دجوكوۆيچ نادالدان وزا الا ما؟

وسىلايشا, ول رافاەل نادالدىڭ رەكوردىنا ءبىر تابان جاقىنداي ءتۇستى. ەندى دجوكوۆيچ تاعى ءبىر ءدۇبىرلى دودادا دارا شىقسا, وندا داڭقتى يسپانيا تەننيسشىسىمەن تەڭەسەدى.

35 جاستاعى نوۆاك دجوكوۆيچ­تىڭ سپورتتىڭ بۇل تۇرىندە باعىن­دىرماعان بەلەسى جوق. ول اۋس­تراليانىڭ اشىق بىرىنشىلى­گىندە توعىز مارتە توپ جاردى. ۋيمب­ل­دوندا جەتى رەت جەڭىمپاز اتاندى. اقش-تىڭ اشىق بىرىنشىلىگىندە ءۇش مارتە باس جۇلدەنى ولجالادى. رولان گارروستا ەكى رەت دارا شىقتى. اتر ماستەرس 1000 تۋرنيرىندە 38 مارتە جانە اتر-ءدىڭ الەمدىك تۋرىنىڭ فينالىندا بەس رەت تەڭدەسسىز دەپ تانىلدى. بۇل – رەكوردتىق كورسەتكىش! سونىمەن قوسا ول ۇزاق جىلدار بويى الەمدىك رەيتينگتە جەكە-دارا كوش باستادى. بۇل كۇندەرى دجوكوۆيچ ۇزدىكتەر تىزىمىندە جەتىنشى ورىندى يەلەنۋدە. مىنە, وسىلاي تىزبەكتەي بەرسەك, سەربيانىڭ ساڭلاعىنا كوپتەگەن كەرەمەت كورسەتكىش تيەسىلى ەكەنىن اڭعارۋعا بولادى.

نوۆاك «ۇلكەن دۋلىعا» تۋرنير­لەرىنىڭ باس جۇلدەسىنە العاش رەت 2008 جىلى قول جەتكىزدى. سول جا­رىس­تىڭ اقتىق سىنىندا 21 جاس­تاعى سايىپقىران فرانتسيانىڭ وكىلى جو-ۆيلفريد تسونگانى ۇتتى. سودان كەيىن ءۇش جىل بويى باعى جانبادى. ەسەسىنە 2011 جىلى مەلبۋرن, لوندون جانە نيۋ-يوركتە ۇيىمداستىرىلعان ءدۇبىرلى دودالاردا دارا شىقتى. تەك پاريجدەگى جارىستا عانا ونىڭ جولى بولماي, جارتىلاي فينالدا ءسۇرىندى. ءدال سول ناتيجەسىن ول اراعا 10 جىل سالىپ, 2021 جى­لى قايتالادى. بىلتىر جاسىل قۇر­لىقتا وتكەن اۋستراليانىڭ اشىق بىرىن­شىلىگىندە عانا ونىڭ جولى بول­مادى. فينالدا دجوكوۆيچ رەسەي­لىك دانيل مەدۆەدەۆكە جول بەردى.

بيىلعى ماۋسىم نوۆاك دجوكوۆيچ ءۇشىن اسا ءساتتى بولدى دەپ ايتا المايمىز. سەبەبى ول كوروناۆيرۋسقا قارسى ەكپە سال­دىرۋدان باس تارتقانى ءۇشىن جىلدىڭ باسىندا اۋستراليانىڭ اشىق بىرىنشىلىگىنەن شەتتەتىلدى. رولان گارروستا شيرەك فينالدا ءسۇرىندى. تاعى ءبىر-ەكى جارىستا ءساتسىز ونەر كورسەتتى. ماياميدەگى ماستەرستە باق سىناۋدان باس تارتتى. سونىڭ سالدارىنان الەمنىڭ ءبىرىنشى راكەتكاسى دەگەن اتاعىنان ايىرىلدى.

سەربيانىڭ سپورتشىسى كۇنى كەشە عانا اياقتالعان ۋيمبلدوننىڭ العاشقى اينالىمدارىندا وڭتۇستىككورەيالىق كۆون سون ۋ, اۋستراليالىق تاناسي كوككيناكيس جانە ءوزىنىڭ وتانداسى ميومير كەتسمانوۆيچتى قاپى قالدىردى. بۇل كەزدەسۋلەردە جەڭىسكە جەتۋ ءۇشىن وعان  ءۇش سەت جەتكىلىكتى بولدى. ءتورتىنشى كەزەڭدە نيدەرلاندتىق تيم ۆان رەيتحوۆەندى جولىنان ىعىس­تىردى. شيرەك فينالدا يتاليا­لىق يانيك سيننەرمەر ءبىراز تىرەستى. العاشقى ەكى سەتتە سين­نەر باسىم تۇسكەنىمەن, ودان كەيىن قار­قىنىن كۇرت كۇشەيتكەن دجوكوۆيچ جەڭىستى قارسىلاسىنىڭ ۋىسىنان ج ۇلىپ اكەتتى. جارتىلاي فينالدا جەرگىلىكتى ويىنشى كەمەرون ءنورريدى ۇتسا, فينالدا اۋستراليانىڭ اتىشۋلى تەننيسشىسى نيك كيروستان ايلاسىن اسىردى.

بۇگىنگى تاڭدا «ۇلكەن دۋلىعا» ساناتىنداعى تۋرنيرلەردە جەڭىپ العان باس جۇلدەلەردىڭ سانى جاعىنان نوۆاكتان ءبىر عانا تەننيسشى وزىپ تۇر. ول – رافاەل نادال. يسپانيانىڭ ماقتانىشى دجوكوۆيچتەن ءبىر جاس ۇلكەن. 1986 جىلدىڭ 3 مامىرىندا مالوركا ارالىندا دۇنيەگە كەلگەن ساقا سپورتشى 22 رەت ەڭ مارتەبەلى جارىستاردىڭ جەڭىمپازى اتاندى. ونىڭ 14-ءى – رولان گارروستاعى جەڭىس. توپىراق توسەنىشىندە وتە جاقسى وينايتىن نادالدى جانكۇيەرلەردىڭ «گرۋنت كورولى» دەپ اتاۋى بەكەر ەمەس. قازىرگى كەزدە پيرەنەي تۇبەگىنىڭ تۇلەگى اتر رەيتينگىندە ءۇشىنشى ساتىعا جايعاستى. ءۇشىنشى ورىندا – رودجەر فەدەرەر. 40 جاستاعى شۆەيتساريانىڭ ءدۇلد ۇلى چەمپيوندىق ءتاجدى 20 مارتە ولجالادى. بۇل كۇندەرى رودجەر ۇزدىكتەر تىزىمىندە جوق. سوڭعى رەت ول 2018 جىلى اۋستراليانىڭ اشىق بىرىنشىلىگىندە توپ جار­عان ەدى. سودان بەرگى ءتورت جىل ۋاقىت ارالىعىندا ناتيجەسى كۇرت تومەندەدى. ياعني شاۋ تارتىپ قالعان فەدەرەردىڭ الداعى ۋاقىتتا جوعارىدا ەسىمدەرى اتالعان قوس مىقتىعا باسەكەلەس بولا المايتىنى انىق. سول سەبەپتى دە كىمنىڭ «ۇلكەن دۋلىعا» دودالارىندا ەڭ كوپ جۇلدە الاتىنى رافاەل نادال مەن نوۆاك دجوكوۆيچتىڭ ءوزارا تارتىسى ارقىلى انىقتالاتىن سەكىلدى.