يسپانيانىڭ استاناسى – مادريدتە ۇمىتكەرلەر ءتۋرنيرى ءوز مارەسىنە جەتتى. اتالعان جارىستا جەر جاھاننىڭ ەڭ ۇزدىك سەگىز شاحماتشىسى شەبەرلىك بايقاستى. 20 تاۋلىك بويى شارشى تاقتاعا ۇڭىلگەن ويىنشىلار كەلەسى جىلى كىمنىڭ الەم چەمپيونى اتاعى ءۇشىن تالاسۋعا لايىق ەكەنىن انىقتادى.
پيرەنەي تۇبەگىندەگى تۋرنير يان نەپومنياششيدىڭ جەڭىسىمەن اياقتالدى. رەسەي شاحماتشىسى 14 كەزدەسۋدىڭ بەسەۋىندە جەڭىسكە جەتىپ, توعىزىندا تەڭ ءتۇستى. ناتيجەسىندە, 9,5 ۇپاي جيىپ, جارىس جەڭىمپازى اتاندى. وسىلايشا, بريانسك قالاسىنىڭ تۋماسى ءوزىنىڭ تۋعان كۇنىنە تاماشا سىيلىق جاسادى. 14 شىلدەدە يان 32 جاسقا تولعالى وتىر.
ەكىنشى ورىندى دين ليجەن يەلەندى. 29 جاستاعى قىتايدىڭ سايىپقىرانى 8 ۇپايدى ءوز قورجىنىنا سالدى. ول ءتورت ويىندا باسىمدىق تانىتقانىمەن, ەكى رەتىندە ەسە جىبەردى. قالعان پارتيالاردى تەڭ اياقتادى. ءۇشىنشى ساتىعا تەيمۋر رادجابوۆ تابان تىرەدى. 35 جاستاعى ازەربايجاننىڭ ماقتانىشى 7,5 ۇپايدى ەنشىلەدى. ءدال سونداي ۇپاي جيعان امەريكالىق حيكارۋ ناكامۋرا ءتورتىنشى ورىندى قاناعات تۇتتى. ال ودان كەيىنگى ساتىلارعا امەريكالىق فابيانو كارۋانا (6,5 ۇپاي), فرانتسيالىق اليرەزا فيرۋزدجا (6 ۇپاي), پولشالىق يان-كشيشتوف دۋدا (5,5 ۇپاي) جانە ماجارستاندىق ريحارد راپپورت (5,5 ۇپاي) جايعاستى.
ءتۋرنيردىڭ جەڭىمپازى 48 مىڭ ەۆرو كولەمىندە سىياقى السا, ەكىنشى ورىندى يەلەنگەن ويىنشىنىڭ ەسەپشوتىنا 36 مىڭ اۋدارىلدى. ءۇشىنشى ساتىعا تابان تىرەگەن ساڭلاققا 24 مىڭ تيەسىلى. سونىمەن قاتار ولجالاعان ءاربىر جارتى ۇپاي ءۇشىن قاتىسۋشىلارعا 3 555-تەن تابىس ەتىلدى. ال جارىستىڭ جالپى جۇلدە قورى 500 مىڭ ەۆرونى قۇرادى.
ۇمىتكەرلەر تۋرنيرىندە توپ جارعان يان نەپومنياششي كەلەسى جىلى 16-شى الەم چەمپيونى ماگنۋس كارلسەنمەن كەزدەسەدى. نوۆەگيانىڭ تۋماسى دا 32 جاستا. ول 2013 جىلى ءۇندىستاننىڭ چەنناي قالاسىندا جەرگىلىكتى ويىنشى ۆيشۆاناتان اناندتى 6,5:3,5 ەسەبىمەن ۇتىپ, التىن ءتاجدى يەلەندى. ودان كەيىنگى جىلدارى تاعى سول اناند (6,5:4,5), رەسەيلىك سەرگەي كارياكين (6:6, تاي-برەيك 3:1), امەريكالىق فابيانا كارۋانا (6:6, تاي-برەيك 3:0) جانە يان نەپومنياششيدى (7,5:3,5) ۇتىپ, ءوز اتاعىن ءساتتى قورعادى. ياعني سوڭعى توعىز جىل ارالىعىندا كارلسەندى ەشكىم تۇعىردان تايدىرا العان جوق.
سانتونيا سارايىندا وتكەن جارىستىڭ ۇيىمداستىرىلۋ دەڭگەيى وتە جوعارى بولعانىمەن, كوپتەگەن مايتالمان مامان مەن وسى سپورت ءتۇرىنىڭ شىنايى جانكۇيەرى ۇمىتكەرلەردىڭ ونەرىنە مۇلدە كوڭىلدەرى تولماعاندارىن اشىق ايتتى. وسى ورايدا ۆلاديمير كرامنيك, ماگنۋس كارلسەن, سەرگەي كارياكين باستاعان ءبىر توپ اتاقتى شاحماتشىلار مادريدتەگى تۋرنيرگە قاتىسۋشىلاردىڭ ويىنىن سىنعا العانىن دا ايتا كەتۋگە ءتيىسپىز.