قازاقستان ءموبيلدى ينتەرنەت جىلدامدىعى بويىنشا الەم ەلدەرى رەيتينگىندە 6 ساتىعا كوتەرىلدى, دەپ حابارلايدى Egemen.kz Finprom سايتىنا سىلتەمە جاساپ.
«ەلدەگى ينتەرنەت جىلدامدىعى ءبىر جىلدىڭ ىشىندە 22%-عا ارتتى. Speedtest Global Index مالىمەتىنە سۇيەنسەك, 2022 جىلعى ماۋسىمدا ءموبيلدى ينتەرنەت جىلدامدىعىنىڭ رەيتينگىندە قازاقستان 6 ساتىعا كوتەرىلدى. ياعني, ءبىر ايدا ءموبيلدى ينتەرنەتتىڭ جىلدامدىعى 20,56 مب/س-تان 22,53 مب/س-قا دەيىن ۇلعايدى. وسىلايشا قازاقستان رەسەي, قىرعىزستان, وزبەكستان, بەلارۋس ەلدەرىنەن ايتارلىقتاي الدا تۇر», دەپ جازىلعان ساراپتامالىق ماتەريالدا.
ال الەم بويىنشا ينتەرنەت جىلدامدىعى ەڭ جىلدام كوشباسشى ەلدەر قاتارىندا نورۆەگيا, ءباا, بولگاريا, وڭتۇستىك كورەيا جانە كاتار بولىپ وتىر.
«بۇل رەتتە ەلىمىزدە ءموبيلدى ينتەرنەتتىڭ جىلدامدىعى ينتەرنەت-ترافيكتى تۇتىنۋدىڭ ۇلعايۋىمەن قاتار ءوسىپ كەلە جاتقانىن اتاپ وتكەن ءجون. ينتەرنەتتىڭ دامۋىنا ەل اۋماعى ايتارلىقتاي اسەر ەتەدى. ول نەعۇرلىم ۇلكەن بولسا, كابەلدىك سىمداردى جاڭارتۋ سوعۇرلىم قىمباتقا تۇسەدى. تيىسىنشە, قازاقستاندا ينتەرنەتكە قوسىلۋ وتە قىمبات پروتسەدۋرا. ودان بولەك ينتەرنەت ترافيك تە يمپورتتىق ءونىم بولعاندىقتان باعا قىمبات بولىپ تۇر. ويتكەنى ونى دوللارمەن ساتىپ الىپ وتىرمىز. جالپى, 2021 جىلى بايلانىس سەكتورىنا 128,6 ملرد تەڭگە ينۆەستيتسيا سالىندى», دەلىنگەن اقپاراتتا.
تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى تەلەكوممۋنيكاتسيا كوميتەتى توراعاسىنىڭ ورىنباسارى گۇلنارا بوكەەۆانىڭ ايتۋىنشا, بۇدان بىلاي تۇرعىن ءۇي كەشەنىن سالعان كەزدە ونىڭ يەسىمەن قانداي ءموبيلدى وپەراتور بولاتىنى تۋرالى كەلىسىم جاسالادى.