ءماجىلىس دەپۋتاتتارى دانيار الىمباەۆ پەن ءاليا ابسەمەتوۆا جەتىسۋ وبلىسىنا ساپارى بارىسىندا الاكول اۋدانىنداعى كاسىپكەرلىك جانە تۋريزم سالاسىنىڭ وكىلدەرىمەن كەزدەستى.
ءىسساپار بارىسىندا ماجىلىسمەندەر ءۇشارال قالاسى اۋەجايىنىڭ ۇشۋ-قونۋ جولاعىن جوندەۋ بارىسىمەن تانىستى. دەپۋتاتتار اۋەجايدى ارالاپ, عيماراتتىڭ قاۋىپسىزدىك جۇيەسىن باقىلادى.
«اۋەجاي 2018 جىلى اشىلعان. 2021 جىلدان باستاپ ۇشۋ جولاعىن قايتا جوندەۋ جۇمىستارى جۇرگىزىلە باستادى. وسى ايدا جوندەۋ جۇمىستارى اياقتالادى دەپ جوسپارلانۋدا. تامىز ايىنان باستاپ ءوز جۇمىسىن جانداندىرادى», دەدى اۋەجاي باسشىسى اشىربەك باقىتجانوۆ.
ايتا كەتەيىك, اۋەجاي كۇنىنە 400 ادام قابىلداۋعا قاۋقارلى. سونداي-اق حالىق قالاۋلىلارى بىرقاتار تۋريستىك نىساندى ارالادى. الاكول كولى جاعالاۋىن دامىتۋدىڭ باس جوسپارىنا سايكەس سۋمەن, ەلەكترمەن قامتۋ, كارىز جۇيەسىن جۇرگىزۋ قولعا الىنعان. بيىل جاعالاۋدا 3 ءىرى ينۆەستيتسيالىق جوبا جۇزەگە اسىرىلىپ, ءىرى دەمالىس ورىندارى ىسكە قوسىلدى. جالپى سانى 100-گە جۋىق جاڭا جۇمىس ورنى اشىلىپ, جوبالارعا 3 ملرد تەڭگەگە جۋىق ينۆەستيتسيا تارتىلعان. بىلتىر جاعالاۋدا 1 ملن 400 مىڭ ادام دەمالىپ, 8,5 ملرد تەڭگەگە قىزمەت كورسەتىلگەن.
جەرگىلىكتى بيلىك وكىلدەرىنىڭ ايتۋىنشا, بيىل جاعالاۋدى قورشاۋ جۇمىستارى باستالعان. اقشي مەن كوكتۇما اۋىلدىق وكرۋگتەرىندە جالپى ۇزىندىعى 13,4 شاقىرىم جاعالاۋ قورشالۋعا ءتيىس. جوبانىڭ قۇنى 6 ملرد تەڭگە, قارجى كەزەڭ-كەزەڭىمەن بولىنەدى.
جەتىسۋ وبلىسى