قر قارجى مينيسترلىگى بىرنەشە شەت مەملەكەتتەن قولما-قول شەتەل ۆاليۋتاسىن دەكلاراتسيالاعان 340 قازاقستاندىققا قاتىستى اقپارات سۇراتتى, دەپ حابارلايدى Egemen.kz.
«قارجى مينيسترلىگى ەۋرووداققا, تۇركياعا جانە ءباا-گە اتالعان ەلدەردىڭ كەدەندىك اۋماعىنا كىرۋ كەزىندە قولما-قول شەتەل ۆاليۋتاسىن دەكلاراتسيالاعان 340 قازاقستان رەزيدەنتى بويىنشا اقپارات بەرۋ تۋرالى سۇراۋ جىبەردى», دەپ مالىمدەدى ەكونوميكالىق رەسۋرستاردىڭ زاڭسىز شوعىرلانۋىنا قارسى ءىس-قيمىل ماسەلەلەرى جونىندەگى ۆەدومستۆوارالىق كوميسسيا.
سونىمەن قاتار كوميسسيا رەزونانس تۋدىرعان ىستەردى تەرگەۋ بارىسىنداعى حالىقارالىق ىنتىماقتاستىق اياسىندا اتقارىپ جاتقان جۇمىس ناتيجەلەرىن ورتاعا سالدى.
«باس پروكۋراتۋرا تەرگەپ-تەكسەرۋ ورگاندارىنا ۇرلانعان اكتيۆتەردى شەتەلدەن قايتارۋ بويىنشا قادامدىق الگوريتمدەر, ادىستەمەلەر مەن سۇراۋ سالۋ ۇلگىلەرىن دايىندادى. ءاربىر ءىس بويىنشا اكتيۆتەردى قايتارۋ ستراتەگياسى ازىرلەنۋدە, سونىمەن قاتار قارجىلىق تەرگەپ-تەكسەرۋلەر – «اقشانىڭ ىزىنە ءتۇس» تۇجىرىمداماسى ىسكە اسىرىلۋدا. اكتيۆتەرگە تىيىم سالۋ, توقتاتىپ قويۋ ماقساتىندا جەدەل شارالار قابىلدانۋدا. ول ءۇشىن «Carin» (ەۋروپا) جانە «Arin AP» (ازيا جانە تىنىق مۇحيتى ايماعى) شەتەلدىك اقپارات الماسۋ جەلىلەرى پايدالانىلادى. سونداي-اق باس پروكۋراتۋرا دۇنيەجۇزىلىك بانكتىڭ جانە بۇۇ-نىڭ ەسىرتكى جانە قىلمىس جونىندەگى باسقارماسىنىڭ ۇرلانعان اكتيۆتەردى قايتارۋ جونىندەگى باستاماسىمەن ىنتىماقتاستىق ورناتتى», دەلىنگەن كوميسسيا اقپارتىندا.