بايقوڭىر عارىش ايلاعىندا «سويۋز-2.1ب» زىمىران-تاسىعىشىن سپۋتنيكتەر توبىمەن ۇشىرۋ جۇمىستارى ءجۇرىپ جاتىر, دەپ حابارلايدى Egemen.kz.
سپۋتنيك 9 تامىزدا ايلاقتان ۇشىرىلادى.
روسكوسموس ءباسپاسوز قىزمەتىنىڭ مالىمەتىنشە, «فرەگات» ۇدەتكىش بلوگى بار «سويۋز-2.1 ب» زىمىران تاسىعىشى يران يسلام رەسپۋبليكاسىنىڭ تاپسىرىسى بويىنشا «حايام» جەردى قاشىقتان زوندتاۋ (جقز) عارىش اپپاراتىن وربيتاعا شىعارۋى ءتيىس.
سپۋتنيك روسكوسموس قۇرامىنا كىرەتىن كاسىپورىنداردا جاسالعان. سونداي-اق توپقا يراننىڭ جقز سپۋتنيگىمەن بىرگە عارىشقا رەسەيدىڭ جەتەكشى جوعارى وقۋ ورىندارى, كوممەرتسيالىق كومپانيالار مەن كوممەرتسيالىق ەمەس ۇيىمدار عىلىمي جانە تەحنولوگيالىق زەرتتەۋلەر ءۇشىن قۇرعان 16 شاعىن عارىش اپپاراتى - رەسەيلىك شاعىن سپۋتنيكتەر ۇشىرىلادى.