قوعامدىق دەنساۋلىق ساقتاۋ ماماندارى امەريكا قۇراما شتاتتارى مايمىل شەشەگى ۆيرۋسىنىڭ ءورشۋىن ەندى ۇستاپ تۇرا المايتىنىن ەسكەرتتى. بۇعان ەلدە اۋرۋ جۇقتىرۋ وقيعالارىنىڭ سانى 3 مىڭعا جۋىقتاعانى سەبەپ بولىپ وتىر, دەپ حابارلايدى Egemen.kz News CN-گە سىلتەمە جاساپ.
اقش-تىڭ اۋرۋلاردى باقىلاۋ جانە الدىن الۋ جونىندەگى ورتالىقتارىنىڭ سوڭعى مالىمەتتەرىنە سايكەس, ۆيرۋس جۇقتىرۋ جاعدايلارىنىڭ سانى جاعىنان نيۋ-يورك شتاتى كوش باستاپ تۇرسا (900 ادام), سودان كەيىن كاليفورنيا (356) جانە فلوريدا (257) تۇر.
دەنساۋلىق ساقتاۋ سالاسىنداعى ساراپشىلاردىڭ پىكىرىنشە, اقش-تاعى تەستىلەۋدىڭ پروبلەمالىق اسپەكتىلەرىن ەسكەرە وتىرىپ, مايمىل شەشەگى ۆيرۋسىن جۇقتىرۋ جاعدايلارىنىڭ سانى دۇرىس ەسەپتەلمەۋى مۇمكىن. جۇما كۇنى ەلدە بالالاردىڭ مايمىل شەشەگى ۆيرۋسىنا شالدىعۋىنىڭ ەكى جاعدايى راستالعان. قوعامدىق دەنساۋلىق ساقتاۋ قىزمەتكەرلەرى ولاردىڭ ۆيرۋستى قالاي جۇقتىرعانىن تەكسەرۋدە.
ميچيگان ۋنيۆەرسيتەتىندەگى جۇقپالى اۋرۋلار جونىندەگى مامان پريتي ءمالانيدىڭ ايتۋىنشا, ەلدەگى دەنساۋلىق ساقتاۋ سالاسى كوپتەگەن اسپەكتىلەر, سونىڭ ىشىندە سىناقتان تەز وتكىزۋ جانە مۇقتاج ناۋقاستاردىڭ ەم الۋعا قول جەتكىزۋ جاعىنان ارتتا قالىپ وتىر.
ەل شەنەۋنىكتەرى تەستىلەۋدى كەڭەيتىپ, ونداعان مىڭ ۆاكتسينانى قولجەتىمدى ەتتى. الايدا شەكتەۋلى ۆاكتسينا سۇرانىسقا سايكەس كەلمەدى. ساراپشىلار فەدەرالدى باسقارمانى اۋرۋدىڭ ءورشۋىن ۇستاپ تۇرۋ ءۇشىن كەڭەيتىلگەن شارالار قابىلداۋعا ۇندەدى.