توتەنشە جاعدايلار مينيسترلىگىنىڭ بۇيرىعىمەن پولكوۆنيك ماناربەك قايىرگەلدى ۇلى شاپاعاتوۆ - اباي وبلىسىنا, ال ەسەن المۇحانبەت ۇلى بايىروۆ - ۇلىتاۋ وبلىسى توتەنشە جاعدايلار دەپارتامەنتىنىڭ باستىعى بولىپ تاعايىندالدى, دەپ حابارلايدى Egemen.kz.
ماناربەك قايىرگەلدى ۇلى 1975 جىلعى 3 اقپاندا كوكشەتاۋ وبلىسىنىڭ ەڭبەكشىلدەر اۋدانىندا تۋعان. 1995 جىلى ءىىم الماتى ءورت-تەحنيكالىق ۋچيليششەسىن, 2005 جىلى تجم كوكشەتاۋ تەحنيكالىق ينستيتۋتىن ءتامامدادى.
ماماندىعى - ءورت قاۋىپسىزدىك ينجەنەرى. قۇقىق قورعاۋ ورگاندارىندا 1992 جىلدان باستاپ قىزمەت اتقارادى. ءوز قىزمەتىن كوكشەتاۋ وبلىسىنىڭ ششۋچە اۋدانى مەملەكەتتىك ءورت قاداعالاۋ ءبولىمىنىڭ ينسپەكتورى لاۋازىمىنان باستادى. قىزمەت اتقارعان جىلدارى ءارتۇرلى باسشىلىق لاۋازىمدا قىزمەت وتكەردى.
2015 جىلدان باستاپ اقمولا وبلىسى توتەنشە جاعدايلار دەپارتامەنتى باستىعىنىڭ ورىنباسارى لاۋازىمىندا قىزمەت اتقاردى.
ەسەن المۇحانبەت ۇلى 1974 جىلعى 22 ساۋىردە جەزقازعان وبلىسىنىڭ اقادىر اۋدانىندا تۋعان. 2005 جىلى قاراعاندى مەملەكەتتىك تەحنيكالىق ۋنيۆەرسيتەتىن, 2011 جىلى تجم كوكشەتاۋ تەحنيكالىق ينستيتۋتىن ءتامامدادى.
ماماندىعى - ءورت قاۋىپسىزدىك ينجەنەرى. قۇقىق قورعاۋ ورگاندارىندا 1998 جىلدان باستاپ قىزمەت ەتەدى. ءوز قىزمەتىن استانا قالاسىنىڭ مەملەكەتتىك ورتكە قارسى قىزمەتى № 19 ءورت ءسوندىرۋ ءبولىمىنىڭ كىشى ينسپەكتورى لاۋازىمىنان باستادى. قىزمەت اتقارعان جىلدارى ءارتۇرلى باسشىلىق لاۋازىمدا بولعان.
2020 جىلدان باستاپ نۇر-سۇلتان قالاسى توتەنشە جاعدايلار دەپارتامەنتى باستىعىنىڭ ورىنباسارى لاۋازىمىندا جۇمىس ىستەگەن.