12 جىلدان بەرگى ءوندىرىستى جاڭا ارنادا دامىتۋ جۇمىستارىنىڭ ناتيجەسىندە قول جەتكەن ايتۋلى بەلەستى زاۋىت ۇجىمى شاعىن مەرەكە رەتىندە اتاپ ءوتتى. جەلىدەن 200 مىڭىنشى بولىپ شىققان جەڭىل كولىك – قوستانايدا بيىل مامىر ايىنان بەرى قۇراستىرىلا باستاعان Kia Sportage كروسسوۆەرى.
ۇساق توراپتى CKD-ادىسىمەن قۇراستىرىلعان اۆتوكولىك دوڭعالاعىنىڭ ديسكىسى مەن بالونى پاۆلوداردا جاسالعان. قۋاتتاندىرعىشى دا – وتاندىق ءونىم. «الليۋر» زاۋىتىنىڭ لوكاليزاتسيالىق ءوندىرىس ءبولىمىنىڭ باستىعى ءادىل شايكەمەلوۆتىڭ ايتۋىنشا, قازاقستاندا جاسالعان ءاربىر اۆتوبولشەك شامالى بولسا دا ءوندىرىستىڭ جەرگىلىكتى ۇلەسىن ارتتىرا تۇسەدى. مىسالى, بۇگىندە Kia Sportage كولىگىنىڭ جەرگىلىكتى ۇلەسى 35% شاماسىندا. الداعى ۋاقىتتا كولىكتىڭ شاناعىن دانەكەرلەۋ, بوياۋ جۇمىستارى دا وسى زاۋىتتا اتقارىلماق. بۇل مەجەگە قول جەتسە, كورەيلىك اۆتوكولىكتىڭ جەرگىلىكتى ۇلەسى 45%-دىڭ ۇستىنە شىعادى.
زاۋىت بيىلدىڭ وزىندە 32 مىڭ اۆتوكولىك قۇراستىرىپ شىعارعان. جىل اياعىنا دەيىن 70 مىڭ اۆتوكولىك شىعارۋ جوسپارلانىپ وتىر.
– قوستانايدا قۇراستىرىلىپ جاتقان اۆتوموبيلدەردى تەك قازاقستاندا عانا ەمەس, بىرقاتار شەت مەملەكەتتەردەن كەزدەستىرە الاسىز. وسى ورايدا «سارىارقااۆتوپروم» جاۋاپكەرشىلىگى شەكتەۋلى سەرىكتەستىگىنىڭ اسا تابىستى كوممەرتسيالىق جوبا ەكەنىن ايتا كەتكەن ءجون, – دەدى «الليۋر» زاۋىتى ديرەكتورىنىڭ كەڭەسشىسى سەرگەي موگيلاتوۆ.
بۇگىندە زاۋىتتا Kia Sportage كروسسوۆەرىنەن بولەك, ۇساق توراپتى قۇراستىرۋ ادىسىمەن جاسالعان LADA Granta اۆتوكولىگى دە شىعادى. جىل سوڭىنا قاراي بۇل ەكى اۆتوكولىكتىڭ شاناقتارىن دانەكەرلەۋ, بوياۋ جەلىلەرىن ىسكە قوسۋ جوسپارلانىپ وتىر.
قوستاناي وبلىسى