مەملەكەت باسشىسى نۇرسۇلتان نازارباەۆتىڭ اتىنا قازاقستان حالقى اسسامبلەياسىنىڭ XXI سەسسياسىنىڭ وتۋىنە بايلانىستى حاتتار مەن جەدەلحاتتار كەلىپ ءتۇستى, دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسىنىڭ اتىنا ەلدىڭ ءتۇرلى وڭىرلەرى ازاماتتارىنان قازاقستان حالقى اسسامبلەياسىنىڭ XXI سەسسياسىنان العان اسەرلەرىمەن بولىسكەن, جۇرگىزىلىپ وتىرعان تاتۋلىق پەن كەلىسىم ساياساتىنا قولداۋ ءبىلدىرگەن, سونداي-اق, مەملەكەت باسشىسىن جانە بارلىق وتانداستاردى قازاقستان حالقىنىڭ بىرلىگى كۇنىمەن قۇتتىقتاعان حاتتار كەلىپ ءتۇستى.
قازاقستاننىڭ ورىستار, سلاۆياندار جانە كازاكتار ۇيىمدارىنىڭ قاۋىمداستىعى توراعاسىنىڭ ورىنباسارى ا. كوتەنيوۆ قحا-نىڭ XXI سەسسياسى بۇدان ارعى جۇمىس ءۇشىن جىگەر بەرگەنىن اتاپ ءوتتى.
– ءسىزدىڭ «ءبىز ءبارىمىز – ءبىرتۇتاس قازاق حالقىنىڭ ءارتۇرلى ءارى تەڭ بالالارىمىز» دەگەن ءسوزىڭىز مەنىڭ جۇرەگىممەن ۇندەسە كەتتى, – دەپ جازادى اۆتور.
قازاقستان حالقى اسسامبلەياسىنىڭ سەسسياسىنا العاش رەت قاتىسقان سلاۆيان ەتنومادەني بىرلەستىگى توراعاسىنىڭ ورىنباسارى ۆ.جارينوۆ ءوز حاتىندا سەسسيا «قازاقستان-2050» ستراتەگياسىن جۇزەگە اسىرۋداعى اسا ماڭىزدى فاكتور رەتىندە تاريحتا قالاتىنى تۋرالى پىكىرىن بىلدىرگەن.
سەسسياعا قاتىسقان وڭتۇستىك قازاقستان وبلىسى سايرام اۋدانىنداعى وزبەك ەتنومادەني بىرلەستىگىنىڭ توراعاسى پ.يسلاموۆ تا ءوز كەزەگىندە «قازاقستان-2050» ستراتەگياسىن جۇزەگە اسىرۋعا, سونىڭ ىشىندە الەۋمەتتىك جوبالار ارقىلى دا قولدان كەلگەنىنشە ۇلەس قوسۋعا ءازىر ەكەنىن ايتقان.
قازاقستان حالقى اسسامبلەياسىنىڭ سەسسياسىنا ءوزىنىڭ العاشقى قاتىسۋىنان العان اسەرلەرىمەن پاۆلودار وبلىسىنداعى «بۋكوۆينا» رۋمىن مادەني قوعامى» قب توراعاسى ا. دياك تا بولىسەدى.
– سەسسيادا قازاقستاندىقتاردىڭ ءارقايسىسى ەل تاعدىرىنا, ورتاق شاڭىراعىمىزداعى تاتۋلىق پەن كەلىسىمدى قامتاماسىز ەتۋگە, ءوز حالقىمىزدىڭ ءتىلىن, ءمادەنيەتى مەن سالت-ءداستۇرىن جاڭعىرتۋعا جاۋاپتى ەكەنىن ايرىقشا سەزىندىم, – دەلىنگەن حاتتا.
قاراعاندى وبلىسىنداعى «Lituanica» ليتۆا ەتنومادەني بىرلەستىگىنىڭ توراعاسى ۆ.تۆاريوناس قازاقستان حالقى اسسامبلەياسى بىرلىگىمىزدىڭ ىرگەتاسى ەكەنىن, ال ءاربىر سەسسيا ازاماتتىق قوعامدى دامىتۋدىڭ جاڭا كەزەڭى بولىپ سانالاتىنىن اتاپ وتكەن.
– مەن اسسامبلەيا جۇمىسىن, ونىڭ ماڭىزى مەن ءمانىن جەكە وزىمە جانە اينالامداعى قازاقستاندىقتارعا قاتىستى باعالايمىن. ءسىزدىڭ جولىڭىز ءبىزدى حالىق بىرلىگىن ساقتاۋعا دەگەن زور قۇلشىنىس ارقىلى قوعام مەن مەملەكەتتى دامىتۋدىڭ دۇرىس باعىتىنا باستاپ كەلە جاتقانىنا سەنىمدىمىن, – دەلىنگەن حاتتا.
چەحتاردىڭ اقتوبەلىك مادەني-اعارتۋشىلىق ورتالىعىنىڭ جەتەكشىسى ۆ.پەسترۋ ءدال وسى قحا سەسسياسى ءتارىزدى اۋقىمدى شارالاردا ەلدىڭ قانشالىقتى بايتاق ەكەنىن, ەتنوستار مەن مادەنيەتتەردىڭ ارالۋاندىعىن سەزىنۋ مۇمكىندىگى تۋاتىنىن اتاپ وتكەن.
– قازاقستان حالقى اسسامبلەياسى ءمادەنيەتتەر ۇنقاتىسۋىنىڭ بىرەگەي ەۋرازيالىق ۇلگىسى بولىپ وتىر. قازاقستان جاھاندىق كونفەسسياارالىق ۇنقاتىسۋدىڭ ورتالىعىنا اينالدى. بىزدەر, قحا مۇشەلەرى, رەسپۋبليكا ومىرىنە بەلسەنە قاتىسۋ مۇمكىندىگى ءۇشىن سىزگە ريزامىز, – دەپ جازادى اۆتورلار.
تاراز قالاسىنان «التىن القا» يەگەرى ا.دۇيسەنبەكوۆا قازاقستان حالقى اسسامبلەياسىنىڭ XXI سەسسياسىن ءوز وتباسىمەن بىرگە ۇلكەن ىقىلاسپەن كورگەنىن ايتقان. ول فورۋمنىڭ ساليقالىلىعىن, ونداعى جارقىن سوزدەر مەن جىلى شىرايلى احۋالدى ايرىقشا اتاپ وتكەن.
قحا مۇشەسى س.ۆيشنياك ايتقانداي, مەملەكەت باسشىسى اسسامبلەيا سەسسياسىندا كوپتىڭ كوڭىلىندەگى ەڭ جىلى جانە ىزگى سەزىمدەردى قوزعاپ, ولاردىڭ كوكەيىنە تاتۋلىق, تىنىشتىق جانە تۇراقتىلىققا دەگەن ءۇمىت ۇيالاتتى.
– ءسىز قازاقستاننىڭ, قازاق دالاسىنىڭ وسىندا ءومىر ءسۇرىپ جاتقان بارشامىزدىڭ مەيىربان وتانىمىز ەكەنىن تاعى دا نىقتاي ءتۇستىڭىز.
پاۆلودار وبلىسىنان اعىلشىن ءتىلىنىڭ مۇعالىمى يۋ.وتت وزىنە مەملەكەت باسشىسىمەن ءبىر ساحنادا بىرگە بولۋ جانە اڭگىمەلەسۋ مۇمكىندىگى بۇيىرعانىن ەسكە الادى.
– وتكەن سەسسيا ەلىمىزدەگى ەڭ جارقىن شارالاردىڭ ءبىرى بولدى دەپ سانايمىن. ءبىر شاڭىراق استىندا بارلىق ۇلتتار مەن ەتنوستار وكىلدەرى باسقوسىپ, دوستىق, ءبىرلىك تۋرالى ايتتى, ۇمىتىلماس ساتتەردى باستارىنان وتكەردى. مەنىڭ ويىمشا, قازاقستان قوعامى ءوزىنىڭ پاراساتتىلىعىمەن ەرەكشەلەنەدى, مەن ونىڭ ءبىر بولشەگى ەكەنىم ءۇشىن باقىتتىمىن, – دەپ جازادى اۆتور.