جەتىسۋداعى تۋريستىك ينفراقۇرىلىم: الاكول جاعالاۋىنداعى نەگىزگى نىسانداردىڭ جاي-كۇيى تەكسەرىلدى

جۇمىس ساپارىنا ورتالىق مەملەكەتتىك ورگانداردىڭ, ۇكىمەت اپپاراتىنىڭ, سالالىق ۆەدومستۆولاردىڭ وكىلدەرى, سونداي-اق جەتىسۋ وبلىسىنىڭ اكىمى بەيبىت يساباەۆ قاتىستى. تەكسەرۋ بارىسىندا ۇكىمەت باسشىسىنىڭ ورىنباسارى قوناقۇي كەشەندەرى, كارىز-تازارتۋ قۇرىلىستارى نىسانى, كوكتۇما اۋىلىنداعى جاعالاۋدى بەكىتۋ ۋچاسكەسى جانە ءۇشارال قالاسىنىڭ اۋەجايىن ارالادى. ءار باعىت بويىنشا نىسانداردىڭ قازىرگى دايىندىعى مەن جوبالاردىڭ ىسكە اسۋ قارقىنى جونىندە باياندالدى.

وبلىس اكىمدىگى جاعالاۋدى جازعى تۋريستىك ماۋسىمعا دايىنداۋ باعىتىندا اۋقىمدى ءارى جۇيەلى جۇمىس جۇرگىزىپ كەلەدى. بۇل جۇمىستار مەملەكەت باسشىسىنىڭ تاپسىرماسىنا سايكەس جۇزەگە اسىرىلۋدا. پرەزيدەنت وتكەن جىلى دا تۋريستىك ايماقتاردا ءتارتىپ ورناتۋ, ينجەنەرلىك جانە كولىك ينفراقۇرىلىمىن دامىتۋ, سونداي-اق ينۆەستورلار ءۇشىن ناقتى قولايلى جاعداي جاساۋ ماسەلەلەرىنە ەرەكشە نازار اۋدارعان بولاتىن. بۇگىندە بۇل ماسەلە مەملەكەت باسشىسىنىڭ ايرىقشا باقىلاۋىندا. اتاپ ايتقاندا, جالپى ۇزىندىعى 488 شاقىرىمدى قۇرايتىن تالدىقورعان – ءۇشارال جانە ءۇشارال – دوستىق اۆتوموبيل جولدارىن رەكونسترۋكتسيالاۋ اياقتالىپ, جاعالاۋدىڭ كولىك قاتىناسى ەداۋىر جاقسارعان. ءۇشارال اۋەجايىنىڭ ۇشۋ-قونۋ جولاعىن جاڭعىرتۋدان كەيىن ءىرى اۋە كەمەلەرىن قابىلداۋعا مۇمكىندىك جاسالىپ, قوسىمشا تەرمينال سالۋ جوباسى دا ازىرلەنگەن.

«تۋريستىك ايماقتىڭ ينجەنەرلىك ينفراقۇرىلىمى دا ەداۋىر نىعايتىلعان. 57 شاقىرىم ەلەكتر جەلىسى مەن ەكى قوسالقى ستانسا قۇرىلىسى اياقتالدى. بۇل بۇرىنعى قۋات تاپشىلىعىن جويىپ, الداعى كەزەڭگە قاجەتتى ەلەكتر ەنەرگياسىنىڭ قورىن قالىپتاستىرۋعا مۇمكىندىك بەردى. اقشي اۋىلىندا 69 شاقىرىم كارىز جەلىسىنىڭ قۇرىلىسى اياقتالدى. اقشي مەن كوكتۇمادان شىعاتىن اعىن سۋلاردى قابىلداپ, تازالاپ, سۋدى تەحنيكالىق ماقساتتا قايتا پايدالانۋعا مۇمكىندىك بەرەتىن تازارتۋ قۇرىلىستارى جوباسىن ىسكە اسىرۋ جالعاسۋدا. نىساندى بيىلعى قازان ايىندا تولىق جابدىقتاپ, ينجەنەرلىك جەلىلەرگە قوسۋ جوسپارلانعان. وسىلايشا جاعالاۋداعى سانيتاريالىق جاعداي, سۋ بۇرۋ جانە ەكولوگيالىق قاۋىپسىزدىك ماسەلەلەرى كەزەڭ-كەزەڭىمەن شەشىمىن تاۋىپ كەلەدى», دەپ حابارلادى ۇكىمەتتىڭ ءباسپاسوز قىزمەتى.

جاعالاۋدى بەكىتۋ جۇمىستارىنىڭ بارىسىنا دا باسا نازار اۋدارىلدى. جوبا الاكول جاعالاۋىنىڭ 13 شاقىرىم اۋماعىن قامتيدى. تەكسەرۋ بارىسىندا بىرقاتار ۋچاسكەلەردە, سونىڭ ىشىندە جاعالاۋعا جاقىن ورنالاسقان نىساندار ماڭىندا جاعانىڭ شايىلۋ بەلگىلەرى بار ەكەنى تىركەلدى. تۋريستىك نىسان يەلەرىنىڭ ايتۋىنشا, قىس مەزگىلىندە ءىرى مۇز ماسسالارى جىل سايىن جاعالاۋ جيەگىنە اسەر ەتىپ, توپىراقتى شايىپ, جاعاجاي اۋماعىنا زاقىم كەلتىرەدى. سونىڭ سالدارىنان كاسىپكەرلەر ءار ماۋسىم سايىن جاعاجايلاردى قالپىنا كەلتىرۋگە جانە اباتتاندىرۋعا قايتادان قارجى سالۋعا ءماجبۇر. قازىرگى ۋاقىتتا كوكتۇمادا 960 مەتر, اقشيدە 200 مەتر اۋماقتا جاعالاۋدى بەكىتۋ جۇمىستارى اتقارىلعان. بۇل باعىتتاعى جۇمىستار جالعاسۋى ءتيىس. ويتكەنى اۋماقتىڭ قورعالۋى, نىسانداردىڭ ساقتالۋى جانە جاعالاۋدىڭ ودان ءارى دامۋى سوعان تىكەلەي بايلانىستى.

الاكولگە پويىز جانە اۋە بيلەتتەرى قاشان ساتىلا باستايدى؟

جاعالاۋدىڭ سانيتاريالىق دايىندىعى جونىندە دە جەكە باياندالدى. وسى ماقساتتا كوممۋنالدىق بازا نىعايتىلىپ, سانيتاريالىق تازارتۋ جۇمىستارىنا قوسىمشا 42 بىرلىك ارنايى تەحنيكا ساتىپ الىنعان. ماۋسىمدىق بريگادالاردىڭ جۇمىسى كۇشەيتىلىپ, قوقىستى جۇيەلى شىعارۋ, قوعامدىق كەڭىستىكتەر مەن جاعاجاي اۋماعىن كۇتىپ ۇستاۋ شارالارى ۇيىمداستىرىلىپ جاتىر.

ماۋسىمنىڭ جاقىنداۋىنا بايلانىستى قاۋىپسىزدىك ماسەلەلەرىنە دە ەرەكشە نازار اۋدارىلدى. جاعالاۋدا قۇتقارۋ بولىمشەلەرى جۇمىس ىستەيدى, جازعى كەزەڭدە ماۋسىمدىق قۇتقارۋشىلار قوسىمشا تارتىلادى, تەحنيكا جانە قۇرال-جابدىقپەن جاراقتاندىرۋ كۇشەيتىلەدى. سونىمەن قاتار بەينەباقىلاۋ, درون ارقىلى مونيتورينگ, قولدانىستاعى شەكتەۋلەر مەن قۇقىق بۇزۋشىلىقتار ءۇشىن جاۋاپكەرشىلىك تۋرالى اقپاراتتىق ەسكەرتپەلەر ورنالاستىرۋ كوزدەلگەن. «تازا قازاقستان» جانە «زاڭ مەن ءتارتىپ» قاعيداتتارى جاعالاۋدىڭ بۇكىل اۋماعىندا ناقتى كورىنىس تابۋعا ءتيىس ەكەنى اتاپ ءوتىلدى. بۇل ەڭ الدىمەن تازالىقتان, تارتىپتەن, بەلگىلەنگەن تالاپتاردىڭ ساقتالۋىنان جانە بارلىق قىزمەتتەردىڭ ۇيلەسىمدى جۇمىسىنان بايقالۋى قاجەت.

جەتىسۋ وبلىسىندا بيىل ءۇش بىردەي جاڭا ەكوپارك قۇرىلادى

كۇن تارتىبىندە تۋريستىك سالاداعى ەڭبەك قاتىناستارى ماسەلەلەرى دە قارالدى. اسىرەسە جاستار مەن ستۋدەنتتەرگە قاتىستى بەيرەسمي جۇمىسپەن قامتۋدىڭ الدىن الۋ قاجەتتىگىنە ەرەكشە ءمان بەرىلدى. بارلىق ەڭبەك قاتىناستارى, ەڭبەكاقى تولەۋ جانە ەڭبەك جاعدايلارى تۇراقتى باقىلاۋدا بولۋى ءتيىس.

الاكولدى دايىنداۋمەن قاتار, وبلىس اكىمدىگى بالقاش كولىندەگى تۋريستىك ينفراقۇرىلىمدى دامىتۋ باعىتىندا دا جۇمىس جۇرگىزىپ جاتقانى ايتىلدى. جاعالاۋ ايماعىنىڭ باس جوسپارى مەن ەگجەي-تەگجەيلى جوسپارلاۋ جوباسى بەكىتىلگەن, اباتتاندىرۋ جۇمىستارى جۇرگىزىلۋدە, جاعاجاي ينفراقۇرىلىمىن اياقتاۋ 15 ماۋسىمعا جوسپارلانعان. سونىمەن قاتار اۋماقتى ودان ءارى دامىتۋعا جانە ينۆەستيتسيا تارتۋعا باعىتتالعان ىلەسپە جوبالار جۇزەگە اسىرىلىپ جاتىر.

بالقاش كولى جاعالاۋىنداعى جەر ۋچاسكەلەرى ينۆەستورلارعا اشىق اۋكتسيون ارقىلى ۇسىنىلادى

ايدا بالاەۆا اتقارىلعان جۇمىستار جاعالاۋدىڭ جاڭا ينفراقۇرىلىمدىق نەگىزىن قالىپتاستىرىپ جاتقانىن اتاپ ءوتتى. سونىمەن بىرگە دەمالۋشىلار اعىنىنىڭ ۇلعايۋىن ەسكەرە وتىرىپ, باستى ولشەم ناقتى ناتيجە مەن بارلىق قىزمەتتەردىڭ دايىندىعى بولىپ قالا بەرەتىنىن ايتتى.

جۇمىس ساپارىنىڭ قورىتىندىسى بويىنشا پرەمەر-ءمينيستردىڭ ورىنباسارى جاعالاۋدىڭ جازعى ماۋسىمعا تولىق دايىندىعىن قامتاماسىز ەتۋدى, نەگىزگى ينفراقۇرىلىمدىق جوبالاردى بەلگىلەنگەن مەرزىمدە اياقتاۋدى, قاۋىپسىزدىك پەن سانيتاريالىق كۇتىپ-ۇستاۋ شارالارىن كۇشەيتۋدى, دەمالۋشىلارعا ارنالعان كورنەكى پروفيلاكتيكالىق ءتۇسىندىرۋ جۇمىستارىن جولعا قويۋدى, سونداي-اق تۋريستەر اعىنىنىڭ ءوسۋى مەن ىشكى ءتۋريزمدى دامىتۋدىڭ ۇزاقمەرزىمدى مىندەتتەرىن ەسكەرە وتىرىپ, تۋريستىك ايماقتى جۇيەلى جاڭعىرتۋدى جالعاستىرۋدى تاپسىردى.