سەمسەرلەسۋشىلەر سەنىمدى اقتاي ما؟

سەمسەرلەسۋشىلەردىڭ الەم چەمپيوناتى سوناۋ 1921 جىلدان بەرى ۇيىمداستىرىلىپ كەلەدى. سول 101 جىل ارالىعىندا كسرو مەن رەسەي سپورتشىلارى ەڭ كوپ ولجاعا كەنەلدى. ولار 322 (148 التىن+86 كۇمىس+88 قولا) مەدالعا قول جەتكىزدى. يتاليانىڭ كوش باسىنداعى كوماندادان جۇلدەلەر سانى كوپ بولعانىمەن, ساپاسى جاعىنان رەسەيلىكتەرگە ەسە جىبەرىپ, جالپى ەسەپتە ەكىن­شى ورىندى يەلەنۋدە. اپەن­نين تۇبەگىنىڭ تۇلەكتەرى 350 (116+103+131) جۇلدە ولجالادى. ءۇشىنشى ورىندا – فرانتسيا قۇرا­ماسى (91+90+95). سونداي-اق وزىق 10 كوماندانىڭ ساناتىندا ماجارستان (91+86+94), گەرمانيا (47+56+57), پولشا (17+29+39), رۋمىنيا (13+25+29), ۋكراينا (12+12+17), اقش (10+12+11) جانە قىتايدىڭ (8+19+17) ورەندەرى بار. اتالعان جارىستا بارلىعى 24 مەملەكەتتىڭ ءانۇرانى شىرقالىپ, 38 ەلدىڭ تۋى بيىكتە جەلبىرەدى. وكىنىشكە قاراي, ولاردىڭ قاتارىندا قازاقستاننىڭ بىردە-ءبىر سەمسەرلەسۋشىسى جوق.

«قازىرگى كەزدە قاي كوماندانىڭ قارقىنى كۇشتى؟» دەگەن ساۋالعا تۇششىمدى جاۋاپ الۋ ءۇشىن سوڭ­عى بەس الەم چەمپيوناتىنىڭ ناتي­جەلەرىنە زەر سالعان ءجون. ماسەلەن, 2015 جىلى ماسكەۋدە ۇيىمداستىرىلعان جارىستا ءتورت التىننان ولجالاعان رەسەي مەن يتاليا كومبەگە بىردەي جەتتى. بىراق كۇمىس مەدالدارى ارتىق جارىس قوجايىندارى جالپى ەسەپتە كوش باستادى. رەسەيلىكتەر 9 (4+4+1) جۇلدە السا, يتاليالىقتار 5 (4+0+1) مەدالدى قورجىنعا سالدى. ءۇشىنشى ورىندا – ۋكراينا (1+1+1).

2016 جىلى ريو-دە-جانەيرودا سەمسەرلەسۋ سپورتىنىڭ وليمپيا­دا باعدارلاماسىنا ەنبەگەن تۇر­لەرى بويىنشا باسەكەلەر ۇيىم­داستىرىلدى. ياعني شپاگادان ەرلەردىڭ جانە راپيرادان ايەل­دەردىڭ كوماندالىق سايىستارى ءوتتى. بۇل باسەكەنىڭ ەكەۋىندە دە رەسەيدىڭ باعى جاندى. ماجارستان مەن يتاليا فينالدا ۇتىلسا, رۋمىنيا مەن فرانتسيا ءۇشىنشى ساتىعا تابان تىرەدى. 2017 جىلى لەيپتسيگتە يتاليانىڭ ورەندەرى (4+1+4) الدارىنا جان سالمادى. ەكىنشى جانە ءۇشىنشى ورىنداردى رەسەي (3+0+3) مەن وڭتۇستىك كورەيا (1+2+0) يەلەندى.

2018 جىلى قىتايدىڭ ۋسي قالاسىندا دا اپەننين تۇبەگىنەن كەلگەن ساڭلاقتاردىڭ (4+2+1) اسىعى الشىسىنان ءتۇستى. وڭتۇستىك كورەيانىڭ وعلاندارى (2+2+3) ەكىنشى ورىن السا, اقش (2+2+2) ۇزدىك ۇشتىكتى تۇيىندەدى. قازاقتان قۇراما كومانداسى مۇشەلەرى اراسىنان دميتري الەكسانيننىڭ جەڭىس تۇعىرىنا كوتەرىلۋىنە جاقسى مۇمكىندىگى بولدى. دۇنيەجۇزىلىك ۋنيۆەرسيادانىڭ قولا جۇلدەگەرى دەگەن اتاعى بار 26 جاستاعى الماتى قالاسىنىڭ تۋماسى شيرەك فينالعا دەيىن جەتكەنىمەن, بۇل مەجەدە وليمپيا ويىندارىنىڭ جەڭىمپازى, الەمنىڭ ەكى جانە ەۋروپانىڭ ءتورت دۇركىن چەمپيونى, فرانتسيالىق ياننيك بورەلگە جول بەردى.

2019 جىلعى دۇنيەجۇزىلىك دودانى بۋداپەشت قالاسى قابىلدادى. دۋنايدىڭ جاعالاۋىنداعى جارىستا رەسەي سپورتشىلارى (3+3+1) وزدى. فرانتسيا (2+3+0) مەن وڭتۇستىك كورەيانىڭ (2+0+2) ءانۇرانى ەكى مارتە شىرقالسا, ماجارستان (1+2+0), ۋكراينا (1+1+2), قىتاي (1+1+0), اقش (1+0+1) جانە برازيليا دا (1+0+0) تابىستى ونەر كورسەتتى. اتالعان جارىستاردىڭ تالايىندا توپ جارىپ, ۇنەمى الدىڭعى لەكتە جۇرگەن يتاليالىقتارعا بۇل جولى باس جۇلدە بۇيىرمادى. بارلىعى ءبىر كۇمىس پەن جەتى قولانى قاناعات تۇتقان ولار كوماندالىق ەسەپتە توعىزىنشى ورىندا قالىپ قويدى. ۇلىبريتانيا ءبىر كۇمىسپەن كۇپتەلسە, گونكونگ, گرەكيا, يران, رۋمىنيا جانە شۆەيتساريا جالقى قولانى ەنشىلەدى.

ماجارستاننىڭ استاناسىندا قازاقستاننىڭ سەمسەرلەسۋشىلەرى اراسىنان رۋسلان قۇربانوۆ ەڭ جاقسى ناتيجە كورسەتتى. دۇنيەجۇزىلىك ۋنيۆەرسيادانىڭ ەكى دۇركىن جۇلدەگەرى شپاگادان وتكەن سايىستا ۇزدىك سەگىز سپورتشىنىڭ قاتارىنا قوسىلدى. جارىستى وتە قارقىندى باستاعان جەرلەسىمىزدىڭ شيرەك فينالدا ەۋروپا چەمپيوناتىنىڭ كۇمىس جۇلدەگەرى, ۋكراينالىق يگور رەيزلينگە ءالى جەتپەدى. ءدال سول رەيزلين اتالعان جارىستا كۇمىس پەن قولا مەدال السا, 2021 جىلى توكيودا الاۋى تۇتانعان وليمپيا ويىندارىندا ءۇشىنشى ورىندى يەمدەندى.

ال كايردەگى جارىستا قازاق ەلى نامىسىن رۋسلان قۇربانوۆ, ەلمير ءالىمجانوۆ, دميتري الەكسانين, ۆاديم شارلايموۆ, ەرلىك سەرتاي (شپاگا, ەرلەر), سوفيا نيكولايچۋك (شپاگا, ايەلدەر), ارتەم ساركيسيان, نازارباي ساتتارحان, مۇحامەدالى ءراحمانالى, جانات نابيەۆ (شپاگا, ەرلەر), تاتيانا پريحودكو, ايگەرىم سارىباي, كارينا دوسپاي, اناستاسيا گۋليك جانە تاتيانا پريحودكو (شپاگا, ايەلدەر) سىندى ساڭلاقتار قورعايدى. مىسىردا جەرلەستەرىمىزگە ەڭ بولماعاندا ءبىر جۇلدە بۇيىرسا دەگەن تىلەكتىڭ ۇستىندە وتىرمىز.