تۇركىستاندا ساداق اتۋدان ەرلەر مەن جاستار اراسىنداعى قازاقستان چەمپيوناتى اياقتالدى. بۇل جارىستا ەلىمىزدىڭ جەتى وڭىرىنەن كەلگەن 200-دەن استام سپورتشى باق سىنادى.
جالپىكوماندالىق ەسەپتە الماتى وبلىسىنىڭ وكىلدەرى الدارىنا جان سالمادى. بۇل ءوڭىردىڭ 19 ورەنى جەڭىس تۇعىرىنا كوتەرىلدى. ەكىنشى ورىندى شىمكەنت قالاسىنىڭ مەرگەندەرى يەلەندى. ولار 13 جۇلدەگە قول جەتكىزدى. ءۇشىنشى ساتىعا باتىس قازاقستان وبلىسىنىڭ وعلاندارى جايعاستى. جايىق جاعالاۋىنان كەلگەن ۇل-قىزدار 10 جۇلدەنى ءوز قورجىندارىنا سالدى. جەكەلەگەن سپورتشىلار جايىندا ايتار بولساق, قوناەۆ قالاسىنان كەلگەن يلفات ابۋللين مەن ورالدىق الينا ءىلياسوۆانى بولە-جارا اتاپ وتكەن ءجون. ساداق اتۋدىڭ كلاسسيكالىق ءتۇرى بويىنشا وتكەن باسەكەدە ەكەۋى دە اسقان شەبەرلىك تانىتىپ, باس جۇلدەنى ولجالادى. سول سەكىلدى بۋنەد ميرزامەتوۆ (تۇركىستان وبلىسى) پەن ايجان سەيداحمەتوۆانىڭ (الماتى وبلىسى) ونەرى دە كوپشىلىكتىڭ كوڭىلىنەن شىقتى. جاستار اراسىندا جاڭبىرباي داۋلەتكەلدى مەن اندرەي تيۋتيۋن وزدەرىن جاقسى قىرلارىنان كورسەتىپ, مامانداردىڭ نازارىنا ىلىكتى.
تۇركىستانداعى جارىستىڭ قورىتىندىسى بويىنشا ۇلتتىق كوماندا جاساقتالدى.