الەمگە ايگىلى ءانشى, قازاقستاننىڭ حالىق ءارتىسى ديماش قۇدايبەرگەن تۋرالى دەرەكتى فيلم 30 مامىر كۇنى يسپانيا استاناسى مادريد قالاسىندا العاش رەت كورەرمەنگە جول تارتپاق. «Al compás de su voz» (ونىڭ داۋىس ىرعاعىمەن) دەپ اتالاتىن بۇل تۋىندىنىڭ باستاماشىسى – يسپانيالىق جانكۇيەرلەر, ال جۇزەگە اسىرۋشىسى – «Dimash Qudaibergen Fan Club Oficial Spain-La Gran Voz Kazaja» قاۋىمداستىعى. ءفيلمنىڭ پرەمەراسى ءمادريدتىڭ Hortaleza اۋدانىنداعى «Palacio de Hielo» كەشەنىندە وتپەك.
اتالعان جوبا جۇمىسى 2024 جىلدىڭ قازان ايىندا باستالىپ, شامامەن ەكى جىلعا جۋىق ۋاقىتتى قامتىعان. دەرەكتى فيلمگە
20 ساعاتتان استام بەينەماتەريال, ارحيۆتىك جازبالار, فوتوسۋرەتتەر مەن سۇحباتتار ەنگىزىلگەن. تۋىندىدا الەمنىڭ ءار تۇكپىرىنەن جينالعان بەس جانكۇيەردىڭ جەكە وقيعالارى باياندالادى. اۆتورلار ولاردىڭ انشىمەن رۋحاني بايلانىسىن, سونداي-اق ديماشتىڭ حالىقارالىق فان-قوعامداستىعى ىشىندەگى ەرەكشە اتموسفەرانى كورسەتۋگە تىرىسقان.
وسى جاڭالىقتى ەستىگەن سوڭ, الەۋمەتتىك جەلىدەن يسپانيالىق كينەماتوگرافيست داۆيد كوللانتەس رودريگەسكە حابارلاستىق. ونىڭ ايتۋىنشا, ءفيلمنىڭ باستى يدەياسى – ديماشتىڭ ونەرى ميلليونداعان ادامنىڭ ومىرىنە قالاي اسەر ەتكەنىن كورسەتۋ بولماق. «بۇل جوبادا ءاربىر جانكۇيەردىڭ جەكە تاريحى ارقىلى ورتاق ءبىر قۇبىلىستى, ونەردىڭ ادامداردى بىرىكتىرۋ كۇشىن اشۋدى كوزدەدىك. ءار ادامنىڭ ديماشپەن تانىسۋىنىڭ ءوز تاريحى بار. بۇل – مەنىڭ العاشقى تولىقمەتراجدى جۇمىسىم. ال العاشقى دۇنيەلەر ءاردايىم ەرەكشە بولادى», دەيدى ول.
فيلمدە ديماشتىڭ يسپانياداعى العاشقى كونتسەرتى (بارسەلونا, قاراشا ايى), سونداي-اق 50 ەلدەن كەلگەن 700-دەن استام جانكۇيەر قاتىسقان ارنايى كەزدەسۋلەر دە قامتىلعان. اۆتورلار تۋىندى ارقىلى ءانشى شىعارماشىلىعىن كەڭىنەن ناسيحاتتاپ, ونى شىن مانىندە جاھاندىق مادەني فەنومەن رەتىندە تانىتۋدى ماقسات ەتەدى.