا تۇرعان ورالدىق ورەن بارلىق قارسىلاسىن قاپى قالدىرىپ, باس جۇلدەنى ولجالادى. فينالدا ول 20 جاسار شىمكەنتتىك يريسبەك ارتۋكمەتوۆتەن ايلاسىن اسىردى. قاراعاندىلىق ۆلاديسلاۆ زاحاروۆ قولا مەدالدى موينىنا ءىلدى. ايەلدەر اراسىندا شىمكەنت قالاسىنان كەلگەن 17 جاسار دارىندى سپورتشى سارۆينوز ميركاديروۆانىڭ مەرەيى ۇستەم بولدى. قازاقستاننىڭ ەكىنشى راكەتكاسى اقتىق سىندا ەكىباستۇزدىق انگەلينا رومانوۆسكايادان باسىم ءتۇستى. ءۇشىنشى ورىنعا قاراعاندىنىڭ وكىلى جانەركە كوشكىمباەۆا تابان تىرەدى.
سونىمەن قاتار تيموفەي گەراسيمەنكو, دانيال قاناتباەۆ, ۆالەري فادەەۆ, الەكساندرا سميرنوۆا جانە مارات اسقاروۆ ءتۇرلى اتالىمدار بويىنشا ارنايى سىيلىقتارعا يە بولدى.