ءورىسى مالعا تولسا ورەكپىپ كەتەتىن اقجايناق قازاقتىڭ قالىبى, قاعيداسى, تۇرمىس سالتى وسى ءتورت ت ۇلىكتىڭ تورەسى قويمەن تىعىز بايلانىستى. «قويداي جۋاس», «قوي اۋزىنان ءشوپ المايدى», «قۇتتى قوناق كەلسە, قوي ەگىز تابادى», دەپ تەڭەپ-تەڭشەپ ءھام ماقالداپ سويلەگەندە اسىلى شوپان اتا تولىنە دەگەن قۇرمەتىن اڭدايمىز. كارتيناداعى كورىنىس ءبىزدىڭ وسى وڭاشا ويىمىزدى ورمانداي قىلىپ كورسەتىپ تۇرعانداي.
وزگە ەتنوس وكىلى بولا تۇرا ءومىر تانىمى دارحان قازاقتىڭ دارگەيىنە جىعىلعان, ءومىردى قازاقشا تانىپ, قازاقشا سۇيگەن سۋرەتكەرلەر جەتەرلىك. سونىڭ ءبىرى – اناتولي موتۋزكو. «اسۋدا» اتتى كارتيناسى ارقىلى بايىرعى قازاقتىڭ بولمىسىن ادەپتەپ, كوشپەلى ءداۋىردىڭ كوركەم كەلبەتىن جازعان. دالانىڭ مىنەزى مەن بابامنىڭ تىلەگىن ءبىر شەڭبەرگە سىيعىزىپ, ءتۇرلى-ءتۇستى الەمنىڭ ءبىر بولشەگىنە اينالدىرعان.
قىلقالام شەبەرى اتالعان كارتينادا قازاق حالقىنىڭ ءداستۇرلى ءومىرىن بەينەلەيدى. جاسىرىپ-جاباتىنى جوق, تاريحتى قايتا اقتاراتىن بولساڭىز, قازاق ءومىرىنىڭ نەگىزى تىرەگى – كوشپەلى مال شارۋاشىلىعى بولدى. قوراسى قويعا تولعان قوڭىر حالىقتىڭ الىستان ات تەرلەتىپ كەلگەن قوناقتىڭ ەنشىسى ەسەبىندە دە مالدى ماقتانىش تۇتقان. قازانىندا ءبىر اسىم ەت تابىلماسا ۇلتقا سىن. وسىنى ويلاعان حالقىمىز ادەت-عۇرىپتان اتتاماعان.
سۋرەتشى تاۋدىڭ كەڭ كولەمدى اسەم كورىنىسىنىڭ فونىنا قويدى ايداپ بارا جاتقان شوپاننىڭ وتباسىن بەينەلەگەن. قوي وتارلارى ءۇنسىز الىپ جاردىڭ اراسىمەن بۇرالاڭداعان وزەندەي بولىپ كەتىپ بارادى. جارلار ەكى جاقتان ايبارلى ءارى ىزعارلى, ءتىپتى تۇنجىر كۇيدە اسقاقتاۋدا. شاتقال تۇبىنە جىڭىشكە اقجولاق تۇمان تۇسكەن. بايبىشەسى ارتىنان ەرىپ كەلەدى. اقجاۋلىعى اق تۇماننىڭ اراسىندا كوزگە وتتاي باسىلىپ تۇر.
ديناميكالىق كارتينا قيعاش جارتاستاردان جانە يرەلەڭدەگەن وتكىر بۇرىشتى جولداردان تۇرادى. اناتولي موتۋزكو تۇستىك سۋىق گاممالاردى پايدالانا وتىرىپ, جارتاستاردىڭ ايبىندىلىعى مەن مىزعىماس بەرىكتىگىن كورسەتكەن. مالشى ءيتىنىڭ قويدى قايىرىپ, يەسىنىڭ ىعىنا جىعىلىپ كەلە جاتقانى انىق بايقالادى. جايلاۋدان كۇزەۋگە كوشكەن قازاق وتباسى ءوزىنىڭ قاراپايىمدىلىعىمەن دالالىق وركەونيەتتى وسيەتتەيدى. بۇل – ەسكى ءھام جاڭا ءداۋىردىڭ قولتاڭباسى.