بۇل تۋرالى اقوردانىڭ رەسمي سايتى ءمالىم ەتتى, دەپ حابارلايدى Egemen.kz.
مەملەكەت باسشىسىنىڭ جارلىعىمەن ومىرزاق ەستاي ۇلى شوكەەۆ تۇركىستان وبلىسىنىڭ اكىمى لاۋازىمىنان بوساتىلدى. پرەزيدەنت ايماق باسشىسى قىزمەتىندەگى كوپ جىلعى جۇمىسى ءۇشىن العىس ايتتى.
تۇركىستاندا ۇكىمەت باسشىسى ءاليحان سمايىلوۆتىڭ قاتىسۋىمەن وبلىستىق ءماسليحات دەپۋتاتتارىنىڭ بىرلەسكەن سەسسياسى ءوتتى. وبلىس اكىمى قىزمەتىنە قوس بىردەي كانديدات ۇسىنىلدى. ونىڭ ءبىرى قازاقستان رەسپۋبليكاسىنىڭ وزبەكستان رەسپۋبليكاسىنداعى توتەنشە جانە وكىلەتتى ەلشىسى دارحان ساتىبالدى بولسا, ەكىنشىسى سايرام اۋدانىنىڭ اكىمى ۇلاسبەك سادىبەكوۆ.
دەپۋتاتتاردىڭ باسىم بولىگى دارحان ساتىبالدىنىڭ كانديداتۋراسىن قولداپ داۋىس بەردى. بۇگىن مەملەكەت باسشىسىنىڭ ءتيىستى جارلىعى جاريالاندى.
«دارحان امانگەلدى ۇلى ساتىبالدى تۇركىستان وبلىسىنىڭ اكىمى بولىپ تاعايىندالسىن, ول قازاقستان رەسپۋبليكاسىنىڭ وزبەكستان رەسپۋبليكاسىنداعى توتەنشە جانە وكىلەتتى ەلشىسى لاۋازىمىنان بوساتىلسىن», دەلىنگەن حابارلامادا.
دارحان امانگەلدى ۇلى 1974 جىلى سارىاعاش اۋدانىندا دۇنيەگە كەلگەن.
س.سەيفۋللين اتىنداعى اقمولا اۋىل شارۋاشىلىق ينستيتۋتىن, قازاق گۋمانيتارلىق-زاڭ ۋنيۆەرسيتەتىن بىتىرگەن.
بۇعان دەيىن شىمكەنت قالاسىنىڭ اكىمى, وڭتۇستىك قازاقستان وبلىسى اكىمىنىڭ ءبىرىنشى ورىنباسارى, قر پرەمەر-ءمينيسترى كەڭسەسى ءبولىم مەڭگەرۋشىسىنىڭ ورىنباسارى بولىپ قىزمەت اتقاردى.
قازاقستان رەسپۋبليكاسى پارلامەنتى سەناتىنىڭ دەپۋتاتى بولىپ شىمكەنتتەن سايلانعان.
2019 جىلدان بەرى قازاقستان رەسپۋبليكاسىنىڭ وزبەكستان رەسپۋبليكاسىنداعى توتەنشە جانە وكىلەتتى ەلشىسى بولىپ قىزمەت ەتتى.
ايتا كەتەيىك, بۇعان دەيىن تۇركىستان وبلىسىنىڭ اكىمى ومىرزاق شوكەەۆ وتستاۆكاعا ءوتىنىش بەرگەن بولاتىن.