نۇر-سۇلتان قالاسىندا «مەرەيلى وتباسى-2022» ۇلتتىق بايقاۋىن وتكىزۋدى ۇيىمداستىرۋ جونىندەگى قالالىق كوميسسيانىڭ وتىرىسى ءوتتى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
كوميسسيا مۇشەلەرى ەلوردادا وتباسىلىق قۇندىلىقتاردى دارىپتەۋگە جانە وتباسى ينستيتۋتىن ارتتىرۋعا باعىتتالعان ۇلتتىق بايقاۋعا باق سىناۋعا ءوتىنىم بەرگەن وتباسىلاردىڭ ىشىنەن ۇزدىگىن تاڭداۋ ءۇشىن, 151 قۇجاتتى قاراپ, بەينە روليكتەردى كوردى.
بيىلعى بايقاۋ كوميسسياسىنىڭ قۇرامىندا نۇر-سۇلتان قالاسى اكىمىنىڭ ورىنباسارى ەسەت بايكەن, نۇر-سۇلتان قالاسى ىشكى ساياسات باسقارماسىنىڭ باسشىسى داۋرەن بابامۇراتوۆ, قالا اكىمىنىڭ كەڭەسشىسى قاراقات ابدەن, «وتباسىلىق تابىس ورتالىعى» قق ديرەكتورى روزا بەكىشەۆا, «اعابەك قارابەكوۆ اتىنداعى» قوعامدىق قوردىڭ ديرەكتورى روزا قارابەكوۆا, «رۋحاني قوعام الەمى» قوعامدىق قورىنىڭ ديرەكتورى ليمانا قويشيەۆا, نۇر-سۇلتان قالاسى بويىنشا «مەرەيلى وتباسى-2021» ۇلتتىق بايقاۋىنىڭ جەڭىمپازى الما سايلاۋقىزى, نۇر-سۇلتان قالاسى قحا انالار كەڭەسىنىڭ ءتورايىمى التىناي تاڭىربەرگەنوۆا بار.
ۇزدىك وتباسىلاردى ايقىنداۋ تۋرالى شەشىم قابىلداۋ كەزىندە كوميسسيا مۇشەلەرى وتباسى مۇشەلەرىنىڭ ارقايسىنىڭ جەتكەن جەتىستىكتەرىنە, ونىڭ ماڭىزدىلىعىنا ءمان بەردى (وتباسى تاريحى – ۆيزيت كارتاسى – تانىستىرۋ ءراسىمى). سول سياقتى وتباسىلىق داستۇرلەر مەن جادىگەرلەرى, رۋحاني-ادامگەرشىلىك قۇندىلىقتارى, بالالارى مەن نەمەرەلەرىنىڭ شىققان بيىكتەرى نازاردان تىس قالمادى. ال اتا-انالاردىڭ جەتىستىكتەرى, وتباسى قۇرامى, ارقايسىسىنىڭ دارىنى دا ەسكەرىلدى. وتباسىنىڭ ءومىر سالتى (سالاۋاتتى ءومىر سالتى, بوس ۋاقىتتى وتكىزۋ), قوعامدىق پايدالى قىزمەتكە قاتىسۋ (ۆولونتەرلىك, قايىرىمدىلىق, مەتسەناتتىق), قامقورشىسى جوق بالالارعا قامقورشىلىق, تالىمگەرلىك ىستەرى دە ەسەپكە الىندى.