كەشە الماتىدا بوكستان تۇركيانىڭ ىستانبۇل قالاسىندا وتكەن ايەلدەر اراسىنداعى الەم چەمپيوناتىندا جۇلدە العان سپورتشىلاردى ماراپاتتاۋ ءراسىمى ءوتتى.
وسى ءىس-شارا بارىسىندا قازاقستان بوكس فەدەراتسياسىنىڭ (قبف) پرەزيدەنتى كەڭەس راقىشەۆ, اتقارۋشى ديرەكتورى ءازيز قوجامبەتوۆ, رەسپۋبليكالىق سپورتتى دامىتۋ ديرەكتسياسىنىڭ ديرەكتورى جانە قبف ۆيتسە-پرەزيدەنتى ماراتبەك مىقتىبەكوۆ, الماتى قالاسى بوكس فەدەراتسياسىنىڭ پرەزيدەنتى ەرجان قوسمامبەتوۆ بىلعارى قولعاپ شەبەرلەرىنە, ولاردىڭ باپكەرلەرى مەن ۇلتتىق قۇراماداعى كەشەندى-عىلىمي توپ وكىلدەرىنە قارجىلاي سەرتيفيكات تاپسىردى. ەستەرىڭىزگە سالا كەتەيىك, قازاقستان ايەلدەر قۇراماسى تۇركيادا وتكەن الەم چەمپيوناتىندا بەس مەدال (1 كۇمىس, 4 قولا) جەڭىپ العانىن ايتا كەتەيىك.
– وزدەرىڭىز بىلەتىندەي, ىستانبۇلدا 72 ەلدەن كەلگەن 300-دەن استام تاڭداۋلى بىلعارى قولعاپ شەبەرلەرى جۇلدەگە تالاستى. بۇل سىندا دا ءبىزدىڭ قىزدار تولىق قۇرامدا لايىقتى ونەر كورسەتتى. وسى تۇستا بۇل ءبىز ءۇشىن ەڭ تابىستى الەم چەمپيوناتىنىڭ ءبىرى بولعانىن اتاپ وتۋگە ءتيىسپىز. مەن دە وسى الەم چەمپيوناتىندا بولىپ, فينالدا الۋا بالقىبەكوۆاعا جانكۇيەر بولدىم. ءوز باسىم ءبىزدىڭ جارقىن جەڭىستەرىمىز ءالى الدا دەپ سەنەمىن. بارىڭىزگە تىنباي ەڭبەك ەتىپ, قايسارلىق تانىتقاندارىڭىز ءۇشىن العىس ايتامىن», دەدى كەڭەس راقىشەۆ قۇتتىقتاۋ سوزىندە.
كىشىگىرىم ءباسپاسوز كونفەرەنتسياسىنان كەيىن ەلىمىزدىڭ ۇزدىك بوكسشىلارى اقشالاي سەرتيفيكات پەن سوڭعى ۇلگىدەگى ۇيالى تەلەفونعا يە بولدى. الەم چەمپيوناتىنىڭ كۇمىس جۇلدەگەرى الۋا بالقىبەكوۆاعا 30 000 اقش دوللارى تاپسىرىلدى. ال قولا جۇلدەگەرلەر – جاينا شەكەربەكوۆا, دينا جولامان, كارينا يبراگيموۆا جانە ۆالەنتينا حالزوۆاعا 10 000 اقش دوللارى بەرىلدى. سول سەكىلدى ءشامىل سافيۋللين باستاعان جاتتىقتىرۋشىلار شتابىنىڭ وكىلدەرى, جەكە جاتتىقتىرۋشىلار مەن عىلىمي توپتىڭ مۇشەلەرى دە نازاردان تىس قالمادى. ولار دا قوماقتى كولەمدە سىياقى الدى.