اۋىل بالالارىنىڭ اۋىزبىرشىلىگىن نىعايتىپ, بەرەكەگە ۇيىتقان جاسوسپىرىمدەر اراسىنداعى رەسپۋبليكالىق IV جازعى ويىندار دوداسى ءوز مارەسىنە جەتتى. تالدىقورعاندا تۋ كوتەرگەن جالىندى جاستار 3 كۇن قاتارىنان باق سىنادى. دۇبىرگە بولەگەن بايراقتى باسەكەنىڭ جابىلۋ سالتاناتىنا جەتىسۋ وبلىسى اكىمىنىڭ ورىنباسارى رۋستام ءالي قاتىستى.
ون كۇن بويى كىل مىقتىنى انىقتاۋعا بارىن سالعان اۋىلدىڭ ءجاسوسپىرىم سپورتشىلارى ايانىپ قالمادى. سپورتتىڭ 12 تۇرىنەن 14 وبلىستىڭ كومانداسى باق سىناعان باسەكە وتە تارتىستى ءوتتى. بولاشاعىنان ءۇمىت كۇتتىرەتىن جاس سپورتشىلاردىڭ ءوسىپ كەلە جاتقانىنا كۋا بولدىق. جان الىپ, جان بەرىسكەن جارىستا جەتىسۋ وبلىسىنىڭ سپورتشىلارى نامىستى قولدان بەرمەدى. ءار باسەكەدە جوعارى ساتىعا شىعۋ ءۇشىن بارىن سالدى. قورجىندارىنا ۇپاي ەنشىلەپ, جالپى كوماندالىق ەسەپتە ءبىرىنشى ورىنعا قول جەتكىزۋ باستى ماقساتتارى بولدى. سونىمەن ءار سپورت ءتۇرىنىڭ ناتيجەسىنە كەلەر بولساق, جەتىسۋ وبلىسى مىناداي كورسەتكىشكە قول جەتكىزدى:
وبلىس قۇراما كومانداسى ۆولەيبولدان قىزدار اراسىندا – 2-ورىن, شاعىن-فۋتبول – 3-ورىن, ەركىن كۇرەستەن – 3-ورىن, گرەك-ريم كۇرەسىنەن – 2-ورىن, دزيۋدودان – 1-ورىن, ەركىن كۇرەستەن – 3-ورىن, باسكەتبولدان قىزدار – 2-ورىن, ۇلدار – 3-ورىن, كوگالداعى حوككەي قىزدار مەن ۇلدار – 1-ورىن يەلەندى. بۇل جەتىستىكتەردىڭ ارقايسىنا جەكەلەي ۇپاي بەرىلەدى. جالپى, جارىستىڭ جيىنتىعى بويىنشا 276 ۇپاي جيناعان جەتىسۋ وبلىسى رەسپۋبليكالىق اۋىل جاسوسپىرىمدەرىنىڭ IV جازعى ويىندارىنىڭ جەڭىمپازى اتاندى. ەكىنشى ورىنعا 257 ۇپاي جيناعان الماتى وبلىسى قول جەتكىزسە, ءۇشىنشى ورىندى 241 ۇپاي جيناعان تۇركىستان وبلىسى ەنشىلەدى.
ءتورت جىلدا ءبىر بولاتىن رەسپۋبليكالىق اۋىل جاسوسپىرىمدەرىنىڭ IV جازعى ويىندارىنىڭ جابىلۋ سالتاناتىندا جەتىسۋ وبلىسى اكىمىنىڭ ورىنباسارى رۋستام ءالي جارىسقا قاتىسقان بارلىق كومانداعا العىسىن ءبىلدىرىپ, جەڭىمپازداردى ارنايى كۋبوكپەن جانە مەدالدارمەن ماراپاتتادى. جەتىسۋ وبلىسى دەنە شىنىقتىرۋ جانە سپورت باسقارماسىنىڭ باسشىسى المات ۇشكەمپىروۆ 2026 جىلى بولاتىن رەسپۋبليكالىق اۋىل جاسوسپىرىمدەرىنىڭ V جازعى ويىندارىنىڭ بايراعىن اقتوبە وبلىسىنىڭ وكىلىنە سالتاناتتى تۇردە تابىس ەتتى.
جەتىسۋ وبلىسى