الماتى وبلىسىنا قاراستى تالعار قالاسىندا بوكستان قازاقستاننىڭ ەڭبەك سىڭىرگەن جاتتىقتىرۋشىسى تۇرسىنعالي ەدىلوۆتىڭ جۇلدەسى ءۇشىن وتكەن جاسوسپىرىمدەردىڭ حالىقارالىق ءتۋرنيرى اياقتالدى.
بۇل جارىسقا وزبەكستاننىڭ بىلعارى قولعاپ شەبەرلەرىنىڭ جاقسى دايارلىقپەن كەلگەنى بايقالدى. ءتورت سالماق دارەجەسىنىڭ باس جۇلدەسى وزبەكستاندىق ورەندەرگە بۇيىردى. ولار – اكبارجون رۋستاموۆ (34 كيلو), سەيداحرور ميرزاراحيموۆ (36 كيلو), الياحرور كوديراليەۆ (42 كيلو) جانە احاتبەك ۋرايموۆ (44 كيلو). الماتى وبلىسى وكىلدەرىنىڭ اراسىندا يرزا جاراس (32 كيلو) پەن دانيار ەرگەشكە (46 كيلو) تەڭ كەلەر ەشكىم تابىلمادى. الماتى قالاسىنىڭ جاس ورەندەرى اراسىنان ءاديات باقىتجان (40 كيلو) مەن دانيار اقبيسەنوۆ (48 كيلو) الدىنا جان سالمادى. تاعى ءبىر باس جۇلدە جەتىسۋ وبلىسىنان كەلگەن ايان ابىلعابىلعا (38 كيلو) بۇيىردى.