پارلامەنت سەناتى توراعاسىنىڭ ورىنباسارى قايرات يششانوۆ پەن سەناتتىڭ ەكونوميكالىق دامۋ جانە كاسىپكەرلىك كوميتەتىنىڭ حاتشىسى سارسەنباي ەڭسەگەنوۆ ايماقتارعا ساپارلارى اياسىندا اتىراۋ وبلىسىنىڭ ماحامبەت اۋدانىندا بولدى, دەپ حابارلادى وسى پالاتانىڭ ءباسپاسوز قىزمەتى.
دەپۋتاتتار بەيبارىس جانە سارايشىق اۋىلدارىنداعى شارۋاشىلىقپەن اينالىساتىن مەكەمەلەردە بولىپ, ەڭبەككەرلەرگە مەملەكەت باسشىسىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» حالىققا جولداۋىنىڭ نەگىزگى باعىتتارى تۋرالى اڭگىمەلەپ بەردى.
سەناتورلار, سونداي-اق, كۇنىنە 3 مىڭ ليتر ءسۇت وندىرىلەتىن ءسۇت فەرماسىنىڭ جۇمىسىمەن جانە ەشكى ءسۇتى وندىرىلەتىن «اتىراۋاگروونىمدەرى» شارۋا قوجالىعىنىڭ تەحنولوگيالىق ۇدەرىستەرىمەن تانىستى. كەلەشەكتە مۇنداعى ەشكى وسىرەتىن شارۋاشىلىقتا 40-قا جۋىق ءونىم ءوندىرۋ جوسپارلانىپ وتىر.
سەنات توراعاسىنىڭ ورىنباسارى فەرمەرلەردى ەلىمىزدەگى اگروونەركاسىپ كەشەنىن دامىتۋ ءۇشىن زاڭ جۇزىندە بارلىق جاعداي جاسالعانى تۋرالى حاباردار ەتتى. 2013 جىلدىڭ سوڭىندا پارلامەنت دەپۋتاتتارى اگرارلىق سەكتوردى مەملەكەتتىك قولداۋدىڭ زاڭنامالىق نەگىزدەرىن جاساۋعا جانە بىرقاتار جاڭا تەتىكتەرمەن قامتاماسىز ەتۋگە, سونداي-اق, قازاقستاننىڭ دسۇ-عا كىرەردىڭ الدىندا باسەكەگە قابىلەتتىلىكتى ارتتىرۋعا باعىتتالعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اگروونەركاسىپ كەشەنى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قابىلدانعان بولاتىن.
ودان باسقا, فەرمەرلەردى قولداۋ ءۇشىن ۇزاق مەرزىمدى قارجىلاندىرۋعا تىكەلەي قول جەتكىزۋدى قامتاماسىز ەتۋ ارقىلى ولاردىڭ اۋىل شارۋاشىلىعىندا بيزنەستى دامىتۋىنا بەلسەندى تۇردە جاردەمدەسۋ, اۋىلداعى ءونىم وندىرۋشىلەردى ءتيىمدى كەپىلدەندىرۋ جانە ساقتاندىرۋ جۇيەسىن قۇرۋ, سونداي-اق, وتكىزۋ نارىقتارىنا ەركىن كىرۋىن قامتاماسىز ەتۋ مۇمكىندىكتەرى قاراستىرىلىپ وتىر.