قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ بريفينگىندە رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعىنىڭ ديرەكتورى جانە قر دەنساۋلىق ساقتاۋ مينيسترلىگىنىڭ شتاتتان تىس باس پسيحياتر-ناركولوگى قۋانىش التىنبەكوۆ قازاقستاندا پسيحيكالىق دەنساۋلىق قىزمەتىنىڭ بايلانىس ورتالىعىن قۇرۋ بويىنشا جۇمىس جۇرگىزىلىپ جاتقانىن حابارلادى, دەپ جازادى Egemen.kz. دەنساۋلىق ساقتاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
مينيسترلىك مالىمەتىنشە, مەديتسينالىق-الەۋمەتتىك كومەككە مۇقتاج قازاقستاندىقتارعا كونسۋلتاتسيالىق, پسيحولوگيالىق قولداۋ كورسەتۋ ماقساتىندا بىرىڭعاي call-ورتالىق ىسكە قوسىلادى.
«حالىق تولىق اقپاراتقا يە بولماعاندىقتان, وڭالتۋ بولىمشەلەرى جۇمىس ىستەيتىن جەردە كومەكتى قالاي الۋعا بولادى, بۇل بولىمشەلەرگە قالاي كىرۋگە بولادى دەگەن سۇراقتارعا جاۋاپتى وسى call-ورتالىعىنان الا الادى. اتالعان call-ورتالىق ەلىمىزدىڭ بارلىق پسيحيكالىق دەنساۋلىق ورتالىقتارىن بىرىكتىرەدى», دەيدى رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعىنىڭ باسشىسى.
بىرىڭعاي call-ورتالىق بارلىق اقپاراتتى بىرىكتىرىپ, ازاماتتارعا ءتيىستى كومەك الۋعا كومەكتەسەدى.