بيىل ءتۇستى مەتاللۋرگيا ءوندىرىسىنىڭ كولەمى 7,6 پايىزعا ارتقان, دەپ حابارلايدى Egemen.kz.
يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە, كوپتەگەن كاسىپورىنداردا ونەركاسىپتى مودەرنيزاتسيالاۋ بويىنشا جۇمىستار جۇرگىزىلىپ, جاڭا جوبالار ىسكە قوسىلۋدا.
«ماسەلەن, «التىنالماس اك» اق كومپانياسى جامبىل وبلىسىنداعى «اقباقاي» التىن كەن ورنىنىڭ وندىرىستىك الاڭدارىندا مودەرنيزاتسيا جۇزەگە اسىرۋدا. وسىعان وراي كەن بارلاۋ جۇمىستارىندا پايدالانىلاتىن قۇرال-جابدىقتار جاڭارتىلىپ, ديىرمەن قۇرىلىسى اياقتالدى جانە قاجەتتى تەحنيكالار ساتىپ الىندى. سونداي-اق «تسيفرلىق كەن ورنى» جوباسىن وندىرىسكە ەنگىزۋ اياسىندا SCADA قاشىقتان باسقارۋ باعدارلاماسى قولدانىلماق», دەيدى يدم مينيسترلىگى.
سونىمەن قاتار فازا-2 التىن الۋ فابريكاسىن ىسكە قوسۋ دا كوزدەلىپ وتىرعانىن ايتتى. اتالعان كاسىپورىن التىن رۋدالارىن قايتا وڭدەۋدى جىلىنا 1,2 ملن تونناعا دەيىن ارتتىرۋعا مۇمكىندىك بەرمەك. سايكەسىنشە, جىلىنا التىن ءوندىرىسى كولەمى 13 پايىزعا ارتاتىن بولادى.
«التىنالماس» كومپانياسى قورشاعان ورتانى قورعاۋعا دا ءوز ۇلەسىن قوسۋدا. كاسىپورىن بالامالى قۋات كوزدەرى ارقىلى پارنيكتىك گازدار شىعارىندىلارىن ازايتىپ, اۋاعا بولىنەتىن كومىرقىشقىل گازىنىڭ مولشەرىن ازايتۋدا. كاسىپورىنعا تيەسىلى قاراعاندى وبلىسىنداعى كەن ورىندارىندا كۇن ساۋلەسى ارقىلى قۋات الاتىن ارنايى باعاندار ورناتىلدى. ولار ءبىر بىرىنەن جارتى شاقىرىم قاشىقتىقتا ورنالاسقان. جالپى اۋماعى 10,85 شاقىرىمدى قۇرايدى», دەلىنگەن حابارلامادا.
ال وتاندىق RG Gold التىن ءوندىرۋ كومپانياسى قۋاتتىلىعى جىلىنا 5 ملن توننا رۋدا وندىرۋگە قاۋقارلى جاڭا تاۋ-كەن كەشەنىن اشپاق. قازىرگى تاڭدا قۇرال-جابدىقتاردى ورناتۋ جۇمىستارى جۇرگىزىلۋدە. كەشەن بيىل كۇزدە پايدالانۋعا بەرىلەدى دەپ جوسپارلانىپ وتىر. وسى رەتتە ايتا كەتەرلىگى, كەشەن قۇرىلىسىندا ەكولوگيالىق نورمالارعا باسىمدىق بەرىلىپ, حالىقارالىق زاڭناما تالاپتارى ساقتالعان.
مامانداردىڭ ايتۋىنشا, رايگورودوك كەن ورنىنداعى ءوندىرىس قۋاتتىلىعىنىڭ ارتۋى وعان جاقىن ەلدى مەكەن تۇرعىندارىنىڭ ءال-اۋقاتىنىڭ ارتۋىنا ىقپالىن تيگىزەتىن بولادى. كاسىپورىنعا قاجەتتى ماماندار مەن جۇمىسشىلاردى تارتۋدا جەرگىلىكتى تۇرعىندارعا باسىمدىق بەرىلەدى. كومپانيا ولاردىڭ كاسىبي بىلىكتىلىگىن جەتىلدىرىپ, ءوندىرىس وشاعىندا ءارى قاراي جۇمىس ىستەۋگە قولداۋ كورسەتەدى.