استانا. 29 ءساۋىر. پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن بريفينگتە ىشكى ىستەر ءمينيسترى قۇلمۇحانبەت قاسىموۆ 2020 جىلعا دەيىن ەلىمىزدىڭ 35 قالاسىندا جەدەل باسقارۋ ورتالىعى قۇرىلاتىنىن جەتكىزدى. بۇل تۋرالى ortcom.kz سايتى حابارلادى.
بريفينگتە قۇلمۇحانبەت قاسىموۆ: «ىشكى ىستەر مينيسترلىگى ءۇشىن ەڭ باستى مىندەت – جۇمىسىمىزدى ءوزى كەلگەن نەمەسە حات-حابار ارقىلى بايلانىسقان ءاربىر ازاماتتىڭ ءوتىنىشىن, مۇڭ-مۇقتاجدارىن نازاردان تىس قالدىرمايتىنداي ەتىپ ۇيىمداستىرۋ. مەملەكەت باسشىسى بىزدەن وسىنا تالاپ ەتىپ وتىر. سوندىقتان ءبىز, 3 جىلدان بەرى قىلمىستى ەسەپكە الۋ جانە تىركەۋ سالاسىندا قاتاڭ ءتارتىپ ەنگىزۋدەمىز, ورىن العان قىلمىس تۋرالى وتىنىشتەردى ەلەكتروندىق تىركەۋ جۇيەسىن جولعا قويدىق. وتكەن جىلى 2 ميلليوننان استام تالاپ-تىلەك تىركەلدى», – دەدى.
ىشكى ىستەر ءمينيسترىنىڭ كەلتىرگەن مالىمەتىنە قاراعاندا, سوڭعى 3 جىلدا اۋىر قىلمىس سانى 22 پايىزعا, ايىرىقشا اۋىر قىلمىس 14 پايىزعا, قاراقشىلىق 50 پايىزعا, توناۋ 25 پايىزعا كەمىگەن.
سونداي-اق, ق.قاسىموۆ: «كوشەدە جۇرەتىن كۇش-قۋات قۇرالدارىن باسقارۋ جانە مانەۆرلەۋ ءۇشىن جەدەل باسقارۋ ورتالىقتارى قۇرىلعان. ولار بارلىق وبلىس ورتالىقتارىندا بار. دەگەنمەن, وسىنداي قۇرىلىمدار 2020 جىلعا دەيىن ەلىمىزدىڭ 35 قالاسىندا بولۋى كەرەك. بيىل رۋدنىي, ششۋچينسك, سەمەي, حرومتاۋ قالالارىنداعى جەدەل باسقارۋ ورتالىقتارىنىڭ قۇرىلىسى اياقتالدى», – دەدى.
جولدىباي بازار.
دەرەككوز: ortcom.kz.
فوتو: ortcom.kz.