قازاقستان پرەزيدەنتى نۇرسۇلتان نازارباەۆتىڭ بۇدان جيىرما جىل بۇرىن رەسەي عىلىمي قوعامداستىعىنىڭ مىنبەرىنەن «مەملەكەتتەردىڭ ەۋرازيالىق وداعىن قۇرۋ تۋرالى» جوبانى ۇسىنعانىن قازاقستاندىقتار ۇمىتا قويعان جوق. سول كەزدەگى تاريحي وقيعالاردىڭ كۋالەردىڭ ءبىرى رەتىندە مەن ەكىنشى رەت ممۋ-دەگى لەكتسياسىن زور ىجداعاتپەن تىڭداپ, ەلدەر اراسىنداعى تۇرپاتى وزگەشە ساۋدا-ەكونوميكالىق ىنتىماقتاستىقتىڭ مۇلدە جاڭا ستراتەگياسىنىڭ وزگەلەرگە ۇلگى رەتىندە ۇسىنىلعانىن ەرەكشە شابىتپەن قابىلدادىم.
سوڭعى 20 جىل ەلباسىمىز بەلگىلەپ بەرگەندەي, ەۋرازيالىق ينتەگراتسيالىق دامۋدىڭ جاڭا كوكجيەكتەرىن ايقىنداپ بەرگەن بەلەستى كەزەڭدەرگە تولى بولدى. وسى ۋاقىت ىشىندە پرەزيدەنتىمىزدىڭ.الىستى بولجاي بىلەتىن كورەگەندىك, سۇڭعىلالىق ساياساتكەرلىگى تاعى ءبىر قىرىنان تانىلعانىن قالىڭ جۇرتشىلىق قاپىسىز ۇقتى. ءبىز بۇگىنگى كۇنى نۇرسۇلتان ءابىش ۇلىن ەۋرازيالىق جوبانىڭ باس ارحيتەكتورى رەتىندە الەمگە تانىلعان تاريحي قايراتكەرى رەتىندە زور ماقتانىش تۇتامىز. ويتكەنى, ءبىر كەزدەرى ماڭگى ايرىلماستاي, ىدىراماستاي كورىنگەن كەڭەس وداعىنىڭ ودان ءارى پوستكەڭەستىك كەڭىستىكتىڭ ساياسي جانە ەكونوميكالىق ورنىقتىرۋدىڭ ينتەگراتسيالىق يدەيالارىن ايقىن باتىلدىقپەن ۇسىنعان ەاو جوباسى ءبولىنۋدىڭ ەمەس, كەرىسىنشە, بىرىگۋدىڭ باسىم قاعيداتتارىن بەلگىلەپ بەرگەنىن قازىر الەمدىك قاۋىمداستىق مويىنداپ وتىر.
ەلباسىمىزدىڭ سول كەزدەگى باتىل باستاماسى بۇگىندە ءومىر شىندىعىنا اينالىپ, ينتەگراتسيالىق مودەلدىڭ جاڭا ۇلگىسىن ءتۇزىپ بەردى. ونىڭ ايقىن مىسالىن كەدەن وداعى جانە بىرىڭعاي ەكونوميكالىق كەڭىستىك جۇيەسىندە ءبىر-بىرىمەن تىعىز ارىپتەستىك تىعىز قارىم-قاتىناستا ءبىرتۇتاس نارىق كەڭىستىگىندە ساۋدا-وندىرىستىك ۇدەرىستەر باعىتىندا ءوزارا تۇسىنىستىك, جاۋاپكەرشىلىكتىڭ قولجەتىمدى ۇلگىسىن تانىتىپ كەلە جاتقان ءۇش مەملەكەتتىڭ جەتەكشى رولىنەن ايقىن اڭعارۋعا بولادى.
مەنىڭشە, بۇگىنگى كۇنى جوعارى دەڭگەيگە كوتەرىلگەن ەۋرازيالىق ينتەگراتسيا ۇدەرىسىنەن ساياسي استار ىزدەۋدىڭ ەش قاجەتى جوق. ەلىمىز ءوز ىرعاعىمەن دامىپ كەلەدى. ونىڭ جارقىن ۇلگىلەرىن بارلىق سالادان كەزىكتىرۋگە بولادى. ەلباسىمىز ماسكەۋدىڭ تورىندە وقىلعان لەكتسياسىندا اتاپ وتكەندەي, ەۋرازيالىق ەكونوميكالىق وداق قۇرۋدىڭ باستى ماقساتى ەگەمەندىكككە قول سۇعىلمايتىن, ەركىندىلىك قاعيداتتارىنا نەگىزدەلگەن وي-پىكىرلەردىڭ ۇندەسۋىمەن ەرەكشەلەنەدى.
كارىباي مۇسىرمان,
قازاقستان حالقى اسسامبلەياسىنىڭ مۇشەسى, وبلىستىق ءماسليحاتتىڭ دەپۋتاتى.
سولتۇستىك قازاقستان وبلىسى.
فوتو: www.photosuzdal.ru.