كەشە اقش-تىڭ تسينتسينناتي قالاسىندا تەننيستەن اسا ءىرى حالىقارالىق تۋرنير باستالدى. جۇلدە قورى 2 527 250 اقش دوللارىن قۇراعان جارىستا قوس جەرلەسىمىز باق سىناۋدا.
ەلىمىزدىڭ ءبىرىنشى جانە الەمنىڭ 27-راكەتكاسى ەلەنا رىباكينا العاشقى اينالىمدا مايار شەريفپەن شەبەرلىك بايقاسادى. مىسىر ەلىنىڭ وكىلى WTA رەيتينگىندە 60-ساتىعا جايعاسقان. ەگەر رىباكينا شەريفتى ۇتسا, كەلەسى كەزەڭدە ول كەزىندە ۇزدىكتەر تىزىمىندە كوش باستاعان يسپانيالىق گاربينە مۋگۋرۋسامەن كۇش سىناسادى. كۇنى كەشە عانا تورونتوداعى ءتۋرنيردىڭ شيرەك فينالىنا دەيىن جەتكەن يۋليا پۋتينتسەۆا مەديسون كيزبەن وينايدى. قازىرگى كەزدە مىقتىلار رەيتينگىندە 27-ساتىعا جايعاسقان امەريكالىق تەننيسشى كەزىندە US open دوداسىنىڭ فينالىندا ويناسا, بيىل اۋستراليانىڭ اشىق بىرىنشىلىگىنىڭ جارتىلاي فينالىنا دەيىن جەتتى. جەرلەسىمىزدىڭ جولى بولعان جاعدايدا, ياعني ەكىنشى اينالىمدا برازيليالىق بەاتريس حادداد-ماي مەن لاتۆيالىق ەلەنا وستاپەنكو اراسىنداعى كەزەسۋدىڭ جەڭىمپازىمەن جولىعادى.