قر سىبايلاس جەمقورلىققا قارسى ءىس-قيمىل اگەنتتىگى ءىرى كولەمدە اقشا بوپسالادى دەگەن كۇدىكپەن قاماۋعا الىنعان جۋرناليست-بلوگەر ماحامبەت ابجاننىڭ وتباسى مۇشەلەرىنىڭ بانكتىك شوتىنا شەكتەۋ قويىلعانىن جوققا شىعاردى, دەپ حابارلايدى Egemen.kz انتيكورعا سىلتەمە جاساپ.
«كۇدىكتى م. ابجاننىڭ وتباسى مۇشەلەرىنىڭ, ونىڭ ىشىندە كامەلەتكە تولماعان بالالارىنىڭ بانكتىك شوتتارىنا شەكتەۋ قويىلعانى تۋرالى Telegram ارنالاردىڭ بىرىندە اقپارات تارادى. بۇل اقپاراتتىڭ شىندىققا سايكەس كەلمەيتىنىن حابارلايمىز», دەپ مالىمدەدى انتيكوردىڭ ءباسپاسوز قىزمەتى.
حابارلامادا ايتىلعانداي, تەرگەۋ اياسىندا كۇدىكتىنىڭ بانكتىك شوتىنا عانا شەكتەۋ قويىلعان.
«جالعان اقپارات قوعامدىق پىكىردى باسقارۋ جانە تەرگەۋگە اسەر ەتۋ ماقساتىندا تاراتىلادى. ازاماتتاردان رەسمي اقپارات كوزىنە سۇيەنۋىن سۇرايمىز», دەپ حابارلايدى اگەنتتىكتەن.
ەسكە سالا كەتەيىك, بلوگەر ماحامبەت ابجان كاسىپكەردەن 50 ملن تەڭگە بوپسالادى دەگەن كۇدىكپەن قاماۋعا الىنعان ەدى.
5 شىلدەدە نۇر-سۇلتان قالاسىنىڭ مامانداندىرىلعان اۋدانارالىق تەرگەۋ سوتى كۇدىكتىگە قاتىستى 2 اي كۇزەتپەن ۇستاۋ شاراسىن سانكتسيالادى.