بۋداپەشتتە وڭباي سۇرىندىك

رەيتينگتىك ۇپايلەر بەرىلەتىن ءباسى بولەك جانە مارتەبەسى جوعارى جارىستا جەرلەستەرىمىزدىڭ اراسىنان ەڭ ءتاۋىر ناتيجەگە باۋىرجان نارباەۆ قول جەتكىزدى. 60 كيلو سالماقتا كۇش سىناسقان ول العاشقى اينالىمداردا قىتايلىق ليۋ ۆەنجي مەن فرانتسيالىق رەبول شەدريشتى ۇتىپ, شيرەك فينالدا جاستار اراسىنداعى (U-23) ەۋروپا بىرىنشىلىگىنىڭ كۇمىس جانە قولا جۇلدەگەرى, گرۋزيالىق تەمۋر نوسادزەنى جەڭدى. جارتىلاي فينالدا ونىڭ جولى گرۋزيانىڭ تاعى ءبىر بەلدى بالۋانى لۋحۋمي چحۆيميانيمەن قيىستى. الەم چەمپيونى, ەۋروپا ويىندارىنىڭ جەڭىمپازى دەگەن اتاعى بار ساقا سپورتشىعا نارباەۆتىڭ ءالى جەتپەدى. ال قولا مەدال ءۇشىن تارتىستا قانداسىمىز فرانتسيانىڭ 19 جاسار جاس ورەنى رومان ۆالادە پيكاردقا ەسە جىبەرىپ, بەسىنشى ورىندا قالىپ قويدى. 

بۋداپەشتتە تاجىريبەلى عۇسمان قىر­عىز­باەۆقا ايرىقشا سەنىم ارتقان ەدىك. بىل­تىر ول ءدال وسى قالادا نەبىر مىق­تى­لار­­دى جولىنان ىعىستىرىپ, الەم چەم­پيو­ناتىنىڭ كۇمىس جۇلدەگەرى اتانعان ەدى. الاي­دا 66 كيلو سالماق دارەجەسىنە اۋىس­قان­نان كەيىن بۇل جىگىتتىڭ باعى ءبىر جانبادى. وسى ءتۋرنيردىڭ تۇساۋكەسەر كەزدەسۋىندە قىر­­عىزباەۆ كوماندالىق سايىستاعى توكيو وليم­پياداسىنىڭ قولا جۇلدەگەرى, يزرايلدىك بارۋح شمايلوۆتىڭ اياعىن كوكتەن كەلتىرگەندە قاتتى قۋاندىق. بىراق قۋانىشىمىز ۇزاققا سوزىلمادى. كەلەسى كەزەڭدە سۇرىنگەن عۇسمان قالىڭ توپتىڭ اراسىندا قالىپ قويدى. وكىنىشكە قاراي, ماعجان شامشادين (60 كيلو), داستان شاياحمەتوۆ (66 كيلو), دانيار شامشاەۆ, اسقار نارقۇلوۆ (73 كيلو), باراق ارقاباي, ايبول ءنىسانالى (81 كيلو), ادىلەت ميسسين, ەراسىل جانتاەۆ (90 كيلو), ايبەك سەرىكباەۆ جانە سەرىك سالمەنوۆ (100 كيلو) العاشقى اينالىمداردان اسا المادى.

ەرلەر سايىسىندا ءۇش سالماقتا جاپونيا قۇراما كومانداسىنىڭ مۇشەلەرى باس جۇلدەنى ولجالادى. ولار – حيفۋمي ابە (66 كيلو), سانشيرو مۋراو (90 كيلو) جانە كەنتارو يدا (100 كيلو). اسا جەڭىل سالماقتا بەلگيانىڭ بەتكەۇستارى يوررە فەرسترەتەنگە تەڭ كەلەر ەشكىم تابىلمادى. 73 سالماق دارەجەسىندە دارا شىققان حيدايات گەيداروۆتىڭ تابىسىنا قازاق جانكۇيەرلەرى دە شاتتانا قۋاندى. ويتكەنى, ازەربايجاننىڭ نامىسىن قورعاپ جۇرگەن بۇل بالۋان قازاقستاندا دۇنيەگە كەلگەن. بالاۋسا شاعىندا تاريحي وتانىنا قونىس اۋدارىپ, دزيۋدو كۇرەسىنە دەن قويدى. حيدايات – الەم چەمپيوناتىنىڭ ەكى دۇركىن جانە ەۋروپا ويىندارىنىڭ قولا جۇلدەگەرى, قۇرلىقتىڭ ەكى دۇركىن چەمپيونى. سونداي-اق ول يسلام ىنتىماقتاستىعى ويىندارىندا التىن الىپ, دۇنيەجۇزىلىك ۋنيۆەرسيادادا ەكىنشى جانە ءۇشىنشى ورىنداردى يەلەندى. 81 كيلو سالماقتا برازيليالىق گلەرمە شميد توپ جارسا, الىپتاردىڭ ايقاسى فرانتسيانىڭ داڭقى جەر جارعان دزيۋدوشىسى تەددي ريننەردىڭ ايقىن جەڭىسىمەن اياقتالدى.

ايەلدەر سايىسىندا ءبىزدى ەڭ جەڭىل سالماق­تاعى ءابيبا ابۋجارقىنوۆا مەن اسا اۋىر سالماقتاعى كاميلا بەرلىقاش قۋانتادى دەپ دامەلەندىك. ويتكەنى وتكەن ايدىڭ اياعىندا ولار ۇلانباتىردا ۇيىمداستىرىلعان Grand Slam دوداسىندا قولا مەدالدى يەلەنىپ, وزدەرىنىڭ بابىندا ەكەندەرىن بايقاتقان-تىن. بىراق بۇل جولى ەكەۋىنىڭ دە جولى بولمادى. اسىرەسە, ءبىز ابۋجارقىنوۆانىڭ جەڭىلىسىنە كۇيىندىك. ەكىنشى اينالىمدا ول يزرايلدىك شيرا ريشونيدەن ۇتىلدى. قازاق قىزى ءدال وسى بالۋاندى موڭعوليانىڭ استاناسىندا جەڭگەن ەدى. بۇرىمدىلاردىڭ تارتىسىندا دا جاپونيا قۇراماسى وزدى. ولار جەتى سالماقتىڭ بەسەۋىندە باس جۇلدەنى ولجالادى. قالعان ەكى التىن ماجارستان مەن يتاليانىڭ بالۋاندارىنا بۇيىردى.