بەيجىڭ قالاسىندا «6+5» فورماتىندا شانحاي ىنتىماقتاستىق ۇيىمىنا مۇشە مەملەكەتتەردىڭ ۇلتتىق ۇيلەستىرۋشىلەرى جانە شىۇ جانىنداعى باقىلاۋشى مەملەكەتتەردىڭ قۇزىرەتتى وكىلدەرى اراسىندا ۇيىمنىڭ تاريحىندا العاشقى كەزدەسۋ ءوتتى.
شىۇ-عا مۇشە مەملەكەتتەردىڭ, شىۇ حاتشىلىعى مەن ايماقتىق لاڭكەستىككە قارسى قۇرىلىمنىڭ اتقارۋشى كوميتەتىنىڭ وكىلدەرى ءوز سوزدەرىندە ۇيىم جانىنداعى باقىلاۋشى مەملەكەتتەرمەن ىنتىماقتاستىقتى ودان ءارى نىعايتۋعا نيەت ءبىلدىردى. اتالعان ىنتىماقتاستىق شىۇ-نىڭ الەۋەتىن ارتتىرۋعا, وسى ۇيىم جۇمىسىنىڭ ناتيجەلىلىگىن كەڭەيتۋگە مۇمكىندىك بەرەدى جانە وعان كىرەتىن مەملەكەتتەردىڭ مۇددەلەرىنە ءتيىمدى بولادى, دەپ اتاپ ءوتتى ولار.
باقىلاۋشى مەملەكەتتەر وكىلدەرى شىۇ ءىس-شارالارىنا ءتۇرلى دارەجەلەردە قاتىناسۋىن بەلسەندى ەتۋگە قىزىعۋشىلىق ءبىلدىردى.
قازاقستاندىق دەلەگاتسيانى شانحاي ىنتىماقتاستىق ۇيىمى قىزمەتىنىڭ ماسەلەلەرى جونىندەگى ۇلتتىق ۇيلەستىرۋشى, سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى شاحرات نۇرىشەۆ باسقاردى.
قازاقستان دەلەگاتسياسىنىڭ باسشىسى ءوز سوزىندە شىۇ جانىنداعى باقىلاۋشى مەملەكەتتەرمەن بىرلەسكەن ىنتىماقتاستىق كوميتەتتەرىن نەمەسە ناقتى باعىتتارى جونىندەگى بايلانىس توپتارىن قۇرۋ تۋرالى, سونىمەن قاتار, باقىلاۋشى مەملەكەتتەرگە شىۇ-عا مۇشە مەملەكەتتەردىڭ رەسمي اشىق قۇجاتتارىن جولداۋدىڭ مۇمكىندىگى بار ەكەنىن اتاپ ءوتتى.
«ەگەمەن-اقپارات».