قازاقستان ۇزدىك بەستىكتىڭ قاتارىندا

جارىستىڭ سوڭعى كۇنى كاراتەدەن +61 كيلو سالماق دارەجەسىندە كۇش سىناسقان سوفيا بەرۋلتسەۆا قازاق ەلىنىڭ ءانۇرانىن شىرقاتتى. توكيو وليمپياداسىنىڭ قولا جۇلدەگەرى جانە دۇنيەجۇزىلىك ويىنداردىڭ جەڭىمپازى دەگەن اتاعى بار جەرلەسىمىز كونيادا باس جۇلدەنى ولجالادى. 61 كيلو سالماقتاعى اسەل قاناي قولاعا قول سوزدى. ول تەك وزبەكستاندىق زۋلحۋمور تۋرسىناليەۆا مەن تۇركيالىق گۋلبانار گەزيۋتوكتان عانا قالىپ قويدى. تاعى ءبىر قولانى تۋنيستىك ۆەفە مانجۋب ەنشىلەدى.

سپورتتىق گيمناسشىلار سايى­سىندا ايدا باۋىرجانوۆا ەركىن جاتتىعۋدا التىن, توماردا كۇمىس جانە بورەنەدە قولا مەدالدى يە­لەندى. وسىعان دەيىن 3 التىن, 1 كۇمىس جانە 1 قولا مەدالدى قور­جىنعا سالعان كيكبوكسشىلار تاعى دا ءوز جانكۇيەرلەرىن قۋانت­تى. بۇل جولى لوۋ-كيكتەن بەرىك ىسقاقوۆ (63,5 كيلو) قارسىلاس شاق كەلتىرمەسە, نۇرداۋلەت قالشورا مەن شارا حامزينا ءۇشىنشى ورىنعا تابان تىرەدى.

جەكەلەگەن سپورتشىلار اراسىنان رەناتا سۇلتانوۆانىڭ اسقان شەبەرلىگىنە ءتانتى بولدىق. 24 جاستاعى ۆەلوشاباندوزىمىز اتال­عان جارىستا ءۇش رەت التىننان القا تاقتى. ول جەكە سايىستا, سكرەتچتە جانە ومنيۋمدا الدىنا جان سالمادى. 50 جانە 100 مەتر­گە باتتەرفلياي ادىسىمەن جۇزگەن ادىلبەك ءمۋسيننىڭ دە مەرەيى ۇستەم بولدى. 400 مەترلىك قاشىقتىقتى 44,94 سەكۋندتا جۇگىرىپ ميحايل ليتۆين قازاقستاننىڭ رەكوردىن جاڭارتتى. اۋىر اتلەتتەر سايى­سىندا ايزادا ءمۇپتىلدا قوس­سايىستىڭ قورىتىندىسى بويىن­شا 266 (116+150) كيلولىق زىل­تە­مىردى ەڭسەرىپ, جەڭىس تۇعى­رى­نىڭ ەڭ بيىك ساتىسىنا كوتەرىلدى. بۇل – يسلاميادانىڭ رەكوردى!

جوعارىدا ەسىمدەرى اتالعان ساڭلاقتاردان بولەك, ءجۇزۋشى سو­فيا ابۋباكىروۆا (50 مەتر, بات­تەرفلياي) مەن ادەلايدا پچە­لينتسەۆا (50 مەتر, براسس), ۆە­لو­ترەكشى الى­شەر جۇماحان (جەكە سايىس) مەن ارتيوم زاحاروۆ (ومنيۋم), گيمناسشىلار ايدا با­ۋىرجانوۆا مەن ەلجانا تانيەۆا, كاراتەشى قاي­سار الپىسباي, زىلتەمىرشى ارلي چونتەي مەن ءزۇل­فيا چين­شانلو, ايەلدەر كۇرەسىنىڭ شەبەرى ەلەنا شالىگينا مەن سپورت­تىڭ كەيبىر تۇرلەرى بويىنشا وتكەن كوماندالىق باسەكەدە وتانداستارىمىز التىن الىپ, بارشا جانكۇيەردى قۋانتتى. سونداي-اق كوماندا قورجىنىن كۇمىس جانە قولا مەدالدارمەن تولتىرعان باسقا دا سپورتشىلارىمىزعا اي­­­تار العىسىمىز شەكسىز. بۇل جا­رىس­تا بارلىعى 125 ورەنىمىز سپورت­­تىڭ 16 ءتۇرى بويىنشا باق سىنادى.

جالپى ەسەپتە تۇركياعا تەڭ كەلەر ەشكىم بولمادى. 341 (145-107+89) جۇلدە ولجالاعان جارىس قوجايىندارى جارىس كەستەسىندە جەكە-دارا كوش باستادى. وز­بەكستان ەكىنشى ورىندى يەلەندى. كورشىلەرىمىز 158 (51+42+65) مەدال ەنشىلەدى. ءۇشىنشى ورىندا – يران. پارسى ەلىنىڭ وكىلدەرى 133 (39+44+50) جۇلدەگە قول جەتكىزدى. ءتورتىنشى ساتىعا جايعاسقان ازەر­بايجاننىڭ قورجىنىندا 99 (29+36+34) جۇلدە بار. بەسىنشى ورىندا – قازاقستان. سونداي-اق توپ-10 كوماندانىڭ قاتارىنا ماروككو (15+13+34), يندونەزيا (13+14+29), باحرەين (9+7+7), قىرعىزستان (8+8+15) جانە الجير (7+12+23) قۇرامالارى ەندى. يسلاميادادا بارلىعى 18 مەملەكەتتىڭ ءانۇرانى شىرقالىپ, 34 ەلدىڭ تۋى كوكتە جەلبىرەدى.

انادولى ەلىندە «قازاقستان قۇراماسى تابىستى ونەر كورسەتتى مە, الدە بۇل ناتيجەگە كوڭىلىمىز تولماي ما؟» دەگەن ساۋالعا جاۋاپ الۋ ءۇشىن بۇعان دەيىنگى جارىس­تاردىڭ ناتيجەلەرىنە زەر سالعان ءجون. يسلام ىنتىماقتاستىعى ويىندارىنىڭ تۇساۋى 2005 جى­لى ساۋد ارابياسىندا كەسىلدى. مەككە, مەدينە, جيددا جانە تايف قالالارىندا ۇيىمداستىرىلعان دودادا جەرلەستەرىمىز 27 (13+8+6) جۇلدە الىپ, جالپى ەسەپتە ءۇشىن­شى ورىندى ولجالادى. ءبىز تەك ساۋديالىقتار مەن مى­سىر­لىقتاردان قالىپ قويدىق. ەكىنشى جارىستىڭ جالاۋى 2009 جىلى يراننىڭ باس شاھارى – تەگەراندا جەلبىرەۋگە ءتيىس ەدى. بىراق ساياسي جاعدايعا بايلانىس­تى وتپەي قالدى. ءۇشىنشى يس­لا­ميادانى يندونەزيانىڭ االەم­بانگ قالاسى قابىلدادى. وڭتۇس­تىك سۋماترا ارالىندا وتكەن ءدۇبىرلى دوداعا قازاقستاندىقتار قاتىسقان جوق. 2017 جىلعى جارىستىڭ شىمىلدىعى ازەربايجاننىڭ اس­تاناسى – باكۋدە ءتۇرىلدى. كاسپي تەڭىزىنىڭ ارعى جاعالاۋىندا وتان­داستارىمىزعا 19 (2+5+12) جۇلدە بۇيىردى. ەكى التىندى دا ءبىز بوكسشىلار سايىسىندا جەڭىپ الدىق. ناتيجەسىندە, 14 ورىنعا تۇ­راقتادىق. مىنە, وسى دەرەك­تەردىڭ وزدەرى-اق بيىلعى يسلام ىن­تىماقتاستىعى ويىندارىندا قا­زاقستان قۇراماسىنىڭ ءساتتى ونەر كورسەتكەنىن انىق اڭعارتىپ تۇر.