ۇلىتاۋ وبلىسىنىڭ بيۋدجەتى بەكىتىلدى

«وبلىس بيۋدجەتى قاراعاندى وبلىسىنىڭ بيۋدجەتىن ءبولۋ جانە اۋداندار (قالالار) بيۋدجەتتەرىنەن بەرىلەتىن ترانسفەرتتەر ەسەبىنەن قالىپتاستىرىلدى. قاراعاندى وبلىسىنىڭ 610 ملرد 161,3 ملن تەڭگەنى قۇرايتىن بيۋدجەتىن ءبولۋ كەزىندە ۇلىتاۋ وبلىسىنىڭ بيۋدجەتىنە تۇسىمدەر ۇلەسى 17 پايىزدى نەمەسە 103,5 ملرد تەڭگەنى, ال شىعىستار ۇلەسى 15,6 پايىزدى نەمەسە 95,3 ملرد تەڭگەنى قۇرادى. وبلىس اۋماعىندا «قازاقمىس» كومپانيالار توبىنىڭ 9 كاسىپورنىن قايتا تىركەۋگە بايلانىستى بيۋدجەت كىرىسىنە قوسىمشا تاعى 8,2 ملرد تەڭگە تۇسەدى. بۇل وبلىستىڭ جاڭادان قۇرىلۋ ساتىسىندا بيۋدجەت ءۇشىن ەرەكشە ماڭىزعا يە», دەلىنگەن ۇلىتاۋ وبلىسى اكىمدىگى ءباسپاسوز قىزمەتىنىڭ مالىمەتىندە.

2022 جىلعا ارنالعان وبلىس بيۋدجەتىنىڭ كىرىس بولىگى قوسىمشا تۇسىمدەرمەن بىرگە 29,8 ملرد تەڭگەنى قۇرادى. اۋداندار مەن قالالاردان تۇسەتىن ترانسفەرتتەر 13,8 ملرد تەڭگەگە جەتتى. وسى جىل بيۋدجەتىنىڭ بارلىق تۇسىمدەرى 43,7 ملرد تەڭگە بولدى (نىسانالى ترانسفەرتتەرسىز جانە سۋبۆەنتسيالارسىز).

«الداعى بيۋدجەتتى ناقتىلاۋ كەزىندە قوسىمشا تاعى 83 ملرد تەڭگە كوزدەلەدى. ونىڭ ىشىندە 23,5 ملرد تەڭگە رەسپۋبليكالىق بيۋدجەتتەن سۋبۆەنتسيا, 33,7 ملرد تەڭگە نىسانالى ترانسفەرت, 10,7 ملرد تەڭگە وڭىرلەرگە ترانسفەرت, اسىرا ورىنداۋ ەسەبىنەن - 15 ملرد تەڭگە. بيۋدجەت شىعىستارىنىڭ نەگىزگى ۇلەسى الەۋمەتتىك سالاعا تيەسىلى. بۇل سالاعا جالپى شىعىستاردىڭ 54 پايىزى (16,2 ملرد تەڭگە), تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارىنا – 14 پايىز, اۋىل شارۋاشىلعى جانە ۆەتەرينارياعا 3 پايىز باعىتتالادى», دەلىنگەن حابارلامادا.

وبلىستىق بيۋدجەتتىڭ شىعىستارى 30,8 ملرد تەڭگە كولەمىندە بەكىتىلدى. بۇل قاراجاتتىڭ 82,8 پايىزى اعىمداعى شىعىستارعا ء(بىرىنشى كەزەكتەگى شىعىستار - جالاقى, ستيپەنديالار, مەملەكەتتىك مەكەمەلەردى, مەكتەپتەردى, مادەنيەت, دەنساۋلىق ساقتاۋ وبەكتىلەرىن, كوللەدجدەردى جانە ت. ب. ۇستاۋعا), 14,5 پايىزى ءتۇرلى جوبالاردى ىسكە اسىرۋعا باعىتتالادى.

وسى جىلدىڭ باسىنان باستاپ قاراعاندى وبلىسىنىڭ بيۋدجەتىنەن باستالعان جوبالارعا جۇمسالاتىن شىعىندار ۇلىتاۋ وبلىسىنىڭ بيۋدجەتىندە بەكىتىلگەنىن اتاپ ءوتۋ كەرەك. بۇل – مەكتەپتەردى پاندەر بويىنشا مۋلتيمەديالىق جانە ينتەراكتيۆتى كابينەتتەرمەن جابدىقتاۋ, ۇلىتاۋ اۋدانىنىڭ سارىسۋ, بورسەڭگىر اۋىلدارىنىڭ 2 مەكتەبىن كۇردەلى جوندەۋ, جەزقازعان قالاسىنىڭ ونكولوگيالىق ورتالىعىن جوندەۋ, وبلىستىق ماڭىزى بار اۆتوموبيل جولدارىن ورتاشا جوندەۋ, قالالار مەن اۋدانداردىڭ اۆتوموبيل جولدارىن ورتاشا جوندەۋ, جەزقازعان قالاسىنىڭ تازارتۋ قۇرىلىستارىن قايتا جاڭارتۋ, جاڭاارقا كەنتىنىڭ نەگىزگى سۋ تارتقىشىن قايتا جاڭارتۋ سىندى ءىرى شىعىستار.