ەلوردا كوشەلەرىن جاڭا مۋرالدار كوركەيتتى

قالانىڭ ءارتۇرلى اۋداندارىندا بەلگىلى وتاندىق قايراتكەرلەرگە ارنالعان جاڭا مۋرالدار اشىلدى. ماسەلەن, قوعام جانە مەملەكەت قايراتكەرى, «الاش» ۇلتتىق-دەموكراتيالىق پارتياسىنىڭ كوشباسشىسى, عالىم جانە پۋبليتسيست ءاليحان بوكەيحان ۇلىنىڭ بەينەسى تاۋەلسىزدىك داڭعىلىندا, دالىرەك ايتساق, الماتى اۋدانى, تاۋەلسىزدىك داڭعىلى, 38 ءۇيدىڭ قابىرعاسىندا بەينەلەندى.

جەلتوقسان كوشەسى, 27 مەكەنجايىنداعى ءۇيدىڭ قابىرعاسىنا ۇلى وتان سوعىسى جىلدارىندا ەرلىگىمەن, باتىرلىعىمەن, مەرگەندىگىمەن ەستە قالعان ءاليا مولداعۇلوۆانىڭ قۇرمەتىنە مۋرال پايدا بولدى.

روزا باعلانوۆانىڭ 100 جىلدىق مەرەيتويىنا وراي م.جۇماباەۆ كوشەسىندەگى ءۇيدىڭ قاسبەتىنە انشىگە ارنالعان مۋرال سالىندى.

ج.جيرەنتاەۆ كوشەسى, 2 مەكەنجايىنداعى ءۇيدىڭ قاسبەتىنە بەلىگىل كومپوزيتور, ءانۇران اۆتورى ءشامشى قالداياقوۆتىڭ قۇرمەتىنە مۋرال سالىندى.

قارامەندە بي شاقا ۇلى كوشەسى, 1 مەكەنجايىنداعى ءۇيدىڭ قاسبەتىنە حالىق ءارتىسى, اتى اڭىزعا اينالعان وپەرا ءانشىسى ەرمەك سەركەباەۆتىڭ بەينەسى بەينەلەنگەن.

سونداي-اق بەيبىتشىلىك كوشەسى, 62 – «كۇن سونبەسىن», باراەۆ كوشەسى, 17 – «جەتى قازىنا», بەيبىتشىلىك كوشەسى, 52 – «سىرماق», مامبەتوۆ كوشەسى, 30 – «قالا تۇرعىندارى», سارىارقا داڭعىلى, 42 – «بۇگىن اناڭا حابارلاستىڭ با؟», ع. مۇسىرەپوۆ كوشەسى, 7 – «Pease» جانە باسقا دا كوشەلەردە جاڭا سۋرەتتەر پايدا بولدى.

ء«بىز قالامىزدا كوشە ونەرىن ءارتاراپتاندىرۋ ءۇشىن جۇمىس ىستەپ جاتىرمىز. مۋرالدار قالانى جاندى, قىزىقتى جانە كوڭىلدى ەتەدى. مۋرال – اشىق اسپان استىنداعى گالەرەيا. بۇل وتە ماڭىزدى. نەگىزىنەن ونەردە جانە شىعارماشىلىقتا ءوز ءىزىن قالدىرعان باتىلدىق پەن ەرلىك كورسەتكەن تانىمال قايراتكەرلەرىمىزگە ارنايمىز. وسكەلەڭ ۇرپاق, جاستار باتىرلارىمىزدى ءبىلۋى جانە قۇرمەتتەۋى كەرەك. سونداي-اق, جوسپارىمىزدا عىلىمعا ولشەۋسىز ۇلەس قوسقان سالىق زيمانوۆتىڭ, اعارتۋشى ۇستاز ىبىراي ءالتىنساريننىڭ, عالىم احمەت بايتۇرسىنوۆتىڭ, گەولوگ-عالىم قانىش ساتباەۆتىڭ, جازۋشى ءابىش كەكىلباەۆتىڭ, ءانشى ءارى كومپوزيتور باتىرحان شۇكەنوۆتىڭ, مانەرلەپ سىرعاناۋشى دەنيس تەننىڭ جانە ت.ب. قۇرمەتىنە مۇرالدى تۇرعىزۋ جوسپاردا بار», دەدى ەلوردا اكىمدىگى ۋربانيستيكا ورتالىعىنىڭ باسشىسى ەلنار بازىكەن.