ەلوردا ىرگەسىندەگى «Astana Target club» سپورتتىق كەشەنىندە ستەند اتۋدان قازاقستان رەسپۋبليكاسى كۋبوگىنىڭ ءىىى كەزەڭى مەن نۇر-سۇلتان قالاسىنىڭ اشىق چەمپيوناتى باستالدى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
جارىسقا ەلىمىزدىڭ تۇكپىر-تۇكپىرىنەن ياعني, نۇر-سۇلتان, الماتى جانە شىمكەنت قالالارىنان, سونىمەن قاتار الماتى, قىزىلوردا, پاۆلودار وبلىستارىنان 100-دەن اسا سۇرمەرگەن قاتىسىپ جاتىر.
جارىستىڭ اشىلۋ سالتاناتىنا نۇر-سۇلتان قالاسىنىڭ اكىمى التاي كولگىنوۆ, قازاقستان سپورتتىق اتۋ فەدەراتسياسىنىڭ پرەزيدەنتى بەرىك اسىلوۆ جانە قازاقستان سپورتتىق اتۋ فەدەراتسياسىنىڭ باس حاتشىسى ولەگ پوچيۆالوۆ قاتىسىپ, سپورتشىلارعا ساتتىلىك تىلەدى.
جارىستىڭ اشىلۋ سالتاناتىندا العاش بولىپ ءسوز العان اسىلوۆ الدىمەن قاتىسۋشىلاردى قۇتتىقتاپ, ستەند اتۋدان قازاقستان رەسپۋبليكاسى كۋبوگىنىڭ ءىىى كەزەڭى مەن نۇر-سۇلتان قالاسىنىڭ اشىق چەمپيوناتى اشىق دەپ جاريالادى.
بۇل جارىستا ازيا ويىندارى, ازيا چەمپيوناتتارى مەن «ازيا بالالارى» حالىقارالىق سپورتتىق ويىندارىنىڭ چەمپيوندارى مەن جۇلدەگەرلەرى ءوز شەبەرلىكتەرىن كورسەتۋدە. اتالعان جارىسقا قۇرلىقتىق جانە الەمدىك دودالاردا توپ جارىپ جۇرگەن ەلوردالىق سپورتشىلار دا قاتىسىپ جاتىر.
ء«بىر قۋانارلىعى – ەلورداداعى اتۋ الاڭى قايتا جاندانىپ, ايتۋلى الامانداردى قابىلداي باستادى. ويتكەنى, ەكسپو كورمەسىنەن كەيىن 4 جىلداي تۇرالاپ قالىپ ەدى. قازىر بۇنداعى جاعداي جاقسى. سپورتشىلارعا وتە قولايلى. ءبىز وسى باسەكەلەر ناتيجەسىندە ەل ۇزدىكتەرىن ىرىكتەپ, بىرلەسكەن جاتتىعۋ جيىندارىن وتكىزەمىز. ودان كەيىن ءدال وسى سپورتشىلار حالىقارالىق جارىستاردا ەل نامىسىن قورعايدى», دەيدى قازاقستان سپورتتىق اتۋ فەدەراتسياسىنىڭ باس حاتشىسى ولەگ پوچيۆالوۆ.
ايتا كەتۋ كەرەك, بايراقتى باسەكە 4 كەزەڭنەن تۇرادى. بۇل جولى جارىسقا قاتىسۋشىلار ستەند اتۋدىڭ سكيت جانە سپورتينگ تۇرلەرى بويىنشا ءوزارا مىقتىنى انىقتايدى.
كەيىن ەل ۇزدىكتەرى قاراشا ايىندا تاعى دا باس قوسىپ, قازاقستان كۋبوگىنىڭ شەشۋشى, ياعني, ءتورتىنشى كەزەڭىندە باقتارىن سىنايدى.
وسى جارىستار قورىتىندىسى بويىنشا ۇلتتىق قۇراما جاساقتالىپ, حورۆاتيادا وتەتىن ليتسەنزيالىق الەم چەمپيوناتىنا قاتىسۋعا مۇمكىندىك الادى.
جارىستىڭ جالپى قورىتىندىسى 29 تامىزدا شىعادى.