دجيۋ-دجيتسۋدان گەرمانيانىڭ گامبۋرگ قالاسىندا وتكەن حالىقارالىق تۋرنيردە قازاقتىڭ قارشىعاداي قىزى دانا تولەۋجان قولا مەدال يەلەنىپ, ءوز جانكۇيەرلەرىن تاعى ءبىر قۋانتتى.
دانا 1999 جىلى الماتى قالاسىندا دۇنيەگە كەلدى. بالا كەزىنەن سالاماتتى ءومىر سالتىن ۇستانىپ, سۋ استىندا ءجۇزۋ سپورتىمەن شۇعىلداندى. بۇل رەتتە ول نەسىبەسىز بولعان جوق. بىرقاتار رەسپۋبليكالىق جانە حالىقارالىق تۋرنيردە جەڭىس تۇعىرىنا كوتەرىلىپ, سپورت شەبەرىنىڭ كۇمىس بەلگىسىن كەۋدەسىنە تاقتى. كەيىننەن دجيۋ-دجيتسۋعا دەن قويدى. ۋاقىت وزا سپورتتىڭ بۇل تۇرىندە دە جاقسى ناتيجەلەر كورسەتە باستادى. ەلىشىلىك جارىستاردا الدىنا جان سالماي, 2019 جىلى بىرىككەن اراب امىرلىكتەرىنىڭ دۋباي قالاسىندا جالاۋى جەلبىرەگەن جاستار اراسىنداعى الەم بىرىنشىلىگىندە كۇش سىناسۋ قۇرمەتىنە يە بولدى. اتالعان باسەكەدە تولەۋجان كۇمىس مەدالدى موينىنا ءىلدى.
دانا تولەۋجان – تەك مىقتى سپورتشى عانا ەمەس, سونىمەن قاتار وقۋ وزاتى. الماتىداعى كيمەپ-ءتى ويداعىداي تامامداعاننان كەيىن يتاليانىڭ استاناسى – ريمدە ورنالاسقان جەر-جاھانداعى ەڭ كونە ۋنيۆەرسيتەتتەردىڭ ءبىرى – لا ساپيەنتسادا كارجىگەر ماماندىعى بويىنشا ماگيستراتۋرانىڭ سوڭعى كۋرسىندا وقىپ ءجۇر, سپورتتان دا قول ۇزگەن جوق. بىرقاتار حالىقارالىق تۋرنيردە ماڭدايى جارقىراعان دانا بيىل دا ءبىراز ولجاعا كەنەلدى. اتاپ ايتساق, ماۋسىم ايىندا يسپانيانىڭ باس شاھارى – مادريدتە ۇيىمداستىرىلعان ءدۇبىرلى دودادا التىننان القا تاقتى.
نەمىس جەرىندە وتكەن جارىستا 30 مەملەكەتتەن كەلگەن 400-دەن اسا سپورتشى باق سىنادى. ولاردىڭ اراسىندا 18-دەگى جالىندى جاستار دا, 50-دەگى ارداگەرلەر دە بولدى. قازاقستاننان جالعىز دانا عانا ونەر كورسەتتى. 55 كيلو سالماقتا كۇش سىناسقان قانداسىمىز باستاپقى باسەكەلەردىڭ بارلىعىندا قارسىلاستارىن قاپى قالدىرىپ, جارتىلاي فينالدا عانا ۇپاي سانىمەن ۇتىلدى. ناتيجەسىندە, دانا تولەۋجان قولا مەدال يەلەندى.