الداعى كۇندەرى ماجارستاندا ۇستەل تەننيسىنەن ءۇش بىردەي حالىقارالىق ءتۋرنيردىڭ جالاۋى جەلبىرەيدى. بۇل باسەكەلەردە ءبىزدىڭ ەلدىڭ ورەندەرى دە ونەر كورسەتەدى.
بۇگىن WTT Star Contender ءتۋرنيرىنىڭ تۇساۋى كەسىلدى. ول جەردە قازاقستاننىڭ ەڭ ۇزدىك ويىنشىسى, بىرقاتار حالىقارالىق جارىستاردىڭ جەڭىمپازى جانە جۇلدەگەرى, ريو مەن توكيو وليمپيادالارىنا قاتىسۋشى, الەمدىك رەيتينگتە 27-ورىندا تۇرعان استانالىق كيريلل گەراسيمەنكو ونەر كورسەتۋدە. 18-22 شىلدە ارالىعىندا WTT Feeder دوداسىنىڭ شىمىلدىعى تۇرىلەدى. بۇل باسەكەدە 15 جاسار قازاقتىڭ اسا دارىندى ويىنشىسى الان قۇرمانعاليەۆكە سەنىم ارتىلىپ وتىر. ءوز قۇرداستارى اراسىندا الەمدىك رەيتينگتە كوش باستاپ تۇرعان قانداسىمىز بۇل كۇندەرى ITTF تىزىمىندە 300 ساتىعا جايعاستى.
ءدال سول كۇندەرى WTT Champions وتەدى. جۇلدە قورى 500 مىڭ اقش دوللارىن قۇراپ وتىرعان دودادا 25 جاستاعى كيريلل گەراسيمەنكو كۇش سىناسادى. وسى جارىستا جەرلەسىمىز وليمپيادا چەمپيوندارى ما لونگ (قىتاي) مەن چەن مەن (قىتاي) جانە ميما يتو (جاپونيا), دميتري وۆچاروۆ (گەرمانيا), ۋگو كالدەرانو (برازيليا), حان ين (گەرمانيا), كۆادري ارۋنا (نيگەريا), ادريانا دياز (پۋەرتو-ريكو) سىندى ساڭلاقتارمەن شەبەرلىك بايقاسادى.