2012 جىلى ارحەولوگيالىق قازبا جۇمىسى كەزىندە باتىس قازاقستان وبلىسى اۋماعىنان «التىن ادام» ب.ز.د. ءىV-ءVى عاسىرعا ءتان ەجەلگى سارمات كەزەڭىنە جاتاتىن بەكزات ايەلدىڭ قابىرى تابىلعان بولاتىن. عالىمدار ونى قازبا تابىلعان جەردىڭ اتىمەن «تاقساي حانشايىمى» اتاپ كەتتى.
اسا باي التىن بۇيىمدارمەن كومكەرىلگەن سارمات حانشايىمىنىڭ سالتاناتتى ءتۇر-تۇلعاسىن بەلگىلى رەستاۆراتور قىرىم التىنبەكوۆ قالپىنا كەلتىرىپ, ەلورداداعى ۇلتتىق مۋزەي مەن ورال وبلىستىق تاريحي-ولكەتانۋ مۋزەيىنە سىيعا تارتقان ەدى. ەندى, مىنە, تاقساي حانشايىمىنىڭ تاعى ءبىر كوشىرمەسى قاسيەتتى تۇركىستان تورىنەن ورىن الدى. قازاقستان رەسپۋبليكاسى پرەمەر-ءمينيسترىنىڭ ورىنباسارى ەرالى توعجانوۆتىڭ توراعالىعىمەن باتىس قازاقستان وبلىسى اكىمدىگى تاقساي حانشايىمىنىڭ كوشىرمەسىن دايىنداپ, تۇركىستان وبلىستىق « ۇلى دالا ەلى» ورتالىعىنا سىيعا تارتتى. تاماشا تارتۋ باتىس قازاقستان وبلىستىق تاريحي-ولكەتانۋ مۋزەيىنىڭ ۇيىمداستىرۋىمەن وتكەن «تاريحى – تەرەڭ اقجايىق, تاقساي حانشايىمى» اتتى كورمەنىڭ اشىلۋى كەزىندە جاسالدى.
ايتا كەتەيىك, تاقساي حانشايىمى – قازاقستاندا تابىلعان 4 التىن ادامنىڭ ءبىرى. قازاقستاننىڭ جالپىۇلتتىق قاسيەتتى نىسانىنا اينالعان ەرەكشە جادىگەردى, اق جايىق وڭىرىندەگى مۋزەي قورى تۋىندىلارىن كەڭىنەن ناسيحاتتاۋ, رۋحاني قۇندىلىقتى جاڭعىرتىپ, تۇركىستان قالاسىنىڭ تۇرعىندارى مەن قوناقتارىنا مادەني-رۋحاني دەمالىس سىيلاۋ ماقساتىندا ۇيىمداستىرىلعان ءىس-شاراعا تۇركىستاندىقتار ەرەكشە ريزا بولدى.
باتىس قازاقستان جانە تۇركىستان وبلىسى مۋزەيلەرىنىڭ اراسىنداعى ىنتىماقتاستىقتى ارتتىرۋ, ءوزارا بايلانىستى نىعايتۋعا ىقپال ەتەتىن اتالعان كورمەنىڭ سالتاناتتى اشىلۋىنا باتىس قازاقستان وبلىسى مادەنيەت باسقارماسىنىڭ باسشىسى سايران دۇيسەنوۆ, باتىس قازاقستان وبلىستىق تاريحي ولكەتانۋ مۋزەيىنىڭ ديرەكتورى ميربولات ەرساەۆ قاتىسىپ ءسوز سويلەدى.
– تاقساي حانشايىمى – باتىس قازاقستان ولكەسىنىڭ ءبىر جاۋھارى ەدى. بۇگىن كيەلى تۇركىستان وبلىسىنا جاڭا كوشىرمەنى تاپسىرىپ وتىرمىز. التىن حانشايىمدى كوزىمەن كورىپ, تاماشالاۋ باقىتى ەلىمىزدە ءۇش-اق قالا تۇرعىندارىنا بۇيىرعان. بولاشاقتا قوس وبلىستىڭ مۋزەيلەرى اراسىنداعى ىنتىماقتاستىق بۇدان دا ارتا بەرەتىنىنە سەنەمىن. جاس ۇرپاققا ماقتان ەتەرلىك جاقسى جادىگەرىمىز كوبەيە بەرگەي, – دەيدى سايران تەمىرعالي ۇلى.
باتىس قازاقستان وبلىسى