تەننيستەن نيۋ-يوركتە ءوتىپ جاتقان اقش-تىڭ اشىق بىرىنشىلىگىنىڭ العاشقى اينالىمى ارتتا قالدى. بۇل جارىستىڭ جەكەلەگەن سايىسىندا قازاقستاننىڭ ءۇش وكىلى ونەر كورسەتكەن ەدى. وكىنىشكە قاراي, ەلىمىزدىڭ ەڭ اتاقتى ويىنشىسى ەلەنا رىباكينا تۇساۋكەسەر كەزدەسۋىندە ءسۇرىندى. ال يۋليا پۋتينتسەۆا مەن الەكساندر بۋبليك كەلەسى كەزەڭگە ءوتتى.
الەمدىك رەيتينگتە 22-ورىندا تۇرعان ەلەنا رىباكينا ىرىكتەۋ تۋرنيرىندە جەڭىمپاز اتانعان 21 جاستاعى فرانتسيانىڭ جاس دارىنى كلارا بيۋرەلمەن شەبەرلىك بايقاستى. جەرلەسىمىزدىڭ بۇل كەزدەسۋدە جەڭىسكە جەتەتىنىنە ەشكىمنىڭ كۇمانى بولعان جوق ەدى. الايدا سول كۇنى كلارا وتە كەرەمەت ويناپ, ەلەنانى جەر سيپاتىپ كەتتى. ءبىر جارىم ساعاتقا سوزىلعان سايىس 4:6, 4:6 ەسەبىمەن اياقتالدى.
WTA تىزىمىندە 37-ورىندا تۇرعان يۋليا پۋتينتسەۆا تۇساۋكەسەر كەزدەسۋىن سول كۇنى, ياعني 31 تامىزدا 21 جاسقا تولعان اماندا انيسيموۆامەن وتكىزدى. ءوزىنىڭ جاستىعىنا قاراماستان اقش تەننيسشىسى وسى كۇنگە دەيىن ءبىراز بەلەستى باعىندىرىپ تا ۇلگەرگەن. اتاپ ايتساق, ول 2019 جىلى رولان گارروستىڭ جارتىلاي فينالىنا دەيىن جەتىپ, بيىل ۋيمبلدوننىڭ شيرەك فينالىندا ونەر كورسەتتى. الەمدىك رەيتينگتە 20-ورىنعا جايعاسقان اماندا WTA تۋرنيرلەرىن ەكى رەت ۇتىپ, باسقا دا ءدۇبىرلى دودالاردا ءوزىنىڭ ايشىقتى ونەرىمەن كوزگە ءتۇستى. دەسەك تە بۇل تارتىستا يۋليا بارىن سالىپ, جەڭىستى قارسىلاسىنىڭ ۋىسىنان ج ۇلىپ اكەتتى. ەسەپ – 6:3, 6:3. ەندى پۋتينتسەۆا گەرمانيالىق يۋلە نيمايەرمەن كەزدەسەدى.
25 جاستاعى الەكساندر بۋبليك جاستار بۋىنىنىڭ وكىلى يۋگو گاستونمەن كۇش سىناستى. 26 قىركۇيەكتە 22 جاسقا تولعالى وتىرعان قارسىلاسى اتر رەيتينگىندە 71-ورىنعا تۇراقتاعان. وسىدان ءتورت جىل بۇرىن جاسوسپىرىمدەردىڭ دۇنيەجۇزىلىك وليمپياداسىندا جەڭىس تۇعىرىنىڭ ەڭ بيىك ساتىسىنا كوتەرىلگەن فرانتسيانىڭ ورەنى 2020 جىلى رولان گارروستىڭ ءتورتىنشى كەزەڭىنە شىعىپ, كوپشىلىك نازارىن وزىنە اۋدارعان ەدى. بۇل باسەكەدە جەرلەسىمىزدىڭ مىقتىلىعى ەش كۇمان تۋعىزعان جوق. 1 ساعات 46 مينۋتقا سوزىلعان ويىن 6:4, 6:4, 6:4 ەسەبىمەن اياقتالدى. ەكىنشى كەزەڭدە بۋبليك يسپانيالىق پابلو كاررەنو بۋستامەن وينايدى.
ءبىر ايتا كەتەرلىگى, بيىلعى US open تۋرنيرىنە الەمگە ايگىلى تەننيسشىلەردىڭ ءبىرازى قاتىسپادى. ونىڭ وزىندىك سەبەپتەرى دە بار. ماسەلەن, الەمنىڭ ەكىنشى راكەتكاسى, گەرمانيالىق الەكساندر زۆەرەۆ نيۋ-يورككە جاراقاتىنا بايلانىستى كەلمەدى. داڭقى جەر جارعان شۆەيتساريانىڭ ماقتانىشى رودجەر فەدەرەر ءالى دە ەم-دوم قابىلداپ جاتقان كورىنەدى. اتر تىزىمىندە التىنشى ورىندا تۇرعان سەربيانىڭ ساڭلاعى نوۆاك دجوكوۆيچ كوروناۆيرۋستان ۆاكتسيناتسيا الۋدان باس تارتقانى ءۇشىن تاعى ءبىر ءدۇبىرلى دودادان شەت قالدى. ايەلدەر اراسىندا انجەليكا كەربەردى كورتتان كورمەيمىز. نەمىستىڭ اتاقتى ويىنشىسى دەكرەتتىك دەمالىستا.
اتالعان تۋرنير باستالعان بەتتە بىرقاتار سەنساتسيالىق ناتيجە تىركەلگەنىن دە اتاپ وتكەنىمىز ءجون. الەمنىڭ كەزىندەگى ءبىرىنشى راكەتكاسى, رۋمىنيالىق سيمونا حالەپ 20 جاستاعى ۋكراينالىق داريا سنيگۋرگە جول بەرسە, رەسەيدىڭ مىقتىسى داريا كاساتكينا ەسىمى كوپشىلىككە بەيمالىم ۇلىبريتانيالىق حەرريەت دارتتان ۇتىلدى. ال گرەكيانىڭ ماقتانىشى ستەفانوس تسيتسيپاس كولۋمبيالىق دانيەل-ەلاي گالانعا ەسە جىبەردى. ە.رىباكينا دا سولاردىڭ كەبىن كيدى.