سوفيادا سايىسقا تۇسەدى

تاەكۆوندودان الەم چەمپيوناتىنىڭ تۇساۋى 1973 جىلى وڭتۇستىك كورەيانىڭ استاناسى – سەۋلدە كەسىلدى. سودان كەيىن سپورتشىلار ءار ەكى جىل سايىن الەمنىڭ ءار قيىرىندا باس قوسىپ, ءتۇرلى ءتۇستى مەدالداردى ساراپقا سالدى. 24 مارتە ۇيىمداستىرىلعان اتالعان جارىستا ەڭ كوپ ولجاعا كورەيالىقتار كەنەلدى. وزدەرى ويلاپ تاپقان سپورت تۇرىندە ولار بارلىعى 239 (171 التىن+32 كۇمىس+36 قولا) مەدال ولجالادى. ەكىنشى ورىندى يسپانيا (22+26+63) يەلەنسە, ءۇشىنشى ساتىعا تايپەي (15+27+63) جايعاستى. ۇزدىك بەستىكتىڭ قاتارىندا تۇركيا (15+21+33) مەن يران (14+21+22) بار. سونداي-اق توپ-10 كوماندانىڭ قاتارىنا اقش (13+21+49), قىتاي (12+13+16), ۇلىبريتانيا (7+8+8), گەرمانيا (6+12+34) جانە فرانتسيانىڭ (6+11+17) ورەندەرى قوسىلدى. بۇل باسە­كەدە بارلىعى 33 ەلدىڭ وكىلدەرى التىن تۇعىرعا كوتەرىلسە, جۇلدە العان مەملەكەتتەردىڭ جالپى سانى – 73.

تورتكۇل دۇنيەنىڭ تەڭدەسسىزدەرى جي­نالعان جارىسقا قازاقستاننىڭ ۇلتتىق قۇراماسى 1993 جىلدان بەرى ۇزدىكسىز قاتىسىپ كەلەدى. العاشقى ءۇش جارىستا جولىمىز بولمادى. نيۋ-يورك, مانيلا جانە گونكونگتاعى باسەكەلەردە تەگىستەي ۇتىلدىق. 1999 جىلى ەدمونتوندا شى­مىلدىعى تۇرىلگەن چەمپيوناتتا قا­­زاق جانكۇيەرلەرى العاش رەت مە­دال­دىڭ سىڭ­­عىرىن ەستىدى. ۇيەڭكى جاپى­راق­تار ەلىندە 84 كيلو سالماقتا سىنعا تۇس­­كەن ءادىلحان ساعىندىقوۆ قولا مە­دال­­دى موينىندا جارقىراتتى. ازيا ويىن­دارىنىڭ قولا جۇلدەگەرى دەگەن اتاعى بار قانداسىمىز يراندىق مادجي افلاكي مەن تۇركيالىق ياسين ياگيزدەن قالىپ قويدى.

2003 جىلى چەدجۋدەن قورجىنى­مىز بوس قايتسا, 2005 جىلى گەرمانيا­نىڭ گارميش-پارتەنكيرحەن قالاسىندا ليا نۇركينا ءۇشىنشى ورىنعا تابان تىرەدى. قازاق قىزى وليمپيادا چەمپيونى لي سون حي مەن حورۆاتيالىق ساندرا ءچاريچتى العا جىبەردى. 2005 جىلى مادريدتە قايتا ساتسىزدىككە ۇشى­راساق, 2007 جىلى بەيجىڭدە مول ولجا­عا كەنەلدىك. اسپاناستى ەلىندە اسلان باتىقۇلوۆ (54 كيلو), ارمان شىل­مانوۆ (84 كيلو) جانە نازگۇل تاجى­عۇلوۆا (54 كيلو) قولا مەدال يەلەن­دى. وسى كورسەتكىشتىڭ ارقاسىندا قازاق­ستان قۇراماسى ءوز تاريحىندا تۇڭ­عىش رەت جالپى ەسەپتە توپ-15 كوماندانىڭ قاتارىنا قوسىلدى. ول كەزدە رەسپۋب­لي­كالىق فەدەراتسيانى شام­سات يسابە­كوۆ باسقارسا, ۇلتتىق قۇرا­مانى بىلىكتى باپكەر ماقسۇت نارباەۆ جاتتىقتىرعان ەدى.

2009 جىلى كوپەنگاگەندە اسا اۋىر سالماقتا ايقاسقان ارمان شىلمانوۆ قايتا ءۇشىنشى ورىندى ەنشىلەدى. سو­دان ءبىر جىل بۇرىن عانا قازاقتىڭ قاي­سار ۇلى بەيجىڭدە الاۋى تۇتانعان وليمپيا ويىندارىندا قولا مەدال ولجالاعان ەدى. دانيانىڭ استاناسىندا ءماليدىڭ مارقاسقاسى, الەم چەم­پيونى دابا موديبو كەيتا توپ جارسا, كورەيالىق نام يۋن باي ەكىنشى ورىندى يەمدەندى. جالپى, وتاندىق تاەكۆوندو تاريحىندا شىلمانوۆتىڭ شوقتىعى وزگەلەردەن الدەقايدا بيىك ەكەنى داۋسىز. جوعارىداعى اتاقتاردان بولەك, ارمان ازيا چەمپيوناتىندا بەس (1+2+2) جانە ازيا ويىندارىندا ءۇش (0+0+3) جۇلدە الدى. ەلىمىزدىڭ بىردە-ءبىر دايان شەبەرى ءدال وسىنداي اتاعىمەن ماقتانا المايدى.

وسىنداي ەلەۋلى تابىستاردان كەيىن قازاقستان تاەكۆوندوسى قۇلدىراۋ كە­زەڭىن باسىنان كەشىردى. 2011 جىلى كەندجۋ, 2013 جىلى پۋەبلا-دە-سارا­گوسا جانە 2015 جىلى چەليابىدە وتكەن جارىستاردا جىگەرسىزدىك تانىتقان جەرلەستەرىمىز جانارىمەن جەر شۇقىدى. 2017 جىلى وڭتۇستىك كورەيانىڭ مۋدجۋ شاھارىندا 74 كيلو سالماقتا كۇش سىناسقان قايرات سارىمساقوۆ سۋىرىلىپ شىقتى. ونىڭ الدىندا ازيا ويىندارى مەن قۇرلىق بىرىنشىلىگىندە قوس قولانى قانجىعاسىنا بايلاعان قانداسىمىز بۇل جولى دا ءدال سول مەجەدەن كورىندى.

2019 جىلعى جارىستى ۇلىبريتانيا­نىڭ مانچەستەر قالاسى قابىلدادى. تۇماندى البيون ەلىندە دە جالقى قو­لاعا قول سوزدىق. بۇل جولى دا قايرات سارىمساقوۆ ءۇشىنشى ورىنعا تۇراقتا­دى. جالپى, سول چەمپيوناتتا الەمدىك تاەۆكوندونىڭ كوشباسشىسى وڭتۇستىك كورەياعا جارىس قوجايىندارى اجەپتاۋىر قارسىلىق كورسەتتى. دەسەك تە شەشۋشى تۇستا نامىستارىن قامشىلاعان كورەيلەر (4+1+2) جالپى ەسەپتە كوش باستادى. بريتاندىقتار (3+0+1) ەكىنشى ورىندى ەنشىلەسە, قىتاي قۇراماسى (2+2+3) ءۇشىنشى ساتىعا تابان تىرەدى. ولجاعا كەنەلگەن كوماندالار قاتارىندا تايلاند (2+0+1), رەسەي (1+2+1), تۇركيا (1+1+2), ازەربايجان (1+0+1), كۋبا (1+0+0) جانە يتاليا (1+0+0) بار.