كەلەشەكتە باياناۋىلداعى ءماشھۇر ءجۇسىپ كەسەنەسى ماڭىندا اشىق اسپان استىنداعى مۋزەي اشىلىپ, ەسكەلدى شاتقالىنا كەلۋشىلەر پۋشكين مەن تولستويدىڭ مۇراجاي-ۇيلەرى تارىزدەس ەرەكشە مادەنيەت ۇلگىسىن تاماشالاۋى مۇمكىن. عۇلاما اتىنداعى قوردىڭ مۇشەلەرى ەكىباستۇز قالاسىنىڭ جۇرتشىلىعىمەن كەزدەسۋ وتكىزگەن مادەنيەت جانە سپورت ءمينيسترى داۋرەن اباەۆقا وسىنداي ۇسىنىس جاسادى.
ەكىباستۇزعا كەلگەن مينيستر حالىقپەن كەزدەسىپ, ەمىن-ەركىن جاعدايدا اڭگىمە قۇردى. داۋرەن اسكەربەك ۇلى جىل باسىنان بەرى اتقارىلعان جۇمىستاردىڭ لەگىنە توقتالىپ, سالاداعى جاڭاشىلدىقتاردى اتادى.
– ەل پرەزيدەنتى قاسىم-جومارت توقاەۆتىڭ تاپسىرماسىمەن وڭىرلەردى ارالاپ, حالىقتىڭ مۇڭ-مۇقتاجىنا قۇلاق ءتۇرىپ, ورتاق ماسەلەلەردىڭ شەشىمىن تابۋدى ماقسات ەتۋدەمىز. ەلىمىزدە مادەنيەت پەن ونەر سالاسىنا ەرەكشە كوڭىل بولىنۋدە. بيىل وسى سالادا مينيسترلىكتىڭ باستاماسىمەن كوپتەگەن ءىرى جوبا قولعا الىنىپ وتىر. مەملەكەت باسشىسىنىڭ تاپسىرمالارى اياسىندا مادەنيەت سالاسىنىڭ جانە ارحيۆ ۇيىمدارى قىزمەتكەرلەرىنىڭ جالاقىسى 50%-عا, ال وڭىرلىك قىزمەتكەرلەردىڭ جالاقىسى 35%-عا ءوستى. سونداي-اق 2025 جىلعا دەيىن سالا ماماندارىنىڭ ەڭبەكاقىسى 2025 جىلعا دەيىن ءار جىل سايىن 20%-عا ءوسىپ وتىرادى. بۇدان بولەك ەلىمىزدەگى «ۇلتتىق» مارتەبەگە يە مادەنيەت مەكەمەلەرىندەگى قىزمەتكەرلەردىڭ ايلىعى 75%-عا دەيىن ارتتى, – دەدى د.اباەۆ.
ۆەدومستۆو باسشىسى سونداي-اق بيىل اقىن-جازۋشىلار مەن باسپاگەرلەردى مەملەكەت تاراپىنان قولداۋ ماقساتىندا تۇڭعىش رەت «ايبوز» ۇلتتىق ادەبي سىيلىعى تاعايىندالعانىن تىلگە تيەك ەتتى.
– جاس جازۋشىلار مەن اقىندارعا ارنالعان «ايبوز» ۇلتتىق ادەبي سىيلىعى تاعايىندالدى. ءار جەڭىمپازعا 5 ميلليون تەڭگەدەن بەرىلەدى. سىيلىقتاعى جاڭاشىل باعىت رەتىندە «ۇزدىك كوميكس» اتالىمىن ايرىقشا اتاپ وتۋگە بولادى. قازىرگى بالدىرعاندار باتىستان ۇزدىكسىز اعىلىپ كەلىپ جاتقان مۋلتحيكايالاردى كورەدى. ول تىلىمىزگە, ۇلتتىق دىلىمىزگە كەرى اسەرىن تيگىزۋدە. سول سەبەپتى ءوزىمىزدىڭ ۇلتتىق كوميكستى دامىتۋعا ءتيىسپىز. بۇدان باسقا «جاڭا قازاق ادەبيەتى» اتتى تاعى ءبىر جاڭا جوبانى قولعا الدىق. ول بويىنشا جاس اۆتورلاردىڭ كىتاپتارى ءۇش مىڭ تارالىممەن باسىلىپ شىعارىلادى. بۇل جاس ۇرپاقتىڭ جاڭاشا ويلاۋ جۇيەسىن دامىتۋعا, ولاردىڭ شىعارماشىلىق كوزقاراسى مەن يننوۆاتسيالىق يدەيالارىن قولداۋعا سەپ بولماق. تاعى ءبىر جاعىمدى جاڭالىق – جاقىندا ونەر جانە مادەنيەت قىزمەتكەرلەرىنىڭ شىعارماشىلىق جەتىستىكتەرىن قولداۋ ماقساتىندا «ۇماي» ۇلتتىق سىيلىعىن جاريالايتىن بولامىز. جالپى جۇلدە قورى – 54 ميلليون تەڭگە, – دەپ باياندادى مينيستر.
كەزدەسۋدە ەكىباستۇزدىق تۇرعىندار سپورت سالاسىنداعى ماسەلەلەردى كوتەردى. مينيسترگە جاتتىقتىرۋشىلاردىڭ وزىنە تيەسىلى ساعاتتان ارتىق ەڭبەك ەتۋى, مۇمكىندىگى شەكتەۋلى باپكەرلەرگە جۇمىس جاعدايىن جاساۋ جانە سپورتتىق مەديتسيناعا ارنالعان نورماتيۆتەردى ازىرلەۋ تۋرالى سۇراقتار قويىلدى. وڭىرلىك دارىگەرلىك-دەنە شىنىقتىرۋ ديسپانسەرىنىڭ باسشىسى نازيگۇل احماديەۆانىڭ ايتۋىنشا, اتالعان مەكەمەدە سپورتتىق مەديتسينانىڭ ءنورماتيۆتى-قۇقىقتىق بازاسى, سپورتشىلاردى مەديتسينالىق تەكسەرۋدىڭ ستاندارتتارى, بەكىتىلگەن اۋرۋلار تىزبەسى جوق ەكەن. ديسپانسەردىڭ ءوزى ۇزبەي 18 جىل قىزمەت كورسەتىپ كەلەدى.
بۇل ماسەلەنى داۋرەن اباەۆ نازارىنا الاتىنىن ايتتى.
قازاقستان جازۋشىلار وداعىنىڭ مۇشەسى, ء«ماشھۇر ءجۇسىپ» قورىنىڭ كەڭەسشىسى جۇماعالي قوعاباي ەسكەلدىدەگى ءماشھۇر ءجۇسىپ كەسەنەسىنە جاقىن ماڭدا كەزىندە عۇلاما تۇرعان ءۇي ورنالاسقانىن, ول جەرگە اشىق اسپان استىنداعى مۇراجاي اشۋ جونىندە ۇسىنىسىن جەتكىزدى. قوردىڭ كۇشىمەن ءماشھۇر ءجۇسىپ تۇرعان ءۇيدىڭ اينالاسى اباتتاندىرىلعان. اۋليە اتانعان تۇلعانىڭ 165 جىلدىق مەرەيتويى دا جاقىنداپ قالدى. وسى رەتتە اتالعان مەكەندە ەرەكشە رۋحاني ورتالىق قۇرىلىپ, ول پۋشكين مەن تولستويدىڭ اشىق اسپان استىنداعى مۋزەيلەرى سىندى بولسا دەگەن تىلەك بار.
داۋرەن اباەۆ بۇل ۇسىنىستى دا قولدايتىنىن جەتكىزدى. عۇلاما كەسەنەسىندە وسىدان بىرەر جىل بۇرىن ارنايى بولعانىن, بۇل جولعى ساپارىندا دا ات باسىن بۇراتىنىن مالىمدەدى. سونىڭ قورىتىندىسىندا قانداي كومەك كورسەتۋگە بولاتىنىن انىقتايمىن دەپ ۋادە ەتتى.
كەزدەسۋ سوڭىنان مينيستر ءوڭىر تۇرعىندارىن جەكە ماسەلەلەرى بويىنشا قابىلدادى.
پاۆلودار وبلىسى,
ەكىباستۇز قالاسى