سەنات دەپۋتاتتارى سەرىكباي ترۇموۆ, سۇيىندىك الداشەۆ جانە باقتىباي شەلپەكوۆ اقتاۋدا حالىقارالىق «كاسپي-2022» تاقىرىبىنا ارنالعان دوڭگەلەك ۇستەلگە قاتىستى. بۇل جونىندە جوعارعى پالاتانىڭ ءباسپاسوز قىزمەتى حابارلادى.
ءىس-شارا بارىسىندا قاتىسۋشىلار كاسپي تەڭىزىنىڭ جاي-كۇيىن, ەكولوگيالىق پروبلەمالاردى ءتيىمدى شەشۋ جانە بىرەگەي تەڭىز فلوراسى مەن فاۋناسىن ساقتاۋ ماسەلەلەرىن تالقىلادى.
كەزدەسۋدە سەناتورلار كاسپي تەڭىزىنىڭ ماڭىزىنا نازار اۋدارىپ, ونىڭ ەكولوگيالىق جاعدايىن قورعاۋ جانە ساقتاۋ جاعاسىنداعى مەملەكەتتەردىڭ ءبىرىنشى كەزەكتەگى مىندەتى ەكەنىن اتاپ ءوتتى.
«كاسپي تەڭىزىنىڭ ەكولوگياسى ونىڭ جاعاسىندا ورنالاسقان بەس مەملەكەت ءۇشىن وتە ماڭىزدى. ءبىزدىڭ مىندەتىمىز – الەمدىك تاجىريبەگە سۇيەنە وتىرىپ, قورشاعان ورتانى قورعاۋ جانە تەڭىزگە كەرى اسەرىن تيگىزەتىن فاكتورلاردى ازايتۋ. قىزىل كىتاپقا ەنگىزىلگەن كاسپي يتبالىعىنىڭ تاعدىرى دا وتە وزەكتى. قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ بۇل ماسەلەگە ەرەكشە نازار اۋدارىپ, ءوزىنىڭ جەكە باقىلاۋىندا بولاتىنىن ايتقانى بەلگىلى», دەدى سەرىكباي ترۇموۆ.
ايتا كەتەيىك, كاسپي يتبالىعىن قورعاۋدى كۇشەيتۋ ءۇشىن قازاقستان رەسپۋبليكاسى ۇكىمەتىنىڭ 2020 جىلعى 13 قاراشاداعى قاۋلىسىمەن ول قازاقستان رەسپۋبليكاسىنىڭ قىزىل كىتابىنا ەنگىزىلگەن.