قوستانايدا 2020-2025 جىلدارعا ارنالعان يندۋستريالاندىرۋ كارتاسى اياسىندا جالپى قۇنى 179 ملرد تەڭگەدەن اساتىن بەس بىردەي ءىرى جوبا جۇزەگە اسىرىلادى. ماشينا جاساۋ سالاسىنا سونى سەرپىن بەرەتىن اۋقىمدى جوبالاردىڭ ناتيجەسىندە وسى جىلدىڭ وزىندە مىڭنان استام جاڭا جۇمىس ورىندارى اشىلادى دەپ جوسپارلانىپ وتىر.
ماسەلەن, قالالىق ەكونوميكا جانە بيۋدجەت جوسپارلاۋ ءبولىمىنىڭ باسشىسى ناتاليا تۇرلىبەكوۆانىڭ ايتۋىنشا, 2022 جىلدىڭ سوڭىنا تامان ەكى ءىرى زاۋىت ىسكە قوسىلادى.
– قازىر ەكى عيماراتتىڭ دا قۇرىلىسى اياقتالىپ قالدى. ولاردىڭ بىرىنە «بەلورۋس» تراكتورلارىنىڭ «متز-قازاقستان» ماشينا جاساۋ زاۋىتى» جشس ورنالاسادى. قۇنى 8,3 ملرد تەڭگە بولاتىن بۇل كاسىپورىن جىلىنا 10 مىڭ كابينا جاساپ شىعارادى. زاۋىت 150 ادامدى جۇمىسپەن قامتيدى. جىل اياعىنا دەيىن ىسكە قوسىلاتىن تاعى ءبىر زاۋىت – «تehnopark KZ» جشس. وسى جىلدىڭ وزىندە كاسىپورىن 600-دەي شاناق جانە كوممۋنالدىق تەحنيكاعا ارنالعان قوندىرما قۇرىلعىلار شىعارۋدى كوزدەپ وتىر. اتالعان نىسان قۇرىلىسىنىڭ قۇنى – 2,9 ملرد تەڭگە, 180 جۇمىس ورنى قۇرىلادى, – دەيدى ناتاليا تۇرلىبەكوۆا.
قالعان 3 جوبا 2024 جىلى ىسكە قوسىلادى. سونىڭ ءبىرى – «KamLitKZ» جشس-نىڭ قۇرىلىسى 2019 جىلى باستالعان. قۇرىلىس جۇمىستارى مەن زاۋىتتىڭ وندىرىسكە قاجەت قۇرال-جابدىقتارىن ورناتۋ 5 جىل ىشىندە اياقتالۋعا ءتيىس. جوسپار بويىنشا كاسىپورىن جىلىنا 45 مىڭ تونناعا دەيىن تسيليندر بلوكتارىن, قوزعالتقىش باستيەكتەرىن, كارتەرلەر مەن جۇك كولىك بەلدەمەسىنىڭ رەدۋكتورلارىن قۇيىپ شىعارادى. زاۋىت قۇرىلىسىنا 78,2 ملرد تەڭگە قاراستىرىلعان.
2020 جىلى «KamLitKZ» جشس تاعى ءبىر اۋقىمدى جوبانى قولعا العان. قۇنى 82,5 ملرد تەڭگە تۇراتىن اسا قىمبات جوبا قوستانايدا «كاماز» ارنايى تەحنيكاسىنا ارنالعان جىلىنا 74 مىڭ جەتەكشى بەلدەمە رەدۋكتورلارى مەن قوزعالىس اۋىستىرعىشتارىن قۇيۋدى كوزدەيدى.
ەكى جىلدان كەيىن ىسكە قوسىلاتىن «Deutz-Fahr» تراكتورلارىن قۇراستىرۋدى ۇيىمداستىرۋ جانە اۋىل شارۋاشىلىعى تەحنيكاسىنا قىزمەت كورسەتۋ جونىندەگى سەرۆيستىك ورتالىق پەن لوگيستيكالىق تەرمينال سالۋ جوباسىن «اگروماش حولدينگ KZ» اق كومپانياسى جۇزەگە اسىرادى. جوبانىڭ قۇنى – 4,5 ملرد تەڭگە.
– قوستانايدا يندۋستريالاندىرۋ كارتاسىنان تىس ماشينا جاساۋ سالاسى مەن اگروونەركاسىپ كەشەنىندە, سونداي-اق جەڭىل ونەركاسىپ, جاڭارتىلاتىن ەنەرگيا كوزدەرى مەن مەتاللۋرگيا سالالارىندا جالپى قۇنى 327 ملرد تەڭگە بولاتىن 19 جوبا ىسكە اسىرىلىپ جاتىر. 2022-2025 جىلدار ارالىعىندا ىسكە قوسىلاتىن ىلكىمدى جوبالاردىڭ ناتيجەسىندە 3 مىڭعا جۋىق ادام تۇراقتى جۇمىسپەن قامتىلاتىن بولادى, – دەيدى ناتاليا تۇرلىبەكوۆا.
قوستاناي وبلىسى