بىزدەن دە چەمپيوندار شىعادى

التىن بەلبەۋ ءۇشىن تارتىس اياقتالعان بەتتە ءدال وسى سالماقتا كۇش سىناسىپ جۇرگەن قازاقتىڭ ماقتان تۇتار ازاماتى شاۆقات راحمونوۆ ءوزىنىڭ ينستاگرامىندا «وكتاگونعا شىققان سپورتشىلاردىڭ ەكەۋى دە ناعىز چەمپيونعا ءتان جەكپە-جەك وتكىزدى. لەوندى جەڭىسىمەن قۇتتىقتايمىن. ينشاللا, كەلەسى جىلى ءدال وسى بەلبەۋ ءۇشىن مەن دە تالاسامىن. چەمپيوندىق اتاقتى جاڭا بۋىننىڭ وكىلدەرى يەلەنە باستاعانى مەنى قاتتى قۋانتادى», دەگەن جازبا قالدىردى.

ءيا, سول كۇندى بارشا الاش جۇرتى تاعاتسىزدانا كۇتۋدە. ويتكەنى ءالى قازاقستاننىڭ بىردە-ءبىر ورەنى الەمدەگى ەڭ بەلدى پروموۋشەننىڭ چەمپيوندىق بەلبەۋى ءۇشىن تالاسقان ەمەس. ءتىپتى ۇزدىكتەر ساناتىنا ەنۋدىڭ ءوزى مۇمكىن بولماي تۇر. ازىرگە ەڭ ۇزدىك كورسەتكىش ءدال وسى 27 جاستاعى شاۆقات راحمونوۆقا تيەسىلى. بارلىق 16 كەزدەسۋىندە ايقىن جەڭىسكە قول جەتكىزگەن ول 11-ورىندى يەلەنۋدە. جارتىلاي ورتا سالماقتىڭ جاڭا چەمپيونى – لەون ەدۆارس. سونداي-اق كامارۋ ۋسمان (اقش), كولبي كوۆينگتون (اقش), حامزات چيماەۆ (شۆەتسيا), گيلبەرت بەرنس (برازيليا), بەلال مۋحامماد (اقش), ستيۆ تومپسون (اقش), شون برەدي (اقش), دجەفف نيل (اقش), حورحە ماسۆيدال (اقش) جانە ۆيسەنتە لۋكە (برازيليا) قانداسىمىزدىڭ الدىن وراپ تۇر. سولاردىڭ ءبىر-ەكەۋىن جاقسىلاپ تۇرىپ ساباسا, شاۆقاتقا دا چەمپيوندىق ءتاج ءۇشىن تالاسۋعا مۇمكىندىك بەرىلەتىنى انىق.

25 كەزدەسۋىنىڭ 24-ىندە (13 نوكاۋت) جەڭىس تويىن تويلاعان دامير يسماعۇلوۆ جەڭىل سالماقتىلاردىڭ رەيتينگىندە 15-ورىندى ەنشىلەۋدە. ورىنبور وبلىسىندا تۋىپ-وسكەن 31 جاستاعى قازاقتىڭ قايسار ۇلىنىڭ دا الەۋەتى جوعارى باعالانۋدا. ءار جارىستا دامير ورتاعا رەسەيمەن قاتار, قازاقستاننىڭ دا تۋىن ۇستاپ شىعادى. بۇل سالماقتا چەمپيو­ن جوق. دەسەك تە رەيتينگتە برازيليالىق چارلز وليۆەيرا كوش باستاپ تۇر. 23 قازاندا ول ءوز اتاعىن قورعاپ قالۋ ءۇشىن داعىستاندىق يسلام ماحاچەۆپەن كۇش سىناسادى.

سونداي-اق ۇزدىكتەر تىزىمىندە امەريكالىق داستين پورە, دجاستين گەتجي, مايكل چەندلەر جانە بەنەيل داريۋش سىندى دۇلدۇلدەر بار. ءدال وسى سالماقتا رافاەل فيزيەۆ 7-ساتىعا تابان تىرەپ تۇر. 29 جاستاعى سپورتشى ازەربايجاننىڭ تۋى استىندا اتوي سالىپ جۇرگەنىمەن, ونىڭ قازاقستاندا تۋىپ-وسكەنىن جانكۇيەرلەر جاقسى بىلەدى. جامبىل وبلىسىنداعى قورداي اۋدانىنىڭ تۋماسى 13 كەزدەسۋدىڭ تەك بىرەۋىندە عانا جەڭىلىستىڭ كەرمەك ءدامىن تاتتى.

وكىنىشكە قاراي, وزگە جەرلەستەرىمىز ازىرگە توپ-15 فايتەرلەردىڭ قاتارىنا قوسىلا الماي وتىر. وسى ورايدا ءبىزدىڭ سپورتشىلاردىڭ UFC-دە ونەر كورسەتىپ جۇرگەندەرىنە ەكى جىلدان ەندى عانا اسقانىن ەسكەرگەن ءجون. سول سەبەپتى دە الداعى ۋاقىتتا قازاقستاننىڭ ورەندەرى ءدۇبىرلى دودالاردىڭ تالايىندا دارالاناتىنىنا ەش كۇمانىمىز جوق.