كەڭەس وداعىنىڭ باتىرى, ايگىلى اسكەري ستراتەگ, داڭقتى جاۋىنگەر جازۋشى باۋىرجان مومىش ۇلىنىڭ ومىرىنە قاتىستى كەز كەلگەن دەرەك وقىرماندى بەيجاي قالدىرماسى انىق. بىرەر جىلدىڭ بەدەرىندە ەر باۋكەڭنىڭ باتاسىن سايتتار مەن الەۋمەتتىك جەلىلەردە جارىسا جازعاندار از بولعان جوق الايدا ولار اقيقاتىن جازدى ما؟ وسى ماسەلەگە قاتىستى باتىردىڭ نەمەرە ءىنىسى بەكەت مومىنقۇلعا حابارلاسقان ەدىك...
ب.مومىنقۇلدىڭ ايتۋىنشا, «باۋىرجان مومىش ۇلى قىرعىز رەسپۋبليكاسىنا اسكەري قىزمەتكە جىبەرىلدى», دەگەن اڭگىمە شىندىققا جاناسپايدى.
«كوزى ءتىرى كەزىندە-اق اتى اڭىزعا اينالعان قازاقتىڭ ءبىرتۋار پەرزەنتى باۋىرجان مومىش ۇلى تۋرالى ايتىلار اڭگىمە كوپ. ونىڭ ىشىندە «باۋىرجاننىڭ باتاسى» ەل اراسىندا كەڭىنەن تاراعان بولاتىن. الەۋمەتتىك جەلىنى اشىپ قالساڭىز, «باۋىرجاننىڭ باتاسىنىڭ» بىرنەشە نۇسقاسىن وقيسىز. ءتىپتى العىسوز رەتىندە مىنانداي دەرەك كەلتىرەدى:
« ۇلى وتان سوعىسى اياقتالعان سوڭ, باۋىرجان مومىش ۇلى بىشكەك قالاسىنا اسكەري قىزمەتكە جىبەرىلەدى. ول جولشىباي ءوزىنىڭ تۋعان جەرى – جۋالى اۋدانىنا (جامبىل وبلىسى) 4-5 كۇن ايالدايدى. باتىر اعامىزدىڭ جانىنا وبلىستىڭ, اۋداننىڭ ءبىراز باسشى قىزمەتكەرى ەرىپ جۇرەدى. اۋىل اقساقالدارىمەن بىرگە جاقسى سوزگە جانى قۇمار جاستار دا باۋكەڭنىڭ اڭگىمەسىن تىڭدايدى.
ساپارىنىڭ سوڭعى كۇنى باۋكەڭ جالعىز بالاسى سوعىستا قازا بولعان قاسىرەتتى قاريانىڭ ءبىرىنىڭ ۇيىنەن ءدام-تۇز تاتىپ شىقپاقشى بولادى. قانشا ءۇيدىڭ ءدامىن تاتسا دا, استان كەيىنگى باتا بەرۋدى اۋىل اعالارى ءوز مىندەتىنە الادى. ەندى ەلدەن اتتانار الدىنداعى ءدام-تۇزدىڭ باتاسىن بەرۋدى جۇرت باۋكەڭنەن وتىنەدى. باۋكەڭ ءسال ويلانادى دا, تەبىرەنە ءتۇسىپ, بىلايشا تەرمەلەپ كەتەدى...».
بۇل «العىسوز» وقىرماندى شاتاستىراتىنى انىق. باۋىرجان مومىش ۇلى « ۇلى وتان سوعىسى اياقتالعان سوڭ بىشكەك قالاسىنا قىزمەتكە جىبەرىلەدى» دەگەندى كىم جازسا دا جالعان جازعان», دەيدى ارداگەر قالامگەر.
ول باۋكەڭنىڭ ومىرىنە قاتىستى دەرەكتەردى بۇرمالاعاندارعا رەنجۋلى. جالعان اقپارات تاريح بەتتەرىنە سول كۇيى قاتتالىپ كەتە مە دەگەن كۇدىگى دە جوق ەمەس.
«بىرىنشىدەن, سوعىس اياقتالعان جىلدارى قىرعىز ەلىنىڭ استاناسى بىشكەك ەمەس, فرۋنزە دەپ اتالعان بولاتىن. ەكىنشىدەن, باۋىرجان مومىش ۇلى الگى قالاعا اسكەري قىزمەتكە جىبەرىلمەگەن. ولاي ايتىپ جۇرگەندەردىكى تاپ-تازا وتىرىك. ال جالعان ايتۋ كىمگە كەرەك؟
وسىدان ەكى-ءۇش جىل بۇرىن مەن باۋىرجان اتامىزدىڭ نەمەرەسى ءارى مۇراگەرى ەرجان مومىش ۇلىنان باۋكەڭنىڭ ۇيدەگى مۇراسى رەتىندە ساقتالعان ءبىراز قۇجاتتاردى الىپ زەرتتەدىم. سول كەزدە تالاي دۇنيەنى تاپتىم. سوندا باۋىرجان اتانىڭ ءوز قولىمەن جازعان باتاسىنىڭ نۇسقاسى قولىما ءتۇستى. باتا باۋكەڭنىڭ پىكىرىمەن بەرىلگەن. جالپى, باۋكەڭنىڭ باتاسىنا قاتىستى مىڭ قۇبىلعان اڭگىمەنى ويدان قۇراستىراتىندار تىزىگىن تارتسا ەكەن», دەيدى ول. اقيقاتتى اشىپ ايتقان بەكەت مومىنقۇل سوڭىرا بىزگە اتالعان باتانىڭ تۇپنۇسقاسىن ۇسىندى. قولجازبامەن جازىلعان ءماتىندى باۋكەڭ بىرنەشە مارتە تۇزەگەنى ايقىن اڭعارىلىپ تۇر.
جاس كەزىندە باتىردىڭ قاسىندا وتىرىپ, تالاي رەت تاعىلىمعا تولى اڭگىمەسىن تىڭداعان بەكەت مومىنقۇل باۋىرجان مومىش ۇلىنا قاتىستى جازىلعان ماقالالارداعى اسىرا سىلتەۋلەرگە ۇدايى رەنجىپ جۇرەدى. ء«وزى بىلمەيتىن دۇنيەنى بىلەتىندەردەن سۇراۋ كەرەك قوي», دەيدى ارداگەر جۋرناليست. ونىكى ابدەن دۇرىس. قانشا دەگەنمەن اڭىز ادامنىڭ نەمەرە ءىنىسى. كوپ ەل بىلمەيتىن دۇنيە وعان ەتەنە تانىس. سوندىقتان تاريحي تۇلعالار تۋرالى جازعاندا اباي بولعان ءجون سەكىلدى.
جامبىل وبلىسى